《我老婆（居然）係明星》

之前重新編輯《阿嫂》篇文，完全係為舖路寫呢套《我老婆係明星》。

───

年份：2016年 導演：翁秀蘭 編劇：陳卓賢 演員：劉心悠、周柏豪、林德信、蔡潔

───

劇情簡介

臨記朱淇(劉心悠)於影圈浮沉多年，一次意外竟被電影公司老闆Jeff(林德信飾)睇中，榮升賀歲片女主角。朱淇為了星途，決意隱瞞已婚身份！忽然「被單身」的娛記老公賴毛(周柏豪)為幫老婆圓夢，只好事事配合。

隨著朱淇人氣急升，二人關係日漸疏離，賴毛只好潛入劇組監視老婆，卻竟發現朱淇與Jeff有曖昧關係！兩公婆因而吵大鑊……此時，娛圈再爆出朱淇已婚消息，雜誌老總誓要賴毛查出內幕！在事業與愛情的角力下，恩愛夫妻各自為了上位，究竟可以將愛情踩到幾低？

───

呢幾年純港產片作品少之有少。要搵一套只用香港演員、香港製作（編劇加導演）、喺香港拍攝嘅戲，比天山雪蓮更加稀有；就算有，故事同題材都趨向保守（例如拍續集如《志明與春嬌》系列……前排連《陰陽路》系列都搬埋出嚟拍），或用上大牌明星（如寒戰系列），保證有一定票房。喺咁嘅背景下，居然有內地資金肯畀錢拍《我老婆係明星》呢套港產片，真係非常神奇。諗真啲，呢套戲，只由兩個暫時仲未有代表作嘅兩個三線明星孭飛、加上故事大綱劇本對白到演員表現清一色反智，唔係大陸錢多得滯，邊有人肯畀錢拍？

入正題之前，想講講一段非常幽默嘅劇情：話說喺套戲裏面演電影公司老闆嘅林德信，要拍套「賀歲片」《二零四七》，劉心悠就係靠呢個機會做女主角。《二零四七》嘅細節背景如下：

(1) 大製作，成本八千萬 (2) 電影公司搵新人擔正做女主角（劉心悠） (3) 公司最紅嘅女星反而係配角 (4) 鬼才做導演 (5) 老闆想溝個女主角

嘩，屌你個仆街！呢套「賀歲片」，分明就係《阿嫂》

(1) 當年星皓娛樂集合幾個影帝同好戲之人（曾志偉黃秋生任達華劉燁元華方中信等），拍咗《阿嫂》呢套高成本製作（淨係海報都$2,000一張） (2) 當時演《阿嫂》女主角嘅，正正係新人劉心悠 (3) 女配角係林嘉欣－佢係當時嘅星皓一姐，喺《阿嫂》居然要做大配角去襯托劉心悠 (4) 鬼才導演，屌你仲唔係黃精甫？（註） (5) 嗰陣傳過星皓娛樂嘅王海峰一直想溝劉心悠。

(1)-(5)全中，100%，林德信要拍嘅，唔係《二零四七》，而係《阿嫂》。一諗到兩套戲有呢種偶然嘅關連，我覺得好有喜感、好歡樂……點知呢套以拍攝《阿嫂》為故事主線嘅《我老婆係明星》，一樣咁爛；更有過之而無不及嘅，就係《我老婆係明星》情節弱能，對白反智，選角失敗，令觀眾每秒都處於水深火熱，千刀萬剮，無間地獄，看畢心情久久未能平伏。

───

情節弱能，對白反智

戲中弱智劇情，俯拾皆是，幾乎每幕都違反常理。當中最離譜嘅係，劉心悠要扮單身，偏偏仲同老公周柏豪住喺同一個單位。嘩，大佬呀！你扮死都要忍住度氣唔呼吸呀嘛？

然後籌備開拍《二零四七》，又出現一堆不合情理嘅劇情：林德信無端端喺片場見到劉心悠呢個茄喱啡，二話不說就揀咗佢做女主角，無做背景審查，無考驗佢嘅演技（有一場劉心悠supposed 要扮好惡但完全唔合格），無同團隊交流過，開記招前無講邊個有份做、開拍事前冇見過導演，彷彿係喺開記招嗰一刻，老闆先臨時爆肚話要劉心悠做女主角一樣。拍呢套戲班人係咪無拍過戲？

有關片場同明星嘅橋段，再次超現實：居然有大明星行埋去啲娛記度，好主動咁幫班娛記簽名，仲要簽喺件T-shirt度。然後個娛記仲要因為有簽名而表現得好開心好興奮。屌你！！！呢個世界係明星買娛記怕，大部份娛記唔稀罕明星嘅簽名。劇中呢個女明星扮路人甲，企喺度扮人哋fans，而周圍一班人都睇唔出原來佢係大明星！

周柏豪作為一個記者，居然喺片場大模斯樣玩攝錄車、航拍，由如進入無人之境……有冇咁兒嬉呀？

歸根究底，《我老婆係明星》主線嘅兩個基本設定有嚴重矛盾，無可能共存：

第一，劉心悠係實力派，好中意演戲，不過一直冇機會；

第二，林德信要求佢為單身，唔畀拍拖。故事無交代點解，我估係以保偶像派嘅光環。

如果劉心悠係憑好戲而獲得林德信嘅賞識，則要佢單身根本多餘，實力派何需假扮單身以滿足男fans遐想？你睇下栢芝？如果劉心悠係行偶像派，單憑姿色而獲林德信垂涎（所以要求單身係合理），戲中不斷重申佢有努力、有實力係一個虛浮嘅設定。

套戲嘅基本設定就有矛盾，無可能有說服力。

再講，如果劉心悠做咗女主角，第一件事周柏豪就索性食軟飯算啦！辭工索性去做戰地記者，仲做乜春狗仔隊？痴線。

一路走落去，套戲究竟係要拍一套愛情片、劇情片（影視圈黑暗史）定係笑片？周柏豪劉心悠毫無火花，劇情狗屁不通，整套戲欠缺笑位，悶場再悶場。周星馳嘅《行運一條龍》，陳曉東同舒淇分別屬演狗仔隊同有錢女嘅故事，拍得更加合理同順暢。

───

選角失敗

套戲三個主角，周柏豪、劉心悠、林信德，三個都交唔到戲。

男主角周柏豪，之前睇《太爆太子太空艙》，已經驚訝一個演員連傷心嘅樣都表達唔到－佢發現心愛嘅女友劈腿，應該好傷心，偏偏佢用以下嘅樣去表達佢傷心嘅情感：

嘩，真係好撚傷心。

新嘅《太爆太子太空艙》表現尚如此不滯，我對周柏豪喺早年拍嘅《我老婆係明星》亦冇期望。事實上，周柏豪喺《我老婆係明星》，動作生硬，表情木獨，成日好似未瞓醒。周柏豪本身咁型、咁cool、咁靚仔，你要佢去演啲受屈委，無出頭嘅角色，實在強人所難。佢演出失敗，並不意外，屬非戰之罪。相反，若果搵一個平庸嘅明星，例如偽毒人坤哥做周柏豪嘅角色，甚至普通一個毒撚肥仔，伙拍劉心悠，咁就真正係賴蝦毛想食天鵝肉。

正所謂「沒有最屎，只有更屎」，劉心悠喺《我老婆居然係明星》嘅表現，更差更恐怖。劉表現作狀，喊係嗰個表情、嬲又係同一個表情，要佢扮一個有演技嘅人，說服力係負數；有時望見佢模稜兩可、似笑非笑嘅表情，夾雜唔咸唔淡嘅廣東話，居然令我諗起鄭則士嘅經典角色肥貓，慘不忍賭。劉加入影圈已經10年，演戲嘅能力每况愈下，而家嘅佢比起出道作《阿嫂》更差。

劉心悠所飾嘅朱淇，本應係個做戲好叻但冇機會發揮，之後憑演技遇上林信德先發到圍嘅演員；偏偏劉心悠嘅戲超級渣－佢對林信德發難渣嗰場戲，講對白無力、表情誇張、動作浮誇，發惡變咗發笑。朱淇有實力就變成空中樓閣，上到位只係因為靚、老闆冧佢，同自身實力完全無關，呢套戲應改名《我老婆居然係明星》。

至於林德信，角色所限，面目性格模糊，存在感低落，等同路人甲；電影中佢係個非常不稱嘅電影公司老闆：畀個導演滾、求其搵條女做女主角、畀條女過一楝、溝唔到女嘅可憐虫。講廣東話對白，硬係好似熱線電話嗰把電腦聲咁生硬……

呢啲中低成本製作，通常都有一兩個出色嘅綠葉支撐大局（你可以想像《低俗喜劇》無邵音音嗎？如果《新紥師姐》無咗方中sir同wyman，肯定失色不少）。《我老婆係明星》配角，只有周柏豪嘅老總蔣志光。老總角色前後矛盾，一時滿口道德、一時滿口廢話，連帶演員蔣志光都無可發揮。

《我老婆係明星》劇情胡鬧兒嬉，誇張失真，橋段不合理，比起無線8點鐘處境劇更加離地同不知所謂。綜觀全劇上上下下，左左右右(再加B+A start)，由編劇導演到演員，無一不胡鬧。

如此劣質嘅電影，拎去戲院播，尤如電影界嘅咖啡機兄弟，只為欺騙觀眾。

養份時間：如何改寫《我老婆係明星》

既然劉心悠啲戲咁爛，我就索性將錯就錯，拍一套佢發春秋明星大夢嘅戲。背景同樣係劉心悠做咗好耐茄喱啡（外形有咁醜得咁醜），但佢無自知之明，成日恨做女主角。你又唔好理，雖然做茄喱啡收入卑微，但老公周柏豪死鬼老竇老母剩落好多身家同資產，兩條友可以繼續打風流工，一個做茄喱啡，一個做記者，「為夢想奮鬥」。

至於林德信嘅電影公司，年來經營不善，急需一大筆資金周轉，否則破產收場。為咗絕地翻身，諗住充大頭鬼拍套賀歲片。有次無意發現旗下嘅女演員劉心悠居然住喺九龍塘豪宅，搵私家偵探查，發現劉周二人乃不事生產嘅二世祖，於是利用劉發明星夢嘅心態，設下陷阱。

林借口賞識劉，邀請佢做女主角，並喺合約上寫明如非單身，要賠上鉅額金錢。劉心悠恨出名恨到癲咗，不假思索就簽咗約。為實行呃錢大計，林利用女人嘅妒忌心，唔覺意向旗下前首席女星透露劉有老公，並誘導個女星去過料畀相熟媒體老總（即係周柏豪做嗰間周刊嘅蔣志光）去查。

拍戲途中，林同劉相處耐咗，日久生情，仲上埋床（大量床戲）。可惜債主臨門，林放低兒女私情，主動叫蔣志光去查周柏豪。報導出街，劉以為周為上位而出賣自己，二人分開，劉主動投入林懷抱，仲上埋床（重覆：大量床戲！）。

林食完劉之後，開始表現出惡毒嘅一面。某日佢搵律師出嚟，要求劉賠錢，當面話佢啲戲屎到仆街，由頭到尾只係睇錢份上先捧佢。劉先發現呢個天仙局，差人錢、畀人食咗，又冇埋個老公，萬念俱灰，打算尋死之際，周出現並抵押資產，幫劉賠錢。之後劉主演嘅電影上畫，二人作為小市民入場觀賞，彷彿發咗一場夢。Back to basic，還是覺得你最好。

講到尾，點解周會突然出現？咪又係林暗中通風報信，佢要嘅係錢，唔係劉條命。不過，劉拍嗰套戲上畫仆直，林依然破產收場。

套戲主旨係想串鳩啲人：發明星夢無咁撚早呀！

（中途加插一個邵音音，同佢講啲拍戲做人道理，咁就very good）

──────────────────

【港產爛片系列】 －《男兒當入樽》－唔係櫻木流川嗰套https://goo.gl/SebZHP －You know nothing,《吳清源》https://goo.gl/ZzD7Lo －《80分鐘好戲：殺人犯》 https://goo.gl/DQigtM －《畫蛇添足：兇手還未睡》 https://goo.gl/ySBCih －《穿屎主演，必屬爛片：見習黑玫瑰》 https://goo.gl/FxTfvk －《神龍賭聖之旗開得勝》 https://goo.gl/qOj5UK －《內衣少女》 https://goo.gl/3FNXgN －《我阿媽發仔瘟》 https://goo.gl/JG2i49 －《王老吉、OSIM特約：女人本色》 https://goo.gl/DnbXJA －《阿嫂》 https://goo.gl/cI7kHo －《遠離寒戰，冚家保平安》 https://goo.gl/MT5RSE －［非爛片］《導火新聞線電影版之深宵問答》 https://goo.gl/WwQYfU

──────────────────

歡迎大家加入 Medium，follow史兄： https://medium.com/@relgitsjgFacebook : Facebook page：https://www.facebook.com/Relgitsjg IG (主要用嚟睇女仔) : https://www.instagram.com/iamuncleshit/

註：

我知，我知，其實戲中嘅鬼才係影射王家衞－角色叫家偉仲要帶眼超（當然連戲名都影射王大導套2046）。