銀行閑談 (152) — 虛銀 2021年必須解決的三件事回顧！到底虛銀做成點呢？

光陰似箭，2021 年好快又到尾聲，華田先祝大家喺新一年凡心之所向者，哪怕只能素履以往，皆能一蹴即至，過住幸福美滿嘅 2022 喇。

喺今年年頭華田就寫過 <<銀行閑談 (107) 虛銀 2021年必須解決的三件事>>，提到虛銀必須要 1) 儘快確定盈利模型、2) 儘快開發適當產品同吸引對應客群、3) 儘快完善所有營運合規嘅暫代方案，到底 8 間虛銀有無好好解決留底嘅問題呢？今日就同大家一齊回顧下啦！

第一件大事：儘快確定盈利模型 — 模型係確定喇，只係略嫌沉悶咯

如果要用兩個字講曬 8 間虛銀嘅盈利模型，我諗就係「貸款」兩個字喇。

睇番一年前既今日，當時嘅 8 大虛銀大概可以分做三類，第一類就係主打貸款嘅 ZA、AirStar 同 PAOB，第二類就係但係依賴支付手續費作為唯一收入嘅 Mox、WeLab、Livi 同 Fusion，同埋連一蚊收入都未有嘅 Ant 喇。

咁嚟到今日又點呢，就係除咗 Ant 仍然唔知賣緊啲乜 (我真係睇唔到佢到底有咩 product 係搵到錢的)，另外 7 間都係主力做貸款生意，分別只係做零售貸款、商業貸款定係消費貸款，咁喺 2021年 ZA 同 AirStar 就成功從零售貸款過渡到商業貸款，開拓香港嘅中小企生意，為豐富整個盈利模型行咗一大步。

Patreon 傳送門：銀行閑閑談 #80 — 快評幾點 ZA Commercial Bank 玩法

咁睇番年中報表，PAOB 就喺唔爭奪擠擁既零售市場、專心做中小企市場下，成為暫時 8 家虛銀入面最有可能最快 breakeven 嘅一間，証明專心一致、韜光養晦既策略都 work 個喎！

Patreon 傳送門：

不過老實講，如果「銀行」只係等於「財仔」的話，咁就實在係太無聊啦，例如 WeLab Bank 官網站寫住：「香港虛擬銀行服務唔應該只停留喺存款、轉賬、交易同網上服務，」咁而家多咗「貸款」都叫多咗啲嘢嘅。

我諗喺理論上虛銀嘅最大優勢就係「無分行」同埋「無 legacy system」，而家我都未完全睇到底虛銀點樣善用呢兩大優勢嚟顛覆傳統銀行，同時達到盈利嘅目的。綷純要做貸款生意的話，開一間全新既網上財仔就可以喇，一樣可以無分行、無 legacy system，又何須開一間銀行咁大陣仗呢？

我諗 2022 年各 virtual bank worker 都要諗諗喺貸款以外，點樣利用股東圈、生態圈、無分行、無 legacy system 既優勢豐富盈利模式喇！

第二件大事：儘快開發適當產品同吸引對應客群 — 有啲都做得幾出色喎

喺 2021 年各間虛銀都各出奇謀，出咗唔少「稍稍」創新嘅 product 出嚟吸客，包括外匯產品、分期貸款、消費貸款、出糧貸款、無卡提款等等，隨便攞啲今年寫過嘅文出嚟畀大家喚醒吓大家記憶啦。

Patreon 傳送門：

當中精選幾個 2021 年我最深印象嘅產品，就要數到 livi 嘅 BNPL (我覺得真係做得幾差嘅)、ZA 出糧 Fast Pass (非常聰明同有諗法嘅產品)、WeLab GoFlexi 分期貸款 (雖然未必好易用，但係夠膽將 Mortgage Link 玩法搬落私人貸款，有趣！) 同埋 Mox Credit 喇。

咁大家見我寫咗幾篇關於 Mox Credit 嘅文章，就知道我係好欣賞成個產品，尤其是當佢由一個 debit product 變成 credit product 過程中嘅客戶溝通、App 嘅流程、還款指示、再到之後消費分期、現金分期等等 UX/UI 都做得非常之流暢，發揮到無 legacy system 下應有嘅清脆利落。

傳統銀行喺 2021年又有乜嘢好創新 / 震撼嘅產品推出呢？

呢一刻我淨係諗到渣打嘅 Cathay Card (都係轉個名再小修小改啦) 同埋匯豐嘅 EveryMile 卡，除此之外，我就諗唔到有乜好吸引象嘅產品喇。

Patreon 傳送門：

成日都有人話，發牌畀虛銀嘅目的之一，就係向傳統銀行製造鯰魚效應。我諗喺產品創新上，2021 年的確係傳統銀行比下去既一年喇。

第三件大事：儘快完善所有營運同合規既暫代方案 — 都總算風平浪靜喇

相比起2020年虛銀嘅甩轆不斷，2021年總算風平浪靜喇。

咁當然喺營運同合規上面 no news is good news 啦，江湖傳聞所有虛銀喺開業 6 至 12 個月之內都會被 HKMA on-site audit 一次，睇下有冇啲 technology risk、operational risk、AML risk、anti-fraud risk、complaint handling 等等嘅問題，咁喺最後一間虛銀 Fusion 都開業一週年嘅今日，我哋都未聽到邊間虛銀有畀 HKMA 公開遣責，咁即係話八間虛銀都恭喜曬、安然無恙喇。

諗返起2020年都幾多事故架，例如就有存款小巴炒車啦、DDOS 啦、出錯月結單啦等等嘅問題；今年就都係小蝦碌啦，例如明明隻 product 未出，但係官網 visual 就率先搶先出街、睇電視、逗嬲嬲兼夾太多人開戶出現小死機、抽獎又抽中咗 intern 疑似做馬咁，進步咗好多架喇！

雖然話咯間虛銀嘅 CXO 好似音樂椅咁轉咗一轉都唔止，事後再搵到有事故都死無對證啦！我諗勉強可以話係一個時代嘅終結喇，一代人完成咗開業嘅任務，另一代人就要負責睇吓點樣生存落去，再冇藉口話要搞 compliance 唔得閒跑生意啦！

2022 年虛銀展望，會唔會有邊間股東反枱咁呢？

2022年虛能有乜嘢展望呢？

其實都冇乜嘢展望，HKMA 透過發牌畀虛銀製造鯰魚，效推廣普惠金融、威迫傳統銀行作出改變嘅目標已經達成，下一步各虛銀可唔可以成功獲利就要睇各家嘅造化喇。

其實喺申請牌照階段，HKMA 都有要求所有銀行提交三年嘅計劃書，闡述點樣 3 年內達致收支平衡。一年好快就過去啦，breakeven 之路有幾間相對近啲，另外幾間就可以用「遙遙無期」嚟形容喇。

喺錢已經使咗咁多，各虛銀股權結構又相對複雜下，究竟係唔係所有股東都咁一心一意繼續注資、繼續燒錢等待收成嘅一日呢？定係會有股東反枱退市止蝕離場呢？

一齊睇多一年，到 2022 年尾我諗我哋就會有一個比較清晰嘅答案喇。

2021 年開始 Medium 只會發佈部份文章，想知最新銀行 insider insight，就要訂閱我 Patreon(patreon.com/watin) 喇！

2021 年 8 月 Medium 再次改制，讀者可以選擇將一半既 Medium 會費撥繳至你喜歡既作者。如果你想喺 Medium 上面支持我，可以去以下呢條 link (watin.medium.com/membership)登記做會員哦！

華田銀行 FB: facebook.com/WatinResearch
華田銀行 IG: https://www.instagram.com/bank_of_watin/
華田銀行 HKET 專欄： https://wealth.hket.com/sraw116/華田銀行

關於華田：
兒時夢想做i-banker，結果做了bank worker，還要是retail那種。過去在各大小銀行不同部門流徙，叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發，到現在還未安定下來。不懂財經、不懂經濟，只想談一下「銀行」這回事。