銀行閑談 (107) — 虛銀 2021 年必須解決的 3 件事

所有 VB 喺 2020 年終於陸續公眾營業，過程都算係有驚無險吧，一眾 VB 喺2021 年既挑戰相信唔會比 2020 年小，成功上線只係基本事，我哋睇番英國既例子，唔好話賺錢，剩係要收支平衡都已經困難重重，更唔好提其實攞牌既時候，一眾 VB 係有應承過 HKMA 要 3 年內 break even 得到的呢。

有邊 3 件大事一眾 VB 最應該喺 2021 年解決既呢？今日同大家分享吓我既睇法啦。

第一件大事 — 儘快確定盈利模型

我諗大家講起 VB，暫時只係會諗起有咩著數可以攞：yuu 積分、微信現金券、咖啡買一送一、周五六日 5% 回贈、日日派息、活期 5 厘等等不能盡錄，但可惜銀行不是東華三院，銀行是一件在資本主義下不斷追逐資本的機器，銀行是必須要賺錢的。

2020 年匆忙上線，有銀行其實連賺取 $1 收入既產品都未有 (Ant)，或者弱弱的只有支付手續費作為唯一收入 (MOX、WeLab、Fusion、Livi)，叫做濕吓口都未得咯。

做得比較理想既係 ZA、AirStar 同 PAOB，前 2 者有私人貸款，好可惜都係賤物鬥窮人，APR 連 2% 都唔夠，計番 funding cost、default risk 同燈油火蠟，明顯係蝕畀你架啦，後者就有做 SME Loan，息口望落去應該盈利能力比較高，不過有無人借，就要睇年報先知喇。

其實作為一間無 legacy 包袱既銀行，盈利模型理論上可以好多元化，以 PAOB 做例子，睇落佢就好傾向完全唔做 retail loan 而想大做 SME loan，retail 純綷用嚟吸錢，唔多打算喺 retail 方面搵錢，所以佢亦都好似唔太 care retail experience (或者叫做唔放咁多資源落去啦)，都不失為一條出路。

咁其他銀行點呢？要同傳統銀行一樣側重 interest product 玩 retail 入 + corporate 出、定係可以做到 retail 入 + retail 出咁就唔需要開發 commercial banking、定係將 focus 放喺 non-interest product 玩投資、保險、外幣找換、跨境匯款、支付服務嚟賺 fee income 呢？

華田無答案，以上就好睇管理層自己既意志，同埋有咩 ecosystem partnership 可以配合得到喇。

第二件大事 — 儘快開發適當產品同吸引對應客群

當盈利模型定咗落嚟，就要馬上開發相關產品，再跑夠足夠「對應既」客群數目喇。

如果側重傳統 interest product 玩 retail 入 corporate 出，咁銀行就要攞 HKMA 就住 commercial banking 既 blessing，仲要加設專門畀 corporate customer 既核心銀行系統，設計 corporate loan 既 product feature、審批流程、追數方法 (背後當然仲要畀 auditor 檢查一大輪)，仲要諗吓點樣吸 corporate customer，請 RM 好定全電子處理好，需唔需要為呢啲客人再整個 app，有咩附加服務提供，例如企業戶口、貼現服務、支薪服務等等，華田我唔係做 commercial banking 都知係大鑊嘢 (+瀨晒嘢) 啦。

如果玩 retail 入 retail 出呢？雖然產品開發既複雜度會比開多一整個 commercial banking 低好多，但係你要有好強大既 customer base (所有債仔都傾向向番自己用緊既銀行借錢的，尤其是係出糧嗰間)，仲要有好強勁既 marketing，好客會問大行借，差客你又唔想做 / 做唔到 (結果流晒畀財仔...)，VB 喺貸款市場既生存空間係乜嘢呢？

如果唔係做 interest product 而係玩 fee income 的話，咁就更加係一場「揼石仔」既遊戲，活躍客群數目要非常大，先可以做得起個經濟規模 (I mean economies of scale)。

大家可以幻想吓，當大家一個月用信用卡消費 $10,000，一年即係 $120,000，銀行扣除基本 0.4% 回贈 (但未計其他支出) 可以賺大概 $1,800 左右，假如有 100,000 個咁樣既「活躍客人」，就可以搵到 $1.8 億。嗱嗱嗱，而家無咩邊張卡得 0.4% 回贈係仲有人用架吓。

咁營運一間銀行要幾錢呢？根據 ZA 既年報，2020 年 1 — 6 月剩係計 operating cost 已經要 1.33 億，而佢 1 月係仲未正式營業的，所以預期全年唔止 X2 咁少。暫時除咗 ZA 之外，未有銀行宣佈客數超過 100,000 人，當中仲未扣除一啲攞完著數已經 zero balance / sleeping 既客人，所以 100,000 個「活躍客人」都唔係一件易事，一眾 VB 如果要走呢條路，就要有好強勁既銀行服務同生態圈，開發既產品就要相當齊全同創新，先可能改變到客人既銀行習慣，所以一樣係前路茫茫呢。

第三件大事 — 儘快完善所有營運同合規既暫代方案

存款小巴炒車、DDOS、錯 statement 只係大家見到既 3 件最嚴重事故，見到既都有 3 件，見唔到既有 3、400 件我諗都唔會太誇張。

銀行趕上線，會有大量 process 用 interim solution 頂住先都係可以預期既，interim solution 會牽涉好多人手導致好容易 human error 說不定、根本無系統而要統統用 excel log 起又說不定、做完個動作根本無辦法留 audit trail 又說不定、因為暫時客少所以未有問題但係人一多就會爆煲又說不定，總之就要嗱嗱聲搞番掂佢啦。

江湖共識係開業後 3 —12 個月 HKMA 就會做不同類型既 onsite audit，AML、eKYC account opening、anti-fraud、cyber security、system resilience、complaint handling、customer service 等等都係 hot topic，應承咗官大人要 3-12 個月之後做番足既嘢，各 VB 準備好晒未？

小總結一個

我認為 2021 年各路 VB 都有以下 3 件急需要儘快解決既事：

• 儘快確定盈利模型
• 儘快開發適當產品同吸引對應客群
• 儘快完善所有營運同合規既暫代方案

各位 VB Bank Worker，2021 年唔會比 2020 輕鬆的，大家要加油加油哦！

喜歡這篇文章的話可以 share 這個 Post, 留言, Like 我的 FB、關注我的 HKET 專欄、follow 我的 Medium、更可以課金支持我的 Patreon 哦 (超多獨家內容的)！

FB: 華田銀行 X 華田士多 HKET: wealth.hket.com/sraw116/ Medium: medium.com/@Watin/ Patreon: patreon.com/watin

關於華田：

兒時夢想做i-banker，結果做了bank worker，還要是retail那種。過去在各大小銀行不同部門流徙，叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發，到現在還未安定下來。不懂財經、不懂經濟，只想談一下「銀行」這回事。