銀行閑談 (157) — 再評虛擬銀行，只做貸款的話，點解一開始唔乾脆申請財務公司牌照呢？
華田喺 2020 年尾提到虛銀必須要喺 2021 年「儘快確定盈利模型」，一年過去，結論係虛銀幾乎清一色都走番「貸款」呢條舊路，不禁令人諗番一條最原始既問題：
要做貸款，點解唔乾脆申請財務公司牌照，要申請虛銀咁迂迴呢？
今篇我想嘗試說服一吓大家，如果虛擬銀行只係走番貸款呢條「舊路」係唔合理的，想做貸款搵錢的話，申請財務公司牌照就好喇，因為佢哋：
- 息口可以一樣低；
- 生態圈可以一樣砌；
- O2O 體驗可以一樣好，甚至可以更好！
各家虛銀真係要好好諗吓自己「貸款」以外既 Value Proposition 係乜喇！
一線財務機構一樣可以提供極低息貸款！明白貸款成本結構，就好容易理解喇
今年稅季其實都幾精彩架，因為多咗一堆虛銀出嚟低息爭奪市場，好似間間都好平咁，想攞 cheap credit 的人有福喇！
不過事實係呢，稅貸市場既利潤空間真係被壓榨得九九十十，因為喺當銀行只係收 1 份利息既時候，足足有 3 大份支出要畀，分別係：
- 資金成本，銀行唔係聯儲局無得印銀紙，佢啲錢咪又係借番嚟既；
- 壞賬成本，銀行就係同「風險」共存既行業，借款人幾時都有機會走數個喎；
- 行政成本，燈油火蠟都係錢，剩做網上都要畀電費掛！
單睇 (1) 資金成本，虛銀既處境其實係好吊詭的，因為呢刻 HIBOR (即係香港銀行同業拆息) 比起好多虛銀既存率利率仲要低！咁點解我要開虛銀吸存款呢？
(當然呢度中間有好多關於資金風險同監管既問題，不過唔影響我既論點喇。)
吊詭既同時，就要提番上次 <<銀行閑談 (151) — 又到稅季，點解 AEON CREDIT 等一線財務機構值得大家考慮一下呢？>> 既例子，今季向 AEON CREDIT 借 $800,000 稅貸分 24 個月再攞盡 $10,000 回贈，post-rebate APR 大概係 2.02% (記住唔好信我，最好你自己都計吓)，點解可以做得咁低呢？
因為呢類財務公司有傳統銀行或者大機構撐腰，令到佢哋：
- 資金成本一樣低 (傳統銀行資金成本幾低大家明白、大機構資金成本一樣好平好平啦！)；
- 壞賬成本幾乎一致 (呢個就係揀客人既問題啦)；
- 行政成本甚至比虛銀更低（就算虛銀無分行都好，開銀行都仍然係好貴的，仲有財務公司唔一定要開喺一線旺區，或者乾脆開喺 AEON 超市入面，租肯定平啦，係咪？）
所以話喺息口咁低既情況下，財務公司一樣可以做到超低息貸款，咁虛銀又點生存呢？
生態圈可以一樣咁砌，我剩係黐住 AEON 超市已經無得輸啦！
先 make a disclaimer，我真係 AEON 超市 fans，愛到由住喺全港最西嗰間 AEON超市附近，搬到最東嗰間 AEON 超市附近，係咪好忠心先？
又用 AEON CREDIT 為例，股東生態圈呢樣嘢真係唔係虛銀專利，剩講信用卡，AEON CREDIT 就有 JAL、OK 便利店、和民、愛護動物協會、苗圃行動做 partner，都有少少日本特色個喎！
當然最重要嗰個 partner 係AEON 超市啦，唔幫佢做太多廣告喇，除咗嗰啲感謝日 95 折、會員價之外，就係佢有香港好難申請既 JCB 卡！
除咗信用卡，仲有啲保險生態圈，旅遊、家居、醫療嗰啲簡單嘢都幾齊，背後係同屬日系既三井往友，所以「生態圈」真係唔係虛銀獨有啦！
O2O 服務可以做得一樣好，甚至可以更好！
我成日都話「無分行」其實係一把雙刃劍，好用嗰時好好用，唔好用嗰時就想擲爛個 mon 喇。
由於虛銀無分行，做好線上流程就變成存亡關鍵，咁對識用手機既你嚟講就當然好啦 (唔識用就… sorry 咯)，不過萬一大家真係文件出咗少少問題，單靠相機無辦法確定文件真偽，最好做個 certified true copy，或者最好親身嚟一趟等銀行可以求個安心既時候咁點算呢？
虛銀由於無 offline handling flow，只能夠喺無可奈何之後，嘆一口氣，跟住叫你過主喇。
傳統銀行當然無呢個 online only 既問題，不過其實只有大行先有心力大花資源去做好 online lending，除咗因為唔夠動力 (我靠分行同 call centre 剩做 offline 一樣有生意吖)，仲因為傳統銀行生意眾多，僧多粥少下，各 business line 都唔係次次爭奪到資源喎！
從呢個角度比較，一線財務喺 Online-to-Offline (即係成日講既 O2O 啦)上面就顯得有心有力得多：
- Online 資源既投入相當集中， 借錢始終係生存命脈，喺心力上同資源優先度上都會比較高。好似我上次試咗 AEON CREDIT tax loan 個手機申請流程，核對身份證嗰部份感覺上同一眾虛銀既 solution 非常相似，整體申請亦非常流暢；
- Offline 又總有間分行可以搵到 (OK，大家唔一定要行超市既)，咁要比虛銀彈性好多啦。
所以單論 O2O 體驗，虛銀其實係有先天缺陷，我既愚見係貸款從來都唔應該係虛銀主打產品，傳統銀行同財務公司仍然有絕對既優勢喇。
虛擬銀行只做貸款的話，點解一開始唔乾脆申請財務公司牌照呢？
我記得早喺幾年前，我同某間銀行既 digital head 傾開偈，請教一吓佢哋銀行會唔會申請 VB 牌，佢既答覆係：
This is a million dollar question. What we CAN’T do now?
我諗此時此刻，都有幾間可以嘗試答吓呢個問題。
我既一家之言就係，如果一味只走「貸款」呢條舊路，單以一線財務公司嚟做比較，佢哋：
- 息口可以一樣低；
- 生態圈可以一樣砌；
- O2O 體驗可以一樣好，甚至可以更好！
只做貸款的話，點解一開始唔乾脆申請財務公司牌照呢？
2021 年開始 Medium 只會發佈部份文章，想知最新銀行 insider insight，就要訂閱我 Patreon(patreon.com/watin) 喇！2021 年 8 月 Medium 再次改制，讀者可以選擇將一半既 Medium 會費撥繳至你喜歡既作者。如果你想喺 Medium 上面支持我，可以去以下呢條 link (watin.medium.com/membership)登記做會員哦！華田銀行 FB: facebook.com/WatinResearch
華田銀行 IG: https://www.instagram.com/bank_of_watin/
華田銀行 HKET 專欄： https://wealth.hket.com/sraw116/華田銀行關於華田：
兒時夢想做i-banker，結果做了bank worker，還要是retail那種。過去在各大小銀行不同部門流徙，叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發，到現在還未安定下來。不懂財經、不懂經濟，只想談一下「銀行」這回事。