《你愛我甚麼？》

幾乎每個前度都問過我呢條問題。

呢條問題屬於「女人成日會問男人、但男人又永遠唔識答嘅十條題目」嘅其中一條。難答到……諗下諗下都係同佢哋分手算，於是佢哋變晒我嘅前度。

假設高考考試二選一：

一題係「回答女友：『你中意我啲乜？』」；

另一題係「提出切實而又可行的方法解決全球暖化」──其實即係冇，因為有切實又可行方法嘅話，邊春度仲有地球暖化。

面對咁困難嘅選擇，我仍然會揀全球暖化嗰題。

『你中意我啲乜？』呢條問題點樣難法呢？難在我一直都唔係因為對方嘅某一兩樣嘢，甚至乎係某一二十樣嘢而中意對方。當然，我亦冇深入研究中意嗰個人，究竟中意佢乜嘢。

性格？樣靚？身材好？讀書叻？有錢？心哋好？政治取態接近？呢啲嘢通通有關，但你問我中意你邊一樣嘢，我唔識揀。如果要回顧我過去八九個女友（數唔清）嘅共通點，萬綠叢中兩點紅：(1)全部係女人，(2)同我一齊嗰都留過短頭髮……偏偏我唔中意短頭髮嘅女仔，哈哈哈哈哈。死未？

中意一個人，愛一個人，要愛晒佢整個人，成個「package」（套裝）咁愛。要用洋文「package」呢個字，講到對方好似一件貨咁，搞到好難聽。無錯，呢個的確有啲香港女士評價大劉個仔（劉鳴煒）所用嘅字眼－佢「package」好。但兩者意義相去甚遠－大劉個仔package好，講穿咗咪即係錢、錢同好撚有錢之嘛，唔好呃自己啦。

我要求愛人要成個「package」（套裝）咁愛：愛上佢嘅好處，亦愛上佢嘅壞處。我愛一個人，從來唔會主動要求佢改變任何嘢－我愛你嘅全部。

唔通你話中意佢長頭髮，佢剪撚咗短髮，甚至乎係skin head，M字額，你就即刻唔中意佢？師兄，呢啲唔叫愛。唔通你中意佢樣靚，佢撞車毀咗容，你就好似當年林曉峰咁，呢頭話照顧佢一世、轉頭就劈腿？若你睇上佢波大學識水平高溫文儒雅入得廚房，但發覺佢用三個push-up bra只係中五未畢業粗口爛舌只識煮杯麵，即刻反臉不認人？

我唔係話樣靚波大好身材學識好有錢呢啲嘢唔重要，但一個人活著並非只係得對波或者一支粗壯勃起嘅陽具。我亦唔係話心地善良就大撚晒──老實講，若一個女生嘅優點只得「心地善良」，簡直同話董建華當特首嘅好處係刺激咗香港民主步伐一樣咁搞笑。我最喜愛嘅文章，殷海光〈人生的意義〉，就指出人生金字塔裏面，人要不斷向上追求，以達至真善美。對於我嚟講，自己喜歡、中意嘅人就係一整個金字塔，裏面係乜，好、壞、香、臭，係蘋果定西瓜，我全數接受。中意一個人唔係去Apple.com買部Mac機，可以要1024MB Ram，1TB Hardisk，25吋芒，再按一按Check-out就合晒心水。總之，佢好同唔好，都要中意晒。

成日問對方中意自己啲乜，根本當自己係一件貨。你中意某某牌字嘅家電，真係貪佢某種功能好用，或者夠平夠賤。談感情唔係咁。你係咪想我答，中意你其實係「因為你夠賤、夠容易追」？定係「因為你夠肥，扑嘢嗰陣坐喺我上面觀音坐蓮感覺正斗？」、「你夠醜樣，又唔化妝，我唔怕你搵過第二個？」又或者「你蠢到出汁，成日畀人呃，淨係我先咁好心唔呃你？」一條問題，將自己徹底物化，真夠犯賤。

你話：「女友只不過係隨口問，你答乜都得。」傻豬嚟，呢條問題同之前嗰十條一樣，暗藏無限殺機。試過無限次，隨口答，女友會繼續問落去；我越答越求其，佢越答越刁鑽。

「喂喂喂～～我想問你……你其實愛我甚麼。」

「我中意你夠純情，成個鄰家女孩咁款。」打緊機，我敷衍作答。女友總會喺你最想打機、最唔想理佢嗰陣問你問題。我冇說出口嘅係：無錯係鄰家女孩，係處女膜穿咗三十年、有時候抽煙講粗口（個別前度）、偶爾爛醉如泥嗰種鄰家女孩。

「點解你覺得我夠純情？」

＊＊「無得解喎，感覺嚟。」我已經感到一絲絲殺意浮面，只想盡快die down件事。

「咁究竟係我個樣、性格定係衣著令你覺得我純情？」

我心諗：「呢鑊含撚咧，一有選擇畀你揀，你揀乜都一定仆街。」

「你根本係一個純情嘅人，做乜都係純情。你呀！就算好似溫碧霞咁大叫屌我啦、屌我啦，都一樣純情。」我企圖以四兩撥千斤，亂引例子令佢分心。

「唔得！點解你覺得我純情？快啲講！」＊＊

repeat＊＊ 10次（chorus 歌詞重複）

「嗚嗚嗚！做乜咁惡喎～～人哋問下之嘛！你根本唔中意我～～」

或

「人哋問你都係關心你～～～咁以後唔關心囉～～」

首歌嘅結尾一定係咁。

次次都瀨嘢，唔知係因為我答嚟答去，都答唔中佢心目中嘅答案；定係我唔夠誠懇，佢唔信我。總之，唔同嘅女友，我試過唔同嘅答案。最後最快了結到件事嘅答案係：

「屌，我根本唔中意你，你中意我之嘛！」

信我。三秒後世界回復平靜。

純粹想令對方開心，梗係可以搵啲「理由」將自己嘅情感合理化，然後講啲口甜舌滑嘅嘢。一個普通嘅男人，只要拍過兩三次拖，畀人飛過傷害過，飛過人傷害過人，甜言蜜語假情假語呃呃氹氹並唔係太難。如果加上你生於一個母系家庭，全屋得你一個男人，你對於如何逗女人開心呢科，應該毫無難度拎5**（給老餅一輩嘅你：5**即係會考 / 高考嘅A）。

女人特別喜歡聽讚美嘅說話。你講乜都好，只要最後加多句：「要求其作啲原因氹你歡喜，好容易啫。不過我寧願用行動令你真真正正開心，唔係淨係得把口。」佢一定開心死。嘩~~~後面刮起呼呼北風~好凍呀~~~好骨痺呀~~~~~呢啲嘢，我十幾歲同第二初戀一齊就學咗返嚟，又有幾難？做得到，並不代表你要去做，啱唔啱？

已成為ex的女友們，你問我呢條（呢啲）問題，其實咪想我呃你？你哋問親啲問題都咁撚難，題題都係陷阱，正確答案根本唔存在，你係咪要迫死我先安落？

建議答案：每次前度問呢個問題，我會反問對方「你又中意我啲乜？」。綜合我拍過N次拖所得的調查，結果如下（選擇可多於一項）：

1. 你靚仔：100%（即所有人都有揀呢一項）。
2. 你超級靚仔：100%。再一次證明，事實勝於雄辯。
3. 床上功夫了得：120%。即係，連無同我拍過拖嘅人都咁認為。無辦法，我係男人。男人總喜歡吹噓自己點勁點勁，通常講就兇狠、做就碌撚。即使真相哪有勝過一仗？
4. 讀書叻：50%。強烈認為呢個原因極度無稽，皆因揀呢項嘅人都未同我一齊讀過書，更加唔知我原來讀過書。
5. 你勤力：100%。即係學期尾嗰陣，老師夾硬要讚一個學生，就寫佢勤力。兜個圈話佢無乜好成績出到嚟咁…
6. 似弱智人士：100%。睇嚟中意我嗰啲人一係愛心爆掤，一係心理有少少唔平衡，喜歡長期照顧弱勢社群。

以上嘅答案亦說明點解我唔buy呢一套嘢。有乜理由連我高大威猛都冇？

講得出中意對方的整體，我好少要求對方改變一些所謂「惡習」。你食煙咪食煙，愛喪拼便喪拼，懶瞓咪懶瞓，粗口咪粗口。倒轉來說，我都好少做啲乜嘢嚟取悅對方。我只係覺得，既然愛，就唔好成日嘈話佢呢樣唔好、嗰樣做得差。

有人會話，愛係包容多一點、恒久忍耐。其實唔係「包容」、「忍耐」，因為「包容」係假定咗某一啲嘢係「壞事」。吳彥祖會唔會叫你「包容」佢咁靚仔？周秀娜會叫你「忍耐」佢身材咁好咩？只有強國人嘅惡行，大家先要包容。學習愛對方的所有，接受對方的一切，互相體諒……

再講落去變成乜鬼嘢傳道劇場，總之愛是含鳩很耐……唔知幾時開始，我識條件反射答呢個答案：

「你乜嘢我都中意。」

我係認真嘅。呢個答案，比其他答案更加有效。

又，諗真啲，可能每個前度都只不過係問：

「你愛我？甚麼？」

用我嘅言語講，即係：

「你愛我？唔撚係呀嘛？」

【自己廣告：有錢派，有錢派！】

「Medium付費會員回贈計劃」（加強版）https://readmedium.com/mediumrebate2-6af1d8313dc1

歡迎大家加入 Medium，follow史兄： https://medium.com/@relgitsjg

Facebook page：https://www.facebook.com/Relgitsjg IG (主要用嚟睇女仔) : https://www.instagram.com/iamuncleshit/