《屌那媽亞星》
正式戲名《喜馬拉亞星》 年份：2005年 導演：韋家輝 編劇：韋家輝、歐健兒 演員：鄭中基、應采兒、吳鎮宇、劉青雲、張栢芝（客串）
───
劇情簡介
在中國和印度邊境喜馬拉雅山成長的亞星（鄭中基飾）是印度瑜伽高手，成年之後，他的父母叫他下山去印度瑜伽城參加瑜伽大賽，在印度，他遇到了大家姐（應采兒飾），大家姐算計瑜伽大王的女兒印度西施，決心讓她娶個壞男人，於是聯合三大惡人（成奎安、李兆基、黃光亮飾）一起來教壞亞星。
香港人驚青舅父（劉青雲飾）和兩個外甥（徐天佑、黃又南飾）跟著旅行團到印度遊山玩水，同時和他們一起的還有一個大膽叔叔（吳鎮宇飾），他們後來喝下印度神油，忘記了自己的身份，於是開始尋找自己到底是誰的旅程。
後來，亞星、驚青舅父及大膽叔叔因各自的原因，來到瑜伽城參加瑜伽大賽。
最終，亞星在冥想中成為新一任的梵天守護者，並永遠都不會醒來。可是梵天睜開了眼睛，世界一片混濁，然後返回到石器時代，世界重新開始……
───
兩年前開始寫爛片系列，一直想睇呢套《喜馬拉亞星》，皆因朋友對呢套戲嘅評價兩極，有啲話垃圾，有啲話有哲學味道。大部份嘅爛片，評語通常一面倒……
前排終於睇咗。
我睇晒《神龍賭聖之旗開得勝》、《阿嫂》、《女人本色》呢堆頂級爛片，以為自己訓練出驚人忍耐力，點知睇完《喜馬拉亞星》，唔識落筆，心情久久未能平伏。
寫篇爛片嘅文，先睇套戲一次，拎咗大方向，起個大綱，再揀片段嚟睇，加入細節同例子加強說服力，一般要睇套戲兩三次。至於《喜馬拉亞星》，我睇完第一次，怕咗呢套戲，唔敢再睇。拖拉咗一個月，為咗寫文先忍痛忍悶忍屎忍尿再開嚟睇，每次睇五至十分鐘就要熄機。
真係頂唔撚住，呢套嘢超級垃圾。
《喜馬拉亞星》垃圾到一個點，台前幕後食撚咗大麻咁款，完全唔知拍乜，只務求畫面上有演員喺度郁吓同講嘢，畫面夠幾十分鐘，完場，收工！
《神龍賭聖之旗開得勝》可謂1990年代最粗製濫造嘅賀歲片，劇情狗屁不通，製作求其；《喜馬拉亞星》肯定係2000年代垃圾賀歲片（無錯！又係賀歲片！）嘅代表作，劇情徹底無頭無尾，最慘係犯咗爛片第一天條：
夾硬塞啲哲學、懶有深度嘅嘢落劇情度。
一套電影，可以留白、交代好多哲學問題畀觀眾去思考，前題係故事合理，又配合到要講嘅道理──否則觀眾可以直接買哲學書睇。王家衛嘅《一代宗師》，有啲人套落去講中國人劣根性、有人講中港矛盾，前題係表面上大家睇得明個故事，再搵到劇情同對白畀你咁去解讀；《大隻佬》之所以經典，因為故事好睇，亦緊扣到要講嘅道理（「因、果」）──該燴，韋家輝同杜琪峰聯合執導《大隻佬》，做埋編劇，叫好叫座；韋家輝自己監、導、編嘅《喜馬拉亞星》、《最愛女人購物狂》，簡直災難中嘅災難。
《喜馬拉亞星》啲哲學道理根本唔入流，本身無稽（開始又係終結、終結又係開始，做乜鳩？）、又同本身劇情無關，無端端喺最尾十分鐘閃出嚟，完全係眼低手更低嘅作品。
至於劇情，我有個好簡單嘅劇情問題：
點解應采兒所飾演嘅大家姐咁憎西施？
應采兒憎西施，乃套戲嘅劇情骨幹。若非應采兒咁憎西施，佢唔會訓練一個人嚟令西施娶個壞男人；無呢樣嘢，佢唔會遇上鄭中基，最後搞出咁多嘢。豈料劇中應采兒只交代一句：
「佢靚過我！」
都唔好提戲中個西施只係靚少少嘅印度人。如果應采兒單單因為對方靚過佢，就要花咁大氣力去訓練一個壞人，再搵佢娶西施，呢種理由欠缺說服力，其實根本弱智。「一個饅頭引發的血案」固然戇鳩，但因果關係尚算合乎邏輯；但簡單以一句「佢靚過我！」交代劇情主線，完全唔入流。
好咧，假設應采兒真係咁憎西施，後嚟佢喺瑜伽城見到西施，仇人見面份外眼紅，點都要加插一段去暗殺呀、屌柒佢呀、嗌交呀。點知成段戲彷彿無咗憎佢件事，提都無提過。咁即係點？係導演唔記得，定係應采兒根本唔憎西施？
───
然後！套戲每隔五分鐘就有一個熄機、界櫈位，務求令你屌佢老母屌到完場為止：
‧1–5分鐘：天人合一有乜含意？呢五分鐘戲，鄭中基一人分飾父母子，已經足夠令我熄機三次。
‧10分鐘：鄭中基睇VCD扮印度賭神，但隻碟花咗不斷重複，佢跟住就喺現實度不斷重複同嗰個「五條煙」嘅動作，一．啲．都．唔．好．笑。喺韋家輝嗰套《最愛女人購物狂》，亦有重複一啲唔好笑嘅畫面（徐小鳳無撚端端狂打電話叫陳小春同劉青雲走嚟走去）。
‧16分鐘：旅行團鳩行，當中充滿歧視印度人嘅劇情。
‧20分鐘：吳鎮宇無厘頭搶鳩人哋張相，根住鬼上身以為自己變咗個印度人。
‧25分鐘劉青雲同大象打交（幻覺嚟；真人未婚夫；但張栢芝本身都係幻覺……邊樣先真？媽呀我好亂！）
‧40分鐘無端端扮Kill Bill同Indiana Jones，跟住喺度追逐、跳嚟跳去。
‧48分鐘，吳鎮宇瞓醒變咗日本黑社會。
‧54分鐘，劉青雲同西施不斷跳舞。
‧60分鐘，吳鎮宇無端端變身，成為乜嘢師兄，要娶印度西施。
‧72分鐘，碌落山嗰度。有朋友話成套戲最難頂係呢部份。我唔知，我淨係知成套戲都好難頂。
《阿嫂》難頂，但你要去到最後撞車嗰幕先想爆粗熄機；《喜馬拉亞星》屈到極致，由第一分鐘就想令人離場。你終於捱到最後，點知又塞啲哲學嘢結尾，乜嘢開始即係終結、終結即係開始。做乜嘢啫？成套戲根本同呢個主旨無關，只係導演同編劇喺最後十分鐘夾硬作出嚟。
不斷重複嘅賭神之外，有一幕更加離譜：話說劉青雲想問印度人自己跟嗰個「旅行團」返到酒店未，用咗呢三個肢體動作：
「旅」：「女」士同「旅」行同音。劉青雲扮女人，然後扮有好大嘅胸。
「行」：劉青雲喺度行嚟行去……
「團」：劉青雲翹起個屎忽，指住個「臀」部……
佢用廣東話表達嘅「女」「行」「臀」，令印度人明白佢講乜，講咗答案畀佢知…..
睇到呢部份都未離場嘅人，擁有頂級忍耐力。
───
《喜馬拉亞星》連基本故事都冇，劇情跳躍胡鬧，毫不合理，欠缺邏輯，演員演出作狀，尤如一班小丑獻技。九流特技、不斷歧視印度人嘅畫面已變得非常次要。
《喜馬拉亞星》完場上字幕時，我心中居然不存忿怒，只有無限悲哀：韋家輝係咪爭印度十幾億債、有人挾持佢老婆仔女，逼佢寫個咁嘅劇本拍套咁嘅戲？然後眾演員為朋友，捱義氣幫朋友接套咁嘅垃圾？尤其吳鎮宇嘅角色與性格不斷改變，每一幕都無端改變身份，由團友變他人舅父變殺人犯變日本黑社會變師弟，毫無先兆，正常人點會演套咁嘅戲？一個觀眾，點估到鄭中基、應采兒、吳鎮宇、劉青雲、張栢芝搭韋家輝，居然會睇到套咁嘅驚世鉅作？
我曾寫《阿嫂》係港產爛片第一名，今日終於改朝換代，
《喜馬拉亞星》係港產片史上第一號爛片。
養份時間：如何改寫《喜馬拉亞星》
既然《喜馬拉亞星》咁撚中意「開始即係終結、終結即係開始」，索性將成個劇本以此為主旨。
主角鄭吳劉三人為三兄弟，連同愛人應采兒同路人張栢芝一齊參加旅行團。導遊喺車度教大家冥想，點知司機都冥埋一份，中途撞車後失散，之後各人喺印度有不同遭遇：
劉青雲：眾人大哥，本身膽小，唔敢試新嘢。但喺瑜伽城見到西施，受佢感化居然走去學瑜伽，更中埋瑜伽癮不能自拔；
吳鎮宇：二哥。原本對應采兒用情專一，見到西施後移情別戀；
鄭中基：本身人品極純，但入瑜伽城後為二哥找尋西施期間，遇上賭檔，最後沉迷賭海。
雖然三個人都畀西施「害」，但西施本身係一個好人，只係咁啱得咁橋、機緣巧合令所有嘢都同西施有關。
擾攘一輪，最後由三人嘅世侄Shine拎咗印度神油拯救大家，暗啞底畀大家飲，令大家忘記呢幾日發生嘅黑暗史，重回正軌。
原來，呢啲只係眾人嘅南柯一夢，只係冥想令大家同時入夢，車根本無撞到。眾人坐車嘅目的地，啱啱好就係印度瑜伽城……
寫得好流？係，因為要有印度嘅背景，真係好難。呢個改寫，拍出嚟都一樣咁胡鬧，起碼有劇情。
重申，《喜馬拉亞星》係港產片史上第一號爛片。 ──────────────────
【港產爛片系列】 －《港產爛片終身成就奬頒奬典禮》https://goo.gl/qLA64j －《港產爛片終身成就奬頒奬典禮》（大結局）https://goo.gl/nMN7FJ －《我老婆（居然）係明星》https://goo.gl/8yXbRN －《男兒當入樽》－唔係櫻木流川嗰套https://goo.gl/SebZHP －You know nothing,《吳清源》https://goo.gl/ZzD7Lo －《80分鐘好戲：殺人犯》 https://goo.gl/DQigtM －《畫蛇添足：兇手還未睡》 https://goo.gl/ySBCih －《穿屎主演，必屬爛片：見習黑玫瑰》 https://goo.gl/FxTfvk －《神龍賭聖之旗開得勝》 https://goo.gl/qOj5UK －《內衣少女》 https://goo.gl/3FNXgN －《我阿媽發仔瘟》 https://goo.gl/JG2i49 －《王老吉、OSIM特約：女人本色》 https://goo.gl/DnbXJA －《阿嫂》 https://goo.gl/cI7kHo －《遠離寒戰，冚家保平安》 https://goo.gl/MT5RSE －［非爛片］《導火新聞線電影版之深宵問答》https://goo.gl/WwQYfU
加入 Medium，follow史兄： https://medium.com/@relgitsjg
Facebook page：https://www.facebook.com/Relgitsjg IG (主要用嚟睇女仔) : https://www.instagram.com/iamuncleshit/
