《刺陵》刺著超級多舊魚
年份：2009年 導演：朱延平 編劇：張炭、葉雲樵、林超榮、林呈析、邵慧婷 演員：林志玲、周杰倫、曾志偉、陳道明
───
劇情簡介
神秘守陵一族的喬飛（周杰倫飾）專門打擊盜墓的非法活動，進行保護古物的工作。恩師屠老大的小說家女兒藍婷（林志玲飾）遭到盜墓一族綁架，要脅交出荒漠中失落古城的藏寶圖，屠老大遭到他人殺害。
喬飛前去與綁架者排骨（曾志偉飾）一夥談判，另一集團繃帶刺客星期五中途殺入強奪藏寶圖。藏寶圖被小羽毛偷走，觸發沙塵暴影子軍團襲擊，眾人逃出沙漠。喬飛和藍婷偷溜，野心的排骨與考古界老手華爺（陳道明飾）聯手尋找古城，華爺是曾在多年前的尋找失落古城時唯一逃出的生還者。
喬飛隨著藏寶圖追蹤到浪人部落裡，首領叨十三郎（苗圃飾）是喬飛離鄉的舊識，叨叨不滿喬飛當年的離去，將藏寶圖大量印製發放，尋寶人全部起身出動。而實際上僅有喬飛和華爺兩群人馬看出藏寶圖的正確位置。相信愛情的叨叨，在大漠中不斷找尋大漠飛鷹（陳楚河飾），浪人部落的創立人，終生飄蕩於大漠南北，只有喬飛回來大漠飛鷹才會現身，最後叨叨擋身中劍，化解大漠飛鷹與喬飛之間的恩怨。
沙塵暴再度席捲荒漠，喬飛和華爺兩組人馬進入那失落的古城。除排骨外的兩名跟班皆因智缺而吃了毒菇，而變成活屍。來到古城最深處，藍婷慘遭古城守護淫魂附身，和喬飛大打出手，最後成功封印了淫魂，排骨則在池裡找到金條寶藏，古城即將崩潰。華爺憶起當年來到此地考古夥伴們罹難的過去，決定留下深埋其中。喬飛帶著藍婷逃出，隨後獨自驅車離去，藍婷發表了最新冒險尋寶小說「刺陵」，大受暢銷好評，原諒了她的父親。
───
《刺陵》嘅高潮，第三分鐘已經出現。話說林志玲喺劇中演作家，不過好耐冇交稿又冇書出，出版社老闆喺電話恐嚇佢：
「三天，我只給你三天（就要交稿），這是最後通碟，三天不交稿你會被炒。」
呢句簡直神來之筆：睇完套戲，我肯定電影公司只畀咗三日編劇寫《刺陵》，皆因劇本嘅水平低到爆，劇情空空如也，太多無謂枝節，絕對無可能用多過三日去編（笑）；編劇－包括張炭（《新龍門客棧》、《黃飛鴻之二：男兒當自強》）同林超榮－為咗幫自己開脫，借演員把口講出呢個事實，等後人考古時會明白。
【史兄問問你】
不過，平心而言，《刺陵》爛嘅程度徹底比唔上經典《天機：富春山居圖》（《天機》居然成為衡量爛片嘅指標）。《天機》乃全方位爛－劇本、導演、製作、演員。《刺陵》尚有完整劇本，「只係」太多多餘劇情，極多同劇情無關、與故事推進毫無瓜葛嘅插曲－100分鐘嘅戲佔大概60分鐘。
《天機》用咗兩億港幣，你睇得出啲錢浪費喺邊；《刺陵》用咗億二港幣去拍，你唔知啲錢去咗邊，如果你係投資者，你想覺得邊樣好啲呢？
───
《刺陵》一戲可分為上下兩部，上半為尋找地圖喺沙漠飛奔、下半為古城探秘。
－話說地圖一直喺曾江手中（林志玲老竇），曾志偉同陳道明為咗迫曾江交出地圖，走去挾持林志玲；
－當周杰倫代曾江用圖換玲，中途殺出繃帶刺客並有場打鬥（戲中無代交佢係邊個，而呢場戲之後繃帶刺客就冇再出過場……）
－小羽毛喺混亂偷走地圖，跟住沙塵暴影子軍團來偷襲（戲中亦無代呢班係乜嘢人，而理所當然地，呢場戲之後影子軍團就冇再出過場……）
－之後小羽毛返到浪人部落，將地圖交畀叨叨，林陳周曾（林志玲、陳道明、周杰倫、曾志偉）追到嚟，周發現叨叨係舊相識
－叨叨居然將地圖大量印製，人人有份，永不落空！點知原來所有人睇錯地圖屌錯女，張地圖要倒轉睇
－林陳周曾睇啱地圖，去啱古城（中間發生叨叨同大漠飛鷹事件）
《刺陵》太多多餘劇情，與故事推進毫無瓜葛嘅插曲－100分鐘嘅戲佔大概60分鐘。淨以上面計：
1. 陳道明以前去過古城，唔使靠張地圖；作為「守陵一族」嘅周杰倫，唔熟悉個陵喺位置又點守？地圖對兩批人由始至終乃多餘之物，於是同搵地圖相關嘅劇情亦一概變得無謂。
2. 叨叨、大漠飛鷹同浪人部落等設定，對整個故事毫無影響，劇情推進步伐係零。係零！浪人部落一段，林陳周曾四人無得到任何額外道具、資訊、人材、經驗、感情，搞一大輪，四人只拎返原本屬於佢哋張地圖，過程無人死、無人受傷。然後量產地圖，浪人部落所有人去搵古城，不過原來全部人去錯地方。呢樣嘢對林陳周曾四人亦係零影響，因為佢哋一嘢就去啱咗！咁所有人去錯又有乜所謂？甚至乎，浪人部落、量產地圖又有乜用？
3. 繃帶刺客何許人？無講；沙塵暴影子軍團何許人們？亦無講。於是，周杰倫同繃帶刺客打交、沙塵暴影子軍團來襲，無必要，亦無厘頭－你想像主演演員行行下街，無端端同街嘅陌生人隻揪，一翻打鬥後繼續下街，除咗係要花錢等有班人騎下馬出場，用下老闆洗嘅筆直，順便沾下油水，真係諗唔到做乜。
沙塵暴影子軍團出場係用真人真馬，風沙用CG，望落去賓墟咁款：
《刺陵》呢班沙塵暴影子軍團來襲，等同《阿嫂》最後嗰幕啲黑色車大炒特炒。明未？
───
《刺陵》更大問題在於尋找地圖同古城探秘兩段戲份嚴重不均。呢套人腳背景，十足十《奪寶奇兵》＋《盜墓迷城》，尤其叫得刺「陵」，主角又不斷講個「陵」，重心肯定要放喺個「陵」。唔知係導演搞錯咗定編劇玩嘢，重點去咗「玲」度……《刺陵》，林志玲先至係第一主角－無錯，以鏡頭計林志玲絕對係主角，周杰倫只作配襯。林志玲極靚，比起《天機》嗰個正好多，可惜演技同樣地屎：不論係乜嘢劇情情況，喜怒哀樂都係同一個表情：
好死唔死，佢演技最好嗰幕，係畀鬼上身，變得兇殘，想殺死周杰倫……
陳道明同周杰倫嘅角色根本係一拆二，二人戲份薄到手切肥牛咁；曾志偉喺有正常發揮，演活咗縮骨嘅排骨，但無法令《刺陵》起死回生。
───
《刺陵》去到80分鐘先進入古城，只餘下20分鐘交待好幾個未解之謎－古城有乜秘密、點解曾江咁睇重個古城、陳道明第一次入陵發生乜事。《刺陵》頭重尾輕，喺沙漠玩咗個幾鐘，最重要嘅城內／陵內戲份咁少，有草草收場嘅感覺。相比之下，1999年上影、令奪寶片起死迴生嘅經典《盜墓迷城》(The Mummy)，片長120分鐘，40分鐘就入到古城，有好幾幕依然係經典。
對於一心睇尋寶嘅觀眾，只要喺20分鐘睇到主角們密室式無回頭路鬼屋機關大挑戰，死一兩個主要角色，配角捨身成仁，女主角受傷，跑跑跑跳跳跳，緊張激刺下，一樣收貨。
放心！上面嘅嘢，一樣都冇！
《刺陵》下半部令觀眾超級失望，少啲自制力都界櫈離場。因為古陵「陷阱」唔單止數目少，仲超級豆泥：
－地下有毒菇，食咗會痴線，整死咗兩個全無戲份嘅大茄。又好嘢喎，啲菇喺地下，你唔食係無事，呢兩條友居然敢食菇狀物體，弱智程度同《普羅米修斯》班戇鳩有得揮；
－有三把飛刀（真係得三把咁多，我數過），反地心吸力咁飛嚟飛去，只令周杰倫浪費體力跳嚟跳去，無造成任何傷害；
－有幾排齒輪，喺度不斷轉，作用疑似控制三把飛刀。唔似有攻擊性，無造成傷害。陳道明插咗支鐵去其中一個齒輪，直徑目測有兩個人咁闊嘅齒輪就停止轉動，而飛刀亦停止再飛（唔好問點解兩者相關）；
－鬼上身：打開陵蓋之前，有四道造型似甘道夫嘅鬼魂上咗林志玲身。周杰倫一打開個陵，啲鬼魂就震懾，消失得無影無蹤。鬼上身無令任何人受傷，反而林志玲就暈咗（但好快又醒返）。好奇怪嘅，呢四道鬼魂角色應該係陵主（蘭陵王，trailer有講但套戲無提過）嘅四大護法，點會打開個陵啲護法就反而驚……
總括嚟講，作為戲中重點，陵內只有零星機關，真正主動造成危險嘅只有三把飛刀，比起冒險樂園內波波池嘅潛在風險更加少，求其一間惠康超市貨架嘅安全隱患都多過佢。咁亦反映到蘭陵王相當節儉。於是，成個陵嘅機關，只殺咗兩個亂食地上食物嘅大茄同收服四個護法鬼魂！好難得，一套奪寶片拍到咁乾淨，無死人、唔流血，唔驚險、唔刺激，主角們一啲事都冇，蘭陵王可謂宅心仁厚，人見人愛。
更令人屌爆咀係個結局：打開陵蓋後，蘭陵王咀角含住夜光珠；周杰倫作為守陵一族，居然不由分說，好順手咁一嘢拎走咀粒夜明珠……周杰倫當時並無面對任何危險，恐怕其他人拎走粒夜明珠，所以自己搶先拎走佢好好保護。
偏偏粒夜明珠一郁就變沙，周杰倫呢個弱智舉動，保育變毀育，同香港特色嘅保育風格，可謂同出一轍。
更恐怖係，一郁粒珠啟動咗冧陵嘅機關。最後個陵冧咗，一切灰飛煙滅，周杰倫為咗唔畀人破壞個陵，自己親手搶先一步將佢摧毀，「寧教我負天下人，休教天下人負我」，好似景賢里個業主咁、同四叔喺南生圍做嘅嘢一模一樣，認真用心良苦呀屌你老母……你仲自稱乜嘢守陵一族？
───
歸根究底，《刺陵》選角同製作班底嘅構成，已經保證套戲爛爆：
選角：周杰倫同林志玲係主角，唔會死（原先估計林志玲最後會死）；配上影帝級曾志偉同陳道明，片酬咁高，亦唔會咁易死（我原先估計曾志偉入陵後會因財喪命）。於是喺入古陵前，你肯定無論遇上任何緊張劇情，周林曾陳皆唔會死。於是喺沙漠又飛車又飛馬又盛，觀眾心中有數，榻屋好、冧樓好、地震好，乜撚都好，呢四人組皆化險為夷，睇落去毫不緊張。
導演：朱延平，亦係《功夫灌籃》導演，亦由周杰倫主演（若非有90年代嘅《男兒當入樽》珠玉在前，《功夫灌籃》應該係最爛嘅運動片）。90年代朱延平發掘咗郝劭文與釋小龍兩位童星，並以《新烏龍院》，一度大受歡迎，但已經過晒氣。根據維基百科，朱延平喺2004年拍嘅《人不是我殺的》：創下台北市總票房僅有2280元新台幣的最低紀錄，約僅有10人左右觀看；同年嘅《一石二鳥》，創下當時台北市首周票房只有13830元新台幣的紀錄，換算當時台灣電影票價，約僅有58人觀看，但中國大陸票房開出6000萬新台幣的紅盤。
如果睇完朱延平喺2007年拍嘅《功夫灌籃》，仲敢投資一億幾港幣搵佢拍《刺陵》，唔睇好個劇本，呢啲錢抵你輸。
俊男美女老戲骨，完美配搭，但後天劇本嚴重不足，朱延平用緊80年代港產／台灣片嘅方式，喺2009拍劇，老氣縱橫，畫面灰灰黃黃，主角毫無交流，零火花，死氣沉沉，睇咗十分鐘，一陣老人徐透過畫面滲出嚟，好撚懷舊。全程100分鐘，尋寶主線悶到抽根，唯一令我緊張嘅係林志玲究竟同周杰倫有冇大膽親熱戲……點知係冇，更令本人忿怒。
另外，《刺陵》有一堆不解之謎，令人迷惑：
－繃帶刺客是何許人？我知，演員現實身份係劉耕宏，周杰倫好友；但佢喺套戲做乜、刺殺人嘅目的係乜、老闆係邊個、點解要綁住啲似紙巾嘅繃帶、點解同周杰倫打打下交，沙塵暴影子軍團出現之後，佢偷偷咁離開咗就無再出現。做人可唔可以有交帶少少……
－配樂：點解沙漠追逐，要用上輕鬆嘅配樂？
－決勝負（54分鐘）：點解周杰倫同演沙漠飛鷹嘅陳楚河，兩個人無端端對住剷沙，就分到勝負。唔係我唔明，連身邊個細佬女都唔明呀屌你哋！
－大漠飛鷹：「有天散步的時候，給我撿到一枚兩面都是飛鷹的硬幣。」
its absolutely fine, except they are living in a desert. 我唔明喺沙漠點散步，仲要喺一片沙度見到硬幣……
養份時間：如何改寫《刺陵》
直頭照抄《盜墓迷城》，畀幾百萬買個改編權，照抄照改照拍，最緊要抄足個陵，一樣去沙漠拍、將木乃伊變做蘭陵王就得。人哋1999年用6億港幣拍，去到2009年你得1億，咪拍個弱化版，減少外景囉（啲馬跑嚟跑去，起碼用咗1000萬）。
角色方面，最好林志玲中途跌落機關失咗踪，最尾十分鐘先再出現，唔使將佢嘅演技獻醜同獻世；唔要陳道明，換個年輕男主角，想追林志玲而夾硬跟埋嚟，同周杰倫一開始不和但隨故事發展而漸漸建立友情，後尾為咗林志玲犧牲；曾志偉一樣做貪錢嘅排骨，人為財死，中途畀陵內嘅機關迷惑，以為自己好似史高治咁喺錢海游水，現實係畀白骨圍住。
林志玲最好後尾被困於陵中，生死未卜。周杰倫繼續孤身上路，希望他朝有日開返個陵，搵翻林志玲嘅屍首。
如果收得咪拍第二集，講林志玲以為周杰倫掉低自己，因愛成恨，向再嚟尋陵嘅人報仇，先發現原來已經過咗兩百年，自己已成鬼魂……
Follow me on Medium，我嘅文字唔會令你失望（不過寫文嘅速度會）。 https://medium.com/@relgitsjg
【今年史兄喺Medium所得稿費，將全數用作支援魚蛋革命嘅義士。】
Facebook page：https://www.facebook.com/Relgitsjg
【港產爛片系列】 －十萬個做乜鳩：《天機：富春山居圖》：https://readmedium.com/switchthemovie-486b53c422c2 －《屌那媽亞星》https://readmedium.com/himalayashit-c51820bf1e31 －《港產爛片終身成就奬頒奬典禮》https://goo.gl/qLA64j －《港產爛片終身成就奬頒奬典禮》（大結局）https://goo.gl/nMN7FJ －《我老婆（居然）係明星》https://goo.gl/8yXbRN －《男兒當入樽》－唔係櫻木流川嗰套https://goo.gl/SebZHP －You know nothing,《吳清源》https://goo.gl/ZzD7Lo