《女人成日會問、但男人永遠唔識回答嘅十條題目》
女人好中意問男人問題。
你可以做個小小統計，試下對住女友一整日，睇下佢問咗你幾多個問題，十個八個走唔甩。又或者返屋企同阿爸阿媽同枱食飯，計下阿媽、阿爸分別問咗幾多個問題，阿爸分分鐘連嘢都無講過一句。
我唔知點解女人咁中意問問題。而我阿媽作為高智慧女人，問嘅問題，係我呢世都畀唔到令佢滿意嘅答案：
「你幾時結婚？」
佢試過連續一個月，每次見面都問我同樣問題。最後，我終於忍唔住答佢：
「阿媽！你估去黃大仙求簽，次次唔同咩？ 有啲問題，唔係你問多幾次就有唔同嘅答案㗎！！」
Bingo！自此之後，阿媽冇再問我幾時結婚。
不過，阿媽就話一星期見一兩次，女友一星期得一兩日見唔到。女友問嘅問題，數量更多，無聊度更高。水平大概等同同樓下管理員見你拎住個飯盒，仲問你「買飯盒呀陳生？」一樣咁有意義。看更你可以敷衍佢話「係呀」，你答錯女友嘅問題一句，有排你受。地雷處處是，春風吹又生。
救人一命，造福世人。我喺度綜合返歷年嚟自己遇過 / 聽過，女人成日會問、但男人永遠唔識回答嘅十條題目，並提供建議答案。
問題1. 「阿媽同我跌落水你會救邊個先？」
好多人以為呢條問題只係都市傳說，淨係喺幻想同創作橋段出現。現實係，港女女友真係問過我。
不過，隨之而嚟嘅係另一堆問題。
第一，港女自己識游水；
第二，我唔識游水。
所以呢條問題嘅前設根本唔成立。
所以，史兄（留意，我21歲，金槍不倒之年）嘅回答係：「你哋兩個跌落水救邊個先？我遇溺金章㗎。
你哋懂得游水嘅，識浮； 我呢啲唔曉游嘅，識沉。
跳埋落嚟，咪盞一鑊熟，三個人一齊瓜老襯……」
港女：「如果之嘛。快啲答，如果你識游水，你會救我定救阿媽先。」
史兄：「挑！既然係如果，咁你不如話如果我識飛啦，一次過救晒兩個~~好嘢~~~~」
港女：「咁你飛嗰陣，會拉起邊個先？」
史兄（瞳孔放大）：「使唔使問得咁仔細呀？」
港女（輕蔑）：「咁你今晚扑唔扑嘢呀？」
史兄（果斷）：「救你先。」
港女：「不孝，人渣。」
史兄：「咁救阿媽先。」
港女：「一時一樣，牆頭草，垃圾。罰你今晚無嘢扑。」
史兄：「屌你啦八婆。」
港女：「你就想。無．愛．做．呀！」
之後佢咪又係求我扑佢。挑！
經我多年思考，建議答案如下：
「我識唔識游水都好，兩個都唔救。救任何一個，我都會因為救唔到另一個，而內疚一世。我寧願跳落嚟，同兩個親密嘅人一齊浸死。
未能同年同月生，只求同年同月死。
正所謂：
『一起森巴舞，撥走不滿』。」
問題2. 「呢件衫好唔好睇？」
詳見〈男人的地獄〉。
基本上，你只可以扮誠懇咁答「呢件衫好好睇」。重點唔係件衫好唔好睇（因為你根本唔識得分），而係態度要夠誠懇。訓練多啲，從錯誤中學習就會有一技之長。只要女人嘅基因無發生突變，三五十年依然會咁中意買衫，大把機會畀你練習。買乜機物機，豆漿機榨汁機吸塵機好，由得佢買。
問題3. 「我買呢個手袋定嗰個好啲？」
驟眼睇，呢條題目同上條一樣。實質暗藏更巨大殺機。
我仲記得十年前喺東京銀座嘅東急百貨，畀史高治問兩個Agnes C嘅手袋，應該買邊個。嗰陣自己二流分析員上身，幫佢詳盡解釋，做fundamental analysis（價值分析）及peer review（同行比較），講咗一堆自己唔明、亦唔相信嘅垃圾，為求佢揀好一個碌咗卡畀錢就走人。
結果，一個鐘頭 / 六十分鐘 / 三千六百秒過去，女友仲未決定到買邊個。我大發脾氣，奪門而出。喺門口食咗五六支煙，先平伏到情緒。
返入去百貨公司，女友已經買晒兩個袋。
自此之後，我唔再做傻事，走去分析女人講出嚟嘅建議。你讚甲手袋好，佢就會講乙手袋有乜好處（例如佢無呢個顏色嘅袋，個袋嘅間格好好。唔知以為佢睇緊樓）；你話乙手袋正，佢就會講甲手袋優點係乜。
萬世輪迴，千秋不滅。
喺度我話畀你聽你唯一嘅救贖：「你傻㗎咩？兩個都咁靚、咁襯你，點忍心揀得落手？我係你就揀唔落手，全部都買晒佢！！不過你畀錢！」最後嗰句梗係要有咁細聲得咁細聲。
問題4. 「我今日有乜嘢唔同？」
大佬之一。
遇到呢條問題，我勸你算鳩數，唔好戇鳩地嘗試去搵佢有乜嘢唔同。第一，你搵唔到；第二，你搵唔到；第三，你真係搵唔到。佢嗰啲所謂唔同，係即使佢講埋答案畀你知，你都唔會驗證到真假，只會得一個反應：
「吓？乜有唔同咩？」
例如，佢話啱啱剪咗半吋頭髮（1.25cm，大概等同三行文字嘅高度），邊個可以驗證到？係咪佢個髮型師剪嗰陣，拎住把間尺度？
又或者，佢今日換咗化妝品，眼影由深黑色，變咗淺黑色。我一直以為，黑色，就只有黑色，無分淺黑同深黑。深黑、淺黑有乜分別？咪又係黑色！直到畀港女女友教訓，原來eye shadow嘅黑色可以脫離現實客觀規限，有深黑同淺黑之分。
現實嘅PhotoHunt比打機難得多。經我多年思考，建議答案如下：
「你……瘦咗啲，小腿好似幼咗。」
總之，你讚佢瘦咗就得。身體邊個部位瘦咗都得──除咗個胸，因為連佢自己都知個胸細無可細。
我懷疑，香港嘅女仔中咗漫畫《火影忍者》裏面嘅幻術，唔使食迷幻藥睇嘢已經有幻覺。我識幾個女仔，即使淨返六十磅，Body-Mass Index (BMI)淨返12，仍然覺得自己好肥超肥。佢哋照鏡見到一副骷髏骨，竟然可以話對大髀好粗兼有小肚腩。
所以你讚佢瘦咗，補多句「睇嚟你節食有幫助喎」，肯定萬無一失。
順帶一提，千祈千祈千祈千祈千祈千祈千祈唔好懶叻走去話：「你今日靚咗。」
因為佢一定會話：
「你黐線！我不嬲都咁靚。」
到時就大撚鑊。
因為我以前領過嘢。無數次。
問題5. 「今晚我哋食日本嘢好唔好？」
唔會係韓國嘢、越南嘢、秦國嘢（唔係別字），一定係食日本嘢。香港人，尤其是女人，好中意食日本嘢。有個統計顯示，以人均計算，香港的日本食肆，是全世界第二多（第一是日本咧白痴）。（註1）
「好呀！我哋食『壽司大』。」
「巧開心呀，可以食壽司。不過『壽司大』唔係喺東京築地㗎咩，香港開咗分店？」
「唔係呀，我係講緊，我哋食壽司『大』嘅。」
「……」
千祈唔好學我呀，好似貓咁有九條命都唔夠死。
女友一話食日本嘢，你只得一個回應：
「好！」
唔好反建議，話去打邊爐食泰國嘢德國菜西餐。日本嘢等同古代皇帝嘅尚方寶劍，遇神殺神，遇佛殺佛。總之立刻去開飯喇搵地方食，記住，可以搵錢解決嘅問題，用錢解決佢。
問題6. 「你今晚去邊？」
解讀：「你今晚要陪我，咪使諗住可以同．班．豬．朋．狗．友．出．街．睇．波。」
若你厭世，認為自己已經太長命，可以嘗試以無比興奮嘅態度回答：
「哎呀，唔記得同你講，今晚車仔對利記，唔睇唔得㗎！！
我仲一早約咗〔填上邪惡軸心的男性名字1號〕、〔填上邪惡軸心的男性名字2號〕，成班男人一齊去〔遠離你女友家的地方〕happy hour、食晚飯、再睇波！
真係諗起都開心呀！」
如是者，了結自己生命，手到拿來。
珍惜生命嘅你，遠離殺戮，麻煩請回答：「無呀！原本約咗阿強佢哋睇，諗住睇曼城對利記，大戰喎。不過算咧，諗諗下都係陪你好啲。」
再擺擺尾，吠兩聲。
Good boy, Good dog. 同你班邪惡軸心講再見。
問題7. 「你有冇睇過AV？」
無論點違背宗教信仰、仁義道德、交通規則、滿天神佛，呢題你一定只可用100%肯定嘅語氣、理直氣壯咁回答：
「無！」
呢個大話一定要講。
信我。
────
「好污糟呀！」
好多女人對於男人睇AV，都有以上一句評語。
好多女人覺得AV女優嘅陰道，係男人都插得，所以好污糟。連帶佢哋覺得睇AV都係件好污糟嘅事。再推而廣之，佢哋以為男人睇AV，碌啫啫真係插咗落去女優個萬人塚咁。
如果係咁，就真係再污糟都唔怕咧！阿姐，我都知AV係假㗎、做戲嚟㗎咋！我係睇AV，唔係拍AV呀~~
你話睇過AV，你碌啫啫會變得同北京嘅空氣一樣咁污濁同污糟。每次，我重申，每次女友同你做愛，佢都諗起你睇AV時嗰個淫賤同污糟嘅樣（儘管佢根本無親眼見過）。然後會講：
「你好污糟呀！」
跟住完全失去咗行房嘅樂趣，變成死魚一條。除非你想同一舊厚切三文魚做愛，否則就只有一句「唉，好咧，我以後唔睇AV咧」，先可以拯救呢段關係。
戒AV？我聽過人成功戒煙、戒酒、戒賭、戒嫖，從來無聽過人嘗試同成功戒AV！戒到AV你可以直接去梵蒂岡封聖啦！
所以乜嘢戒睇鹹片，倒頭來咪又係一句大話！
既然都係講大話，一早講你冇睇過咪算囉，仲可以慳返中間好多麻煩。成熟啲，save some troubles, ok?跟我講一次：
「無！」
問題8. 「你有冇諗住結婚？」
建議答案一：「我聽日諗下有冇打算諗。」
建議答案二：「有！不過唔係同你。」
建議答案三：「我已經諗埋離婚㖭呀。」
真正答案：送本《婚姻這種邪教》畀佢。
問題9. 「你對我係咪認真嘅？」
大佬之二。
喺男人準備第一次插入，或準備射精時，女人就會問呢個問題。
「你對我係咪認真嘅？」
仆街，插入嗰陣問，唔通我摸摸個頭、恍然大悟，答你一句「呀～～對唔住呀～～～～我其實只係玩玩下」，然後抽返支陽具出嚟，著衫走人？香港有條法例，叫「企圖以虛假藉口促使非法性行為」。如果條例認真咁執行，成個香港拎嚟做監獄都唔夠困住啲男人。一百個男人，一百個都會答「我對你係認真㗎。」事後咪又係仆街一條，仲要個個都係積犯。（註2）
鏡頭一轉，當你同佢經常扑嘢，呢條問題就會好似感冒菌咁變種：
「你同我一齊，係咪為咗扑嘢？」
其實，我係為咗同你作出柏拉圖式精神兼靈魂上嘅交往而同你一齊，好唔好？
「何止為咗扑嘢，係淨係為咗扑嘢㖭呀！」
女人呀，你認真答佢，佢唔撚信嫁！你做好人，佢唔受溝嫁！你一定要有仆街得咁仆街，有咁負心漢得咁負心漢，咁佢先會信你，愛上你，認為你對佢真係認真。女人就係咁犯賤，唔係何來仆街磁石呢回事？
問題10. 「你諗緊乜？」
呢條係終極大佬。
加拿大楝篤笑表演家Russell Peters講過一段笑話，內容圍繞女人好中意問男人「你諗緊乜？」，而男人個腦往往係放空緊，冇諗任何嘢。
呢條問題，難就難在於：第一，男人根本無諗任何嘢；第二，誠實答「無諗任何嘢」，只會畀女人覺得你隱瞞。
於是，你求其答。
最大問題係，你答乜，女人一定會覺得唔滿意，一定會話「唔係嘅！你一定諗緊其他嘢。快啲講~~」
於是，你只可以好似梁振英咁，大話冚大話。之不過，無論點女人永遠都唔會滿意，直到……
(A) 你發脾氣，鬧交收場。
(B) 你放棄，誠實講你由頭到尾都冇諗任何嘢（跟住由上邊「呢條問題……」開始再重複無限次）。
(C’) 女人一哭二鬧三上吊，或者嬲咗你，甚至話你有嘢瞞住佢，你開始唔愛佢、你以前都唔係咁，再下刪九億字。
(D) 以上皆是。
呢條問題，沒有建議答案。
因為你女友問得呢條問題，已經表示佢個腦有問題。佢個腦有問題，問題就唔喺你度，你答乜都無用。
完了吧，如無意外。
祈禱吧。
唔係祈禱你無事……
……係祈禱你女友唔會問呢條問題。
問題11. 「你中意我啲乜？」
Ok，我讀過大學，知道得10條題目但而家數到11，但呢個欲罷不能。
呢條題目值得出一篇文，here we go:
－－－
【註】
1. 你唔係信有啲咁無聊嘅統計呀嘛？我吹㗎咋。不過，根據「開飯喇」嘅資料，2018年1月，本港約有2,700間日本菜餐廳，有5,450間中式餐廳，比例係1:2。喺香港，日本人對香港人嘅比例肯定遠低於1:2。日本餐廳比例咁高，證明香港人真係好撚中意食日本嘢。
2. 唔好講笑呀，男人會觸犯「以虛假藉口促使非法性行為」，女人亦會「以威脅手段促使合法性行為」。頂你，女人逼婚嗰啲唔撚係呀？
【自己廣告：有錢派，有錢派！】
「Medium付費會員回贈計劃」（加強版）https://readmedium.com/mediumrebate2-6af1d8313dc1
歡迎大家加入 Medium，follow史兄： https://medium.com/@relgitsjg
Facebook page：https://www.facebook.com/Relgitsjg IG (主要用嚟睇女仔) : https://www.instagram.com/iamuncleshit/