《港產片輝煌歲月－漫畫改編真人電影》（下）
【前言】
前排上網做資料搜集嗰陣，發現我睇咗唔少港產改編電影（尤其是2000年後嗰啲）。整理資料後，將相關電影分做三個時期，寫咗篇偽學術文章。
講明先，文中嘅三個時期有重疊，第一時期去到1994年，但第二時期又會由1993年開始。整個分析涉及分類同分時期，個人認為分類比分時期略為重要，加上重疊嘅年份同影片相對少，無謂太過著重啲瑣碎嘅事（例如，幾個時期重唔重疊、我啲文多唔多錯字）而影響寫作同閱讀嘅樂趣。
第二時期：90年代初至尾－「港漫盛世」
《城市獵人》（1993）（成龍、王祖賢）＊ 《刀劍笑》（1994）（劉德華、林青霞） 《七金剛》（1994）（李寧、楊紫琼） 《孟波》（1996）（周文健） 《古惑仔之人在江湖》（1996）（鄭伊健等人）＊＊＊＊＊ 《古惑仔2之猛龍過江》（1996）（鄭伊健等人）＊ 《古惑仔3之隻手遮天》（1996）（唔好問我點樣一年拍三套）＊ 《百份百感覺》（1996）（鄭伊健、葛民輝、鄭秀文、梁詠琪）＊＊＊＊＊ 《百分百岩Feel》（1996）（鄭伊健、葛民輝、鄭秀文、邱淑貞、梁詠琪）＊＊＊＊＊ 《97古惑仔之戰無不勝》（1997）（鄭伊健等人）＊ 《98古惑仔之龍爭虎鬥》（1998）（鄭伊健等人）＊＊＊＊＊ 《新古惑仔之少年激鬥篇》（1998）（謝霆鋒）＊ 《古惑仔情義篇之洪興十三妹》（1998）（吳君如、楊恭如、舒淇）＊ 《風雲：雄霸天下》（1998）（郭富城、鄭伊健）＊＊＊＊＊ 《中華英雄》（1999）（鄭伊健、楊恭如、謝霆鋒、吳鎮宇）＊＊＊＊＊ 《極速傳說》（1999）（鄭伊健、張栢芝、譚耀文、任達華）＊＊＊＊＊ 《古惑仔激情篇洪興大飛哥》（1999）（黃秋生、麥家琪） 《友情歲月山雞故事》（2000）（陳小春、梁詠琪）＊ 《勝者為王》（2000）（鄭伊健等人）＊ 《百份百感覺II》（2001）（陳奕迅、陳曉東、周麗淇、楊千嬅、容祖兒）＊
你問我，呢個表完未？其實未完：
古惑仔野史改編（非官方授權） 《洪興仔之江湖大風暴》（梁朝偉、陳小春、李若彤）（1996）＊ 《龍虎砵蘭街》（古天樂、謝天華、黎姿、麥家琪）（1996）＊ 《古惑女之決戰江湖》（李麗珍、麥家琪、莫文蔚）（1996）＊ 《旺角揸Fit人》（吳鎮宇、丁子峻、李麗珍）（1996）＊ 《去吧!揸Fit人兵團》（吳鎮宇、張耀揚、張達明、蔡少芬）（1996） 《紅燈區》（陶大宇、任達華、邱淑貞、舒淇、周嘉玲）（1996）＊ 《古惑女2》（何超儀、楊恭如、洪雪盈、唐文龍）（2000）＊
＊代表我睇過。＊＊＊＊＊代表我睇過好多次；《極速傳說》我睇過廿次。
───
如果喺 Medium寫嘢係逐個字計錢，咁就爽囉－上面27套戲，連標點約700字，每字$0.5都已經$350，每字一億就七百億咧……
關於呢堆片嘅兩件恐怖事： （一）整理27套戲資料（演員、票房數字），要花好多時間 （二）更恐怖嘅係，除咗幾套無咁出名嘅（《刀劍笑》、《七金剛》同《孟波》），我幾乎睇晒
個別劇情未必記得，尤其是古惑仔野史嗰幾套，面目非常模糊。相反，經典《極速傳說》我識倒轉背，經典場面對白，每隔十分鐘就有：
(i)主題曲歌詞「頭搖又尾擺，飄移境界」（「含完又要舔，龜頭濕晒；含完又要舔，嗚～～～」） (ii) 鄭伊健林熙蕾窄位車廂大戰 (iii)張栢芝企喺廁外門口，除低條浴巾色誘 Sky哥哥（意淫度100%，甚至超越佢十年後嘅四級真人相） (iv) 柯受良跑得快過電單車 (v) 「人要惡過車」（痴撚線，結局都係車惡過人） (vi) 任達華：「連車尾燈都睇唔到，點解？」
以整體經典計，《古惑仔之人在江湖》呢27套中排名第一；以令人印象深刻嘅情節同對白數量計，《極速傳說》係 one of the Greatest Of All Time (GOAT) in the history of Hong Kong movie（註）。
不過，咁又唔代表《極速傳說》最好睇……呢套戲明顯食日漫《頭文字D》嘅水頭，劇本十足十《古惑仔之人在江湖》：志氣風發＞招來麻煩＞闖禍＞自我檢討＞突破自己＞贏咗對家，只係一套揸刀同另一套揸車，加埋古裝版古惑仔－《風雲》，你發覺呢十年改編嘅其實只有一套《古惑仔》。
───
呢個時期嘅改編作品，有六個特徵／特色：
第一，作品數量飇升。
90年代中到後期可謂港產片產量嘅高峰，連帶改編真人電影數目亦以驚人增長，8年就有27套。當中1996一年，就有12套上影，古惑仔相關嘅佔咗9套，個半月就一套！而第一個時期，每年先平均有一套改編作品；第二時期，即使去到1999–2001年香港經濟急速下滑，每年依然有一至兩套改編作品。
第二，官方正版授權。
27套當中16套為官方正版授權，約佔一半。人物、角色、招式跟足原著，故事大致跟返原著條主線；相反，第一時期多數係冇授權，劇情同角色只能影射。第二時期中，成龍嘅《城市獵人》得到日本官方認可，連電影標誌亦用上漫畫版Logo；馬榮成經典《風雲》同《中華英雄》接連上影，故事重心亦分別放喺最震撼嘅《雄霸篇》同《無敵決戰自由神像篇》－無原著授權，根本無得拍。
呢段時期拍咗幾十套嘅《古惑仔》，原著作者牛佬，喺電影第一集客串洪興高層－2008年 Stan Lee 先喺 Marvel Cinematic Universe 做嘅嘢，1996年牛佬已經做咗。牛佬仲要出兩次場，有對白嫁：
不過，喺有正版授權嘅同時，又有幾套作品，包括《百分百岩Feel》、七套古惑仔野史、《孟波》，係喺電影公司拎咗版權拍第一集好收得，唔想畀版權又想食條水尾，於是製造出一系列類似有關但又唔係官方授權嘅影射作品：
《城市獵人》vs《孟波》：《孟波》嘅周文健比起《城市獵人》嘅成龍喺外型上更貼近原裝，起碼高度更貼，不過喜愛睇明星嘅香港人，睇呢啲戲唔會考慮「主角貼唔貼近原著」。
《古惑仔》系列 vs古惑仔野史改編：總之有「古惑仔」同《古惑仔》中角色名嘅係正版；古惑女、洪興仔等等全部係影射作品。
《百份百感覺》 vs 《百份百啱feel》－
以呢段時期嘅正版vs翻版嚟講，正版授權作品質素較高。唔係話原著超級好睇，只係翻版更加不滯。古惑仔野史改編嗰幾套，劇本製作差勁，離譜之極，只係喺旺角太子一帶後街拍嘅七日鮮，睇完眨一眨眼已經唔記得。
即使係授權原著，正版《百份百感覺》選角依然離撚晒譜－
屌你老母，你搵鄭秀文演Cherie?係咪痴撚線？漫畫中Cherie呢個角色，當年只有一個人可以演，不作他人之選－楊采妮！
For god sake, 鄭秀文係一個令人無任何戀愛感覺嘅 fantasy嘅演員。無！即使佢出名嘅《孤男寡女》，依然無幻想！Sorry！你仲要搵佢演港漫第一號女神Cherie！！連林嘉欣都演唔到 Cherie啊你老母！！你仲要搵個無身材、唔靚、皮膚差、性格差勁、毫無少女味嘅人演 Cherie，想點？但套戲依然大收，你話百份百感覺呢個牌匾幾有吸引力？
鄭伊健演 Jerry，無可厚非－原作者劉雲傑講過 Jerry嘅人設原型係江口洋介，鄭伊健有佢30%；至於許樂，搵葛民輝亦有喜感，儘管我覺得許樂似林海峰多啲。
去到1996年年底嘅影射作品《百份百啱feel》，更仆街。鄭伊健又搭鄭秀文，算；無端端插個邱淑貞落去，演一個演員……喺戲度扮演員，難度分係100，演得好係影后(如 Emma Stone)，點知你搵個完全冇戲嘅人去演……當年邱淑貞已經28歲，拍落去一堆18（梁詠琪）24（鄭秀文）嘅青春少艾度，明顯格格不入。然後加入青春可仁嘅梁詠琪－點知又要硬插張達明落去，角色重疊，搞到葛文輝嘅戲份被大幅減少。
好了，2001年原裝正版，《百份百感覺II》居然冇咗Cherie呢個角色！
下？？？？
《百份百感覺》係圍繞 Jerry -Cherie-許樂三角關係嘅文青愛情小品，點解套改編電影可以無咗女主角？你拍 Batman無管家 Alfred同助手 Robin、《志明與春嬌》無咗春嬌，做乜？
然後選解，陳奕迅做 Jerry、陳曉東做許樂！？吓？選角條友有冇睇過原著？陳奕迅做許樂都仲有些少似，陳奕迅 Jerry? 陳曉東做許樂？下下下下下？
第三，港漫冒起。
呢個時期嘅作品，大部份改編港漫作品－《古惑仔》、《風雲》、《中華英雄》、《百份百感覺》。主題曲多數由演員所唱，歌、影、書，標誌香港文化界嘅盛世。港漫實在太好拍，《百份百感覺》、《古惑仔》成本可以控制得好好；相反《風雲》、《中華英雄》用上好多特技，當年幾乎難產－記得《中華英雄》嗰幕落兩比劍，嗰團水劍氣用咗一百萬，出嚟效果一絕；吳鎮宇同鄭伊健喺自由神像決鬥嗰幕CG亦用唔少錢。好在幾套堅嘢票房好收得。
遺憾嘅係港漫嘅真正經典《龍虎門》，並無喺嗰陣改編成電影作品。當年其原創人黃玉郎入獄去到2000年先放監，後嚟去到2006年先拍咗第一套真人電影。
唔改編日漫，主要原因係(1)日本人根本唔中意外銷同(2)題材根本改編唔嚟。《頭文字D》漫畫1995年開始連載，大概1997–98年超紅，原裝授權電影2005年先拍到出嚟，影射作品《極速傳說》99年就上影咧。1990年代，最紅嘅日漫係龍珠、幽遊白書、JoJo，點拍呀？一啲較易拍嘅，例如入樽、城市獵人已經拍咗，無題材，想拍都冇得拍。
第四，系列作品。
呢個時期首次出現改編電影嘅「續集」同「外傳」。主要係《古惑仔》，拍咗十幾套，然後《風雲》兩集、《百份百感覺》三集，遺憾原著劇情最好嘅《中華英雄》無拍到續集……不過，所謂系列作品，只係用返同一班演員套上同一個角色，每集之間關連幾乎係零。
《古惑仔》拍咗咁多套，監製文雋講過想每個主要角色都有背景故事，於是有好幾套外傳（山雞故事、洪興大飛哥、洪興十三妹），然後再安插返去主線《古惑仔》度，聽落有 Avengers／Justice League嘅味道。現實係《古惑仔》六集，劇情一忽忽，幾集之間無乜關連（撇除第三集蔣天生死咗第四集要搵蔣天養做龍頭），毫無層次感（第一集洪興內鬨、第三集鬥東星、第四集又去返洪興內鬨、第六集無端端去咗日本鬥山口組），選角又低能：
－朱永棠：第一集演巢皮好快收皮，第二集演第二個角色叫蕉皮、第四集同第五集演巢皮又演蕉皮、第六集演三聯幫殺手！佢究竟係邊個？
－張耀揚：分別喺三集演過三個奸角，第三集演過東興五虎之一烏鴉、第四集又演東興五虎之一耀揚，造型性格幾乎一樣。
－謝天華：頭四集演大天二（第四集死咗）、第五集無出場、第六集無端端變咗三聯幫人士……
演員死而復生，變嚟變去，真係好亂。
整體嚟講，《古惑仔》第一至第三集，劇情同演員尚有連貫性，當中細細粒死嗰幕、加上鄭伊健首《甘心替代你》，肯定係《古惑仔》電影最經典一幕。第四集開始為求票房不惜將主要配角殺死（大天二）或加入狗屁不通嘅角色（例如李嘉欣演嘅幼稚園教師），又或者因為種種因素無咗主要配角（第五集無陳小春！），令成個電影系列走向下坡。
《古惑仔》第六集票房得七百幾萬，自此無再拍落去，漫畫中最好睇嘅戲碼無得影像化－洪興分部／車寶山、陳浩南同山雞反目、陳浩南成為洪興龍頭、福田一役將洪興社眾打仔一鑊炒起（漫畫中大天二、太子、大飛、生蕃等後嚟成為重要配角；震撼程度等同 Avengers嘅 Infinity War）。如果要再拍古惑仔，即使好似王晶咁喺2013年起用其他人演陳浩南，亦要以系列拍攝、並以福田一役作為最終結局。
無人諗到 Marvel可以拍一個 Marvel Cinematic Universe，當中涉及嘅計劃、資金、預備，史無前例；如果當年香港人諗到，亦未必拍到－事實上文雋真係諗到啊。講起漫畫改編，人類只係記得 Marvel（連DC都唔記得呀陰公），而唔係 Teddy Boy （漫畫古惑仔英文叫Teddy Boy／電影叫乜春 Young and Dangerous），可惜。個人估計，劇本用上舊三集大綱（加強配角們戲份）、第四集要山雞同浩南爭做龍頭而反目，第五集大戰毒蛇幫、第六集福田一役，咁就差唔多。
____
《史兄小知識》
雖然鄭伊健同陳浩南幾乎係同義詞，但電影中鄭伊健所演嘅「陳浩南」，從來唔似漫畫《古惑仔》嘅「陳浩南」。
唔似，係造型唔似－漫畫陳浩南係旺角卡門嘅劉德華、係性格唔似－漫畫陳浩南超級奸，好有機心同古惑。漫畫版陳浩南心思細密、講感情更講利益、唔係單純講道義嘅一個梟雄；電影嘅陳浩南只係傻仔一名。
後嚟鄭伊健版本陳浩南太紅，作者牛佬喺漫畫《古惑仔》索性加插咗一個叫伊健嘅角色，外型同現實嘅鄭伊健一模一樣。
___________
第五，票房強勁。
《城市獵人》係當年港產片票房第四，1996年頭十名最高票房港產片改編電影有四套（三集《古惑仔》、《百份百感覺》），而《風雲：雄霸天下》更加係1998年最高票房港產片，《中華英雄》同《極速傳說》係翌年亦分別排第三第四。《城市獵人》應該係成龍效應，但其他幾套改編，明星效應應該不大，漫畫原著讀者群強大－《中華英雄》同《風雲》高峰每星期賣十幾廿萬本、黑社會／幫派片亦係港產片強項。
隨住港產片市場萎縮，整個港產改編電影嘅票房同號召力喺《風雲》見頂－1998年嘅《風雲》票房係等於1999年《中華英雄》同《極速傳說》嘅總和，加上最經典港漫已經改編得七七八八（當時只餘《龍虎門》），往後香港片商拍改編電影時，只能選擇外國作品（台灣或日本）或者拍港漫嘅續集（《風雲2》）。即使有新港漫改編電影，作品質素大不如前，市場反應極差（《龍虎門》、《野狼與瑪莉》）。
＿＿＿
以下係部份港產改編電影嘅票房（來源）：
《城市獵人》（1993）－攞正牌嘅改編 、打入港產片票房第四嘅改編電影－三千一百萬（當年港產票房第4，下同） 《孟波》（1996）（周文健）－五百萬 《刀劍笑》（1994）－三百五十萬 《七金剛》（1994）－十二萬 《古惑仔之人在江湖》（1996）：兩千一百萬，第6 《古惑仔2之猛龍過江》（1996）：兩千二百萬，第5 《古惑仔3之隻手遮天》（1996）：兩千萬，第10 《97古惑仔之戰無不勝》（1997）：一千六百萬，第9 《98古惑仔之龍爭虎鬥》（1998）：一千三百萬，第6 《勝者為王》（2000）：七百七十萬 《百份百感覺》（1996）（鄭伊健、葛民輝、鄭秀文、梁詠琪）二千一百萬，第9 《風雲：雄霸天下》（1998）四千一百萬，第1 《中華英雄》（1999）兩千三百萬，第3 《極速傳說》（1999）一千九百萬，第4 《百份百感覺II》（2001）（陳奕迅、陳曉東、周麗淇、楊千嬅、容祖兒）
第六，鄭伊健世界。
以下係鄭伊健喺第二時期演過嘅漫畫角色－
華英雄《中華英雄》 聶風《風雲：雄霸天下》 陳浩南《古惑仔》 Jerry《百份百感覺》
既係聶風、又係華英雄，是浩南、更是Jerry。加埋之前演嘅高秋／假流川《男兒當入樽》、阿Ken《超級學校霸王》同達克《拳神》（客串），演出嘅改編作者，我肯定前無古人，後無來者。
日本有藤原龍也、山崎賢人、橋本環奈（打咗三十次橋本有菜 SNIS696），呢三個多次主演改編漫畫嘅演員，夾埋先等於一個鄭伊健渣！美國嘅Michael Keaton演過Batman、Birdman同喺Spiderman演過奸角，而鄭伊健係四套港漫改編電影嘅第一男主角！
鄭伊健有冇睇晒呢堆原著？我估佢最多只係睇過《風雲》，聶風嘅俊逍瀟灑，同鄭伊健本人十分匹配。相比之下，佢演唔出原著陳浩南嗰種梟雄+奸、Jerry嗰種野性灑脫同華英雄嘅鬱鬱寡歡。簡單啲講，鄭伊健無氣牆。
咁點解鄭伊健可以演到呢四個男一？憑演技、靚仔、神似原著主角？
係一把長髮呀屌你！
Jerry同聶風本身有把長髮、浩南同華英雄亦有把厚厚嘅頭髮，鄭伊健本身係長髮，演呢堆角色唔使駁髮、望落去亦非常順眼。佢演聶風，外型尤其神似。你想知一個本身唔係長髮嘅男演員演聶風會點？
呢套台版《風雲》喺亞視播，每次見到鼻哥窿大過眼嘅聶風（而聶風喺原著係個好cool嘅俊男），我就忍唔住大笑。
───
【推介】
《風雲：雄霸天下》
賣點：
(1) 千葉真一、鄭丹瑞神還原雄霸、文丑丑；一刀三劍神還原（絕世好劍、火麟劍、雪飲、無雙）。楊恭如演孔慈，比起漫畫孔慈更靚。
(2) 神級對白。楊恭如對步驚雲講：「就算我同佢（聶風）結咗婚，都可以同你一齊。」
嘩，人盡可夫！記得喺戲院睇嗰陣，全場「嘩」咗一聲。我心諗「呢個角色應該畀李嘉欣做」……大家後尾先明白，楊恭如呢句對白係發自內心，只要你肯畀錢。
(3) 卡士。電影版《風雲》其實係古裝版《古惑仔》……浩南大天二等人唔在講，劍聖大飛哥／秋生哥再次出場，連基哥同大B哥都可以有份……只係差黎姿做孔慈，咁就非常好。
(4) 交流。兩個男主角全套戲零對話、零交流、零合作，似演緊兩套戲。唔明唔緊要，前排 AV界兩大皇后 三上悠亞 同 高橋聖子，合拍咗一套 AV，片名叫 ふたりは無敵。無敵又盛，吹得咁衡，等同 Steve Jobs 同 Bill Gates合作咁滯，一睇……兩個天后真係同場玩 3p，打真軍，可惜成套 AV－足足二百四十分鐘、一萬四千四百秒裏面，兩個都毫無交流，擦唔出半點火花，平白浪費大好卡士，成套嘢得個悶字(code : tek00097)。《風雲》入面嘅風同雲亦係差唔多，明明一齊主演，未搶婚前毫無矛盾、決裂後不見仇恨、重遇時未有火花、合作後友情欠奉。
(5) 城城。郭富城表情似便秘，呢個一號表情沿用至《寒戰2》。
(6) 《風雲》電影第二集，更加痴鳩線，全劇夾埋唔夠三十句對白。
傳說古天樂拎咗風雲嘅版權，會再拍電影版。後生嘅古天樂演斷浪，一流；而家老咗演奸足三百期嘅劍晨，尚可接受。但劍晨同斷浪，邊個會畀錢入場睇？唔睇風雲嘅你，知唔知係邊個？
另外，《極速傳說》係非睇不可，原因：
至於《古惑仔》，睇第一至第三集就夠。黎姿演活咗細細粒，擦亮咗《古惑仔》電影版；無黎姿嘅《古惑仔》，不看也罷。「巴閉、英雄主義、疊馬」嘅第四集，完全可以不理；第五同第六集直頭要當無拍過。
（港產電影改編嘅第三階段……未開始寫。）
下集第三階段已寫：
註：港產片殿堂級《英雄本色》，都只得七幕－
－李子雄數錢落地下等周潤發執 －周潤發去台灣「楓林閣」報仇 －「我發誓，唔會再畀人用槍指住我個頭！」 －「阿Sir我冇做大佬好耐」 －「信呀，我咪神囉。神都係人嚟啫，能夠把握自己條命，佢咪神囉!」 －「我衰咗三年，我等緊個機會，爭番口氣。唔係要證明話畀人聽我威，只係想話畀人聽，我唔見咗嘅嘢我想自己攞番！」 －「做兄弟既…… 」
Follow me on Medium，我嘅文字唔會令你失望（不過寫文嘅速度會）。
https://medium.com/@relgitsjgFacebook page：https://www.facebook.com/Relgitsjg