港產爛片高峰：《阿嫂》
（此文寫於2016年11月，為港產爛片系列第一炮。經重新編輯，並加入改寫《阿嫂》劇本）
人生不幸地睇過唔少爛片，當中又要港產片為主。而家寫返個系列，介紹下港產爛片中嘅經典。
1. 何謂「爛」？
爛片通常有晒以下五個原素，同五行嘅金木水火土一樣，缺一不可：
(i) 套戲超級唔好睇 (ii) 同預期相差太大 (iii) 團隊（特別係導演）眼高手低/掛羊頭賣狗肉 (iv) 劇情不知所謂 (v) 中途有想離場、完場有想界櫈嘅感覺。
當中最最要嘅係「劇情不知所謂」。劇情不知所謂，又可分為三個層次：
－低級：劇本無頭無尾，以跳躍式進行，前言不對後語，無從理解，邏輯紊亂，又或是劇本毫無主旨、主線，令人摸不着頭腦。一路睇，你越會覺得劇本係編劇狂灌咳藥水+大量迷幻藥後用十五分鐘創作出嚟咁。例如，《女人本色》（梁詠琪、薛凱琪）嘅後半部，完全係暴走；《蝙蝠俠對超人》，一樣係令人拗撚晒頭。
－中級：無病呻吟、無的放矢、無中生有，懶有嘢、扮晒高深、只求營造「你睇唔明係你無深度」／「睇得明先係識睇戲」嘅感覺。例如：《吳清源》。
－高級：all of the above。例如：呢篇文講嘅《阿嫂》。
「爛」，乃一個相對嘅概念，代表你預期同套戲本身嘅水平之間嘅巨大差距。有時候套戲唔係太差，但你對套戲預期好高，套戲都會變成爛片。當然，更多情況係你明明對套戲已經毫無期望，佢仍然可以令你失望（例如王晶嘅近十年拍嘅任何戲），失望到有驚喜（例如《天機之富春山居圖》）。又諗真啲，無期望但仍令人失望嘅戲，同香港嘅舊泛民議員不遑多樣。由於爛係一個客觀實際同個人預期水平之間嘅比較，係好主觀嘅嘢嚟－我覺得吳清源爛到核爆，依然有人覺得好睇。
又，一套戲爛與否，與拍攝成本關係甚微。無畢直、卡士唔夠吸引、演員演出差勁(Janice Man in《大追捕》/《寒戰2》、莊思敏in《導火新聞線》)、拍攝水平低，可能令套戲唔好睇，但唔會搞到佢爛。不過，笨拙嘅演員同垃圾嘅劇本，往往係相輔相乘。
2. 關於港產爛片雜談
呢個系列只會包括已經落畫嘅港產片，大部份係2000年後。俗語有話 「斷人衣食，尤如殺人父母」；再加上「夫妻如衣服」（即衣服如夫妻），於是 「斷人衣食」又再等同 「殺人夫妻」。綜合以上兩句話，如果我寫一套上緊嘅戲爛令大家唔去睇，「斷人衣食」，等同一嘢殺晒人哋父母同兩公婆，好撚陰質，所以我只講落畫嘅港產片。
3. 關於養份時間
除咗寫套戲有幾爛，最後會嘗試改寫套戲劇本嘅大方向，改寫或者修正原著劇本。我希望除咗評論／批評，可以提出些少改善嘅建議，唔好淨係「破舊」而完全無「立新」。如果發覺根本無得改寫，一係劇本堅爛，一係原本個劇本已經係喺現有局限下最好嘅劇本（即使係爛）……
年份：2005年 導演：黃精甫 編劇：司徒錦源、吳煒倫 主演：曾志偉、任達華、黃秋生、方中信、劉燁、劉心悠、林嘉欣、廖啟智（客串）、元華（客串）、謝君豪（客串）、羅仲謙（客串）
官方劇情簡介：《阿嫂》是黑社會江湖電影，敘述香港社團大家族恩仇。
啲人寫一個系列嘅文章，最正最勁最好睇嘅放喺最後（正如超人都最後先出絕招），但今次呢套《阿嫂》，簡直站喺港產爛片嘅頂峰，遙遙領先，前無古人後無來者。《阿嫂》係港產片中爛嘅第一名，《寒戰》系列連車尾燈都見唔到。
《阿嫂》真係痴撚線，痴撚線地爛。當年喺nowTV爛片台睇，覺得爛，每次睇廿分鐘就要熄電視，最後分開四次先睇得晒（呢套嘢首播嗰陣仲要係每月大片嚟）；十年又過去，舉止仍像少女，呢兩日睇返依然覺得勁爛。
套戲嘅最大問題（唔係唯一問題），係故事無厘頭到極點，基本上除咗曾志偉死咗、跟住好多人死咗、到最後劉心悠死埋之外，我講唔出套戲做乜。主角之間有乜動機、佢哋之間點解有衝突，最後點解又會回心轉意，完全無交待：點解黃秋生要恐嚇兼錯手殺死曾志偉？何解任達華要假傳聖旨？劉心悠唔識食魚同套戲有乜關係？元華同夢遺大師係咪親戚？小紅帽個故事做乜？曾志偉究竟點死？曾志偉點解要賣人情畀廖啟智？劉心悠搭超長電梯見班大佬講咗啲乜有乜結論？林嘉欣想劉心悠生定死？中間啲過場動畫想表達啲乜？最尾撞車嗰幕做乜鳩？呢啲問題，正常觀眾會問，但套戲無畀過任何蛛絲馬跡等你去搵答案。
《阿嫂》唔係偵探片，偏偏越睇越多問號，越睇越無厘頭，我變成羽田若希咁，不斷問「點解嘅？」「點解嘅？」「點解嘅？」「點解嘅？」「點解嘅？」，啲疑問全部無答案。到最尾撞車嗰幕，簡直將我嘅疑問（同我自己）推向懸崖。炒車呢幕事出突然、毫無伏線，無端端一大班人渣住堆黑色車，喺公路撞嚟撞去，啲車飛呀衝呀撞呀炒呀，撞足十分鐘，最後撞死咗劉心悠。你跟本唔知係邊路人馬對決，完全暴走嘅一幕。
呢幕似係導演差唔多拍完套戲，發覺有幾百萬畢直未用完，於是堆咗場撞車戲嚟洗埋啲錢佢……情形似每逢二三月好多公司就要想盡辦法洗埋之前預留嘅畢直，唔洗咗佢就唔心息。如果我係投資者，試片見到呢幕，一堆車（同自己啲錢）無厘頭咁燒法，真係心都寒埋，流血不止。
喺你鬆一口氣以為整個故事已落幕之際，眾人再嚟為劉心悠送殯（目測老臨過百，呢幕又洗你十幾萬）。林嘉欣講出咗佢演藝事業中最爆嘅一句對白：
「佢改變咗呢個世界。」
嘩！我屌！你劇本廢，我忍；撞車，我仲忍到……睇到呢幕，真係屌咗出嚟。套戲我已經要喺爛片台分四次睇。劉心悠改變咗乜嘢？純粹一個白痴妹走出馬路畀車車死之後無人要負任何刑責……佢無改變到《阿嫂》作為一套爛片嘅地位；無改變到林嘉欣自從《男人四十》之後冇演過正常嘅戲；無改變到任何嘢！改你老母呀！如果一個話事人死，嗰個黑社會字頭就散band，咁呢個世界無黑社會啦！
《阿嫂》嘅劇本，係屬於不知所謂中嘅高級。
套戲有一大堆毫無個人特色、作用等同跑龍套嘅配角（劉燁、謝君豪、元華），完全唔需要存在（呢幾個人又用你一百幾十萬）。即使全套戲唯一稱得上有性格嘅人物－洛華姐／林嘉欣，都好似患撚咗精神分裂咁，性格唔撚連貫，做嘅嘢突然前後矛盾，完全相反：作為黑社會大佬嘅林嘉欣，喺套戲頭三十分鐘明明好想殺死佢殺夫仇人個女（劉心悠），每次見到佢都面目猙獰、咬牙切齒咁款；中途開大會都對劉心悠露出一種敵意、恨意、惡意、不屑同恥笑；點知一個屈尾十就坐喺後花園同劉心悠促膝詳談，面目慈祥、循循善誘咁解釋大道理佢知，又通水佢知係黃秋生殺咗方中信，最後仲要幫佢搞埋個喪禮。
係，劉心悠改變咗林嘉欣，但點解改變、點樣改變？恕晚生廢柴，我睇咗好多次都睇唔出林嘉欣嘅心路歷程，只可以想像林嘉欣中途去咗福島／切爾諾貝爾（套戲無交待 of course，不過嗰陣明明福島未爆），中咗大量幅射後，個人性情大變。
《阿嫂》最重要嘅死因係：期望落差。既然有大量影帝影后級人馬坐陣，最忌嘅唔係佢哋人工貴（因為實貴），而係拉高晒觀眾對電影質素嘅期望。你只要有些少差池，一定畀人屌到飛起。當你有曾志偉任達華黃秋生林嘉欣廖啟智元華去演－that are 4 best actors 7 best supporting actors combined in the history of Hong Kong Film Award－仲有劉燁謝君豪方中信，觀眾會預計你套戲嘅其他配套有咁上下，例如劇本、拍攝、導演。《阿嫂》就話畀你聽唔好有錯誤期望，死還死、七孔流血還七孔流血。
我發現，近年每逢三個或以上影帝級人馬參與嘅港產片，幾乎必爛：
寒戰2：周潤發、郭富城、梁家輝（當然1都好爛，但2更加爛，拜託唔好拍3） 賭城風雲III：劉德華、周潤發、張家輝（當然成個賭城風雲系列，睇trailer都知爛；同埋都唔可以叫港產片）
越大卡士，爛嘅機會越高。
去返《阿嫂》。套戲搞成咁，導演黃精甫要負最大責任。好明顯，《阿嫂》沿用《江湖》（劉德華、張學友）嘅拍攝手法，充斥住大量扮晒嘢、無意思嘅鏡頭同攝影手法：將鏡頭打直（劉心悠見完林嘉欣喺街度行一幕）、打斜（林嘉欣離開寺一幕）、幅牆／不透明物件佔咗畫面80%+（幾乎成套戲），你想表達啲乜嘢？最撚搞笑係夢遺大師元華，神出鬼沒咁以極上武功打倒一眾黑幫人士，嗰幕似足古代無線拍金庸故事，主角要以閃身術快速移動嘅畫面……其實元華個角色應該由劉以達去演。
電影用動畫嚟作過場－我從來冇諗過睇戲都有廁所位－作用不明、語焉不詳，除咗將套戲浪漫化，似乎只係為咗顯示導演有能力將唔同嘅表達方式溶入套戲度（btw，幾條動畫都要三幾十萬）。浪漫化嘅另一個證據，係導演刻意所有主角死亡「致命一擊」嘅畫面全部避開－有槍聲然後曾志偉倒地、鏡頭搖下搖下方中信就死咗……………諗真啲，拍黑幫片拍得咁搵馨，黃精甫應該改拍《真情》。
總結嚟講，《阿嫂》呢套戲唔可以用文藝片或者商業片嚟分類，咁分簡直係侮辱咗黃精甫。我會將《阿嫂》定性為一場行為藝術－黃精甫執導呢套戲係一個行為藝術、一場成功地將投資者幾千萬嘅錢倒落咸水海嘅行為藝術。佢希望透過令呢班有錢投資電影嘅人血本無歸，揭起一場反資本主義嘅運動。
如果你想知點解2005年以後，香港無人再出錢搵新進導演拍戲、又者只係畀雞碎咁多錢就想拍套戲，請睇一次《阿嫂》，再向黃精甫追究（笑）。
────
養份時間：如何翻拍《阿嫂》
將《阿嫂》嘅主旨定為 「禍不及妻女」。一大班影帝分成兩派，各屬敵對社團長江同黃河。
故事以長江社團阿頭嘅妻女某日被殺開始。長江社團內部大怒，認為江湖人士再無道義亦唔應該搞人老婆仔女，正所謂「禍不及妻女」。經查證，長江社團一致認為係敵對社團黃河嘅傑作。
兩個社團埋枱講數，但黃河社團否認所有指控。
江湖風暴從此捲起。
長江派出旗下二路元帥（劉燁）進行反擊，打算喺酒店暗殺黃河社團話事人。劉燁係一個忠心嘅打仔，效力長江十幾年，一路做到二路元帥。喺暗殺嘅過程中，劉燁爭啲斬中劉心悠……跟住二人一齊走佬，跑跑跑，宿一宵，畀人搵到，仲上埋床……劉心悠原來係黃河話事人嘅老婆，亦係黃河某元老（已故）嘅親生女、一眾元老（未死）嘅契女。即係，佢既係人哋嘅妻子、亦係人哋個女，本身不沾任何社團活動。黃河話事人肯娶劉心悠，主要原因係娶咗佢先有得做話事人（傳男不傳女）。
二人行埋嘅事東窗事發，即使唔中意劉心悠都好，黃河話事人戴綠帽，面子盡失，奸夫仲要係對面字頭，之前又畀長江屈佢殺人，即下格殺領，一定要殺死個奸夫劉燁；而長江話事人知道自己手下搞人哋個女，好嬲之餘，亦要以牙還牙。佢首先叫劉燁殺死劉心悠（人哋個女同老婆）以作報復，劉燁拒絕，被視為二五仔；於是長江話事人派人殺雙劉。兩派社團同時派人殺佢，於是劉燁同劉心悠就經歷江湖大走難，中間梗係有兩派人士相助。再上演一幕三方打鬥（黃河、長江、劉燁一派），最後瘋狂撞車收場－嗱，我連黃精甫呢個經典戲碼都保留埋。
最後，眾人先發覺一切都係長江同黃河各自嘅高層所布嘅詭計，仲要係猶太人嚟。佢哋為咗等兩派狗咬狗骨，就設計等黃河嘅手下去殺人妻女，連劉心悠喺暗殺地點出現都係計劃之一。個故事係要串鳩啲黑社會（同好多人），對人哋就成日滿口道義，自己又成日搬龍門；另外，利益／錢唔能夠令佢哋互相摧毀對方，因為最終仲可以有得埋枱傾數，但面子呀、傳統、綠帽呀、道義呀呢啲無得量化嘅嘢，無數好傾，一唔啱就打打殺殺。於是猶太人就用呢條橋收搭兩個社團，最好加入呢兩個高層以前嘅女友／老婆都係畀黑社會害過，於是即使犧牲人哋妻女都唔會理會－咪講咗主旨定為 「禍不及妻女」囉。
人類就係咁仆街嫁咧。
────────────────── 【港產爛片系列】 －You know nothing,《吳清源》https://goo.gl/ZzD7Lo －《80分鐘好戲：殺人犯》 https://goo.gl/DQigtM －《畫蛇添足：兇手還未睡》 https://goo.gl/ySBCih －《穿屎主演，必屬爛片：見習黑玫瑰》 https://goo.gl/FxTfvk －《神龍賭聖之旗開得勝》 https://goo.gl/qOj5UK －《內衣少女》 https://goo.gl/3FNXgN －《我阿媽發仔瘟》 https://goo.gl/JG2i49 －《王老吉、OSIM特約：女人本色》 https://goo.gl/DnbXJA －《阿嫂》 https://goo.gl/cI7kHo （舊版本） －《遠離寒戰，冚家保平安》 https://goo.gl/MT5RSE －［非爛片］《導火新聞線電影版之深宵問答》 https://goo.gl/WwQYfU ──────────────────
歡迎大家加入 Medium，follow史兄： https://medium.com/@relgitsjg
Facebook page：https://www.facebook.com/Relgitsjg IG (主要用嚟睇女仔) : https://www.instagram.com/iamuncleshit/