《港產片輝煌歲月－漫畫改編真人電影》（上）

最近喺Netflix睇咗幾套港產片，包括《頭文字D》、《龍虎門》、《破壞之王》，又睇咗外國Marvel/DC嘅，包括《奇異博士》、《自殺特攻隊》（呢套劇情貫徹DC系嘅弱智），仲有套驚世「杰作」真人版《龍珠》，猛然醒起香港拍過好多改編漫畫同動漫嘅真人電影。

上網做資料搜集嗰陣，又發現我睇咗唔少港產改編電影（尤其是2000年後嗰啲）。整理資料後，將相關電影分做三個時期，寫咗呢篇偽學術文章。

第一時期：80年代尾－90年代初

《孔雀王子》（1988）（主演：元彪）＊ 《紅場飛龍》、《浪漫殺手自由人》（1990）（前者：許冠傑；後者：任達華） 《力王》（1991）（樊少皇）＊ 《妖獸都市》（1992）（黎明、李嘉欣） 《夏日情人》（1992）（葉玉卿、李麗珍、莫少聰）＊＊＊＊＊ 《超級學校霸王》（1993）－街頭霸王（劉德華、郭富城、張學友、邱淑貞、張衞健、楊采妮、任達華、鄭伊健）【嚴格嚟講，呢套係改編電玩】＊ 《男兒當入樽》（1994）（鄭伊健）＊ 《破壞之王》（1994）（周星馳）＊

＊代表我睇過。＊＊＊＊＊代表我睇過好多次。

───

呢九套改編真人電影，同恐龍骨一樣咁古老。無四十歲以上恐怕睇唔晒，我都只係睇過當中六套。朋友當中，恐怕只得庫斯克－一個見過電車拖卡嘅 living legend－睇過晒九套。識晒九套，同知道套戲本身嘅原著係乜，已經當你贏。

呢段時期改編電影，有四個明顯特徵：

第一，以日漫為主軸。

上述港產片，皆有對應嘅日漫作為參考對象：除咗係人都識《力王》（同名日漫）、《超級學校霸王》（主要係街機「街頭霸王」），《男兒當入樽》人物設定以井上雄彥嘅《Slam Dunk》作參考，《破壞之王》廢人男主角為溝女學打拳係參照刃森尊嘅《破壞王》－女主角鍾麗緹個樣同原著有95%相似，扣咗個5%係爭咗原著女主角對波。已經無乜人識嘅《妖獸都市》係來自同名既咸濕兼陰森嘅日漫《妖獸都市》。

《紅場飛龍》、《浪漫殺手自由人》呢兩套較冷門，其實同樣參考池上遼一嘅《淚眼煞星》（註）－任達華扮火野村窯，形神兼備。而《夏日情人》，係參考將桂正和嘅經典《電影少女》嘅「(1)錄影帶裏面條女走出嚟(2)幫男主角溝女(3)然後同男主角唔覺意相愛咗」呢條橋照搬。

第二，大部份港產電影冇授權。

除咗《孔雀王子》、《力王》同《妖獸都市》係日本授權（順帶一提，前兩套嘅導演均為藍乃才，估計與其好友蔡瀾可能有關），其他六套都冇官方授權，嚴格嚟講係翻版嚟。你唔可以用今日嘅角度去怪罪班電影人，一來嗰個年代授權、版權係樣幾新穎嘅事，雅典、海豹、天龍出版社幾個翻版日漫書商，賣書賣到爆（雅典後尾拎咗《電影少女》正式授權，仲喺港台某個節目出贊助）、連港漫《街頭霸王》頭廿幾期都冇拎版權－直到玉郎、天下等大漫畫公司相繼拎咗版權，日漫喺香港先有正式授權出品；二來，香港人唔係冇嘗試拎日本授權，印象中《超級學校霸王》同《破壞之王》，的確想拎日本正式授權，不過後尾唔成事。

無授權，電影橋段、角色同名稱只能影射，唔能夠照用原著。例如《紅場飛龍》同《浪漫殺手自由人》，主角名稱起用原著火野村窯嘅外號「自由人」，《紅場飛龍》嘅殺手組織叫「八百龍」，原著叫「百八龍」（原著個「百八龍」有出處，取自水滸傳108好漢／清末108反清復明僧侶；「八百龍」係乜？第一屆特首選委數目？）；《夏日情人》亦由睇《電影少女》中錄影帶變咗睇Laser Disc、《破壞王》嘅蹴道，去到《破壞之王》變成自由搏擊。部份電影，包括《破壞之王》、《夏日情人》、《孔雀王子》等，主角亦變成香港人。王晶嘅《超級學校霸王》，角色亦只係用鐵面代替Vega、掃把頭代替軍佬、發達星代表印度佬等。至於《男兒當入樽》，麻煩睇返下面呢篇文：

第三，因為無授權，日本官方無從左右拍攝同製作，呢段時期嘅真人改編片，質素極度參差。 亂鳩咁拍嘅大有人在（《男兒當入樽》）、幾套炒埋一碟嘅又有（《超級學校霸王》裏面仲有孖寶兄弟、孫悟空，故事主線係抄阿諾舒華嘅《未來戰士》，一貫王晶風格.），忠於原著嘅亦唔少（《破壞之王》同《電影少女》故事主線頗為貼近原著），更有《力王》係幾乎100%原汁原味咁由漫畫變成電影、《妖獸都市》變咗共產黨回收香港嘅預言書咁。

電影製作上，呢啲電影都係「港學為體，日學為用」，用日漫嘅故事橋段情節及角色，以港產片嘅拍攝手法製造出嚟。今日嚟睇，極其量只能稱為二次創作，大部份（除《力王》）並非旨在將原著日漫原汁原味原原本本咁變成電影。

第四，票房麻麻。

因為質素極度參差，除咗周星馳嘅《破壞之王》收三千萬（當相於今日港產片三億），其他幾套票房只係一般：

《超級學校霸王》：千八萬（暑假檔期） 《紅場飛龍》：千二萬 《孔雀王子》：千一萬 《妖獸都市》：千一萬 《夏日情人》：八百萬 《浪漫殺手自由人》：三百萬 《男兒當入樽》：三百萬 《力王》：兩百萬

（資料來源：豆瓣用戶。你話悲哀又得、高興又得，一啲關於1990–2004年港產片票房嘅記錄，我居然喺個大陸網搵到晒……呢個用戶仲有1969–1989年嘅數字……）

你以為千一萬好多？當年港產片每年出品約120–140部，千一萬票房排25–35(～20%-tile)，八百萬大概排40–50(～30%-tile)，兩三百萬係排75–85(～70%-tile)。《紅場飛龍》有許冠傑孭飛，收千二萬叫失敗咧；更唔好提，《入樽》、《力王》、《浪漫殺手自由人》只係收兩三百萬，當年要拎去打靶咁濟。

呢個時期日漫改編嘅真人港產片成行成市，六年八套，主要由於當時日本經濟處於最頂盛之時，日漫大光大熱，不缺香港漫畫所欠奉題材。撇除啲無得拍嘅（例如，《龍珠》、《聖鬥士星矢》、《足球小將》），香港人堅識揀，拍啲成本唔高嘅，進可攻、退可守，揀啲香港拍得叻嘅題材－《夏日情人》（愛情）、《破壞之王》（武打+搞笑）。啲太複雜嘅、純武打類，從結果話咗你知好難有好反應－《力王》只收兩百幾萬。除咗當年電腦特技並唔容許拍啲飛天遁地嘅日漫電影，某啲題材要認真咁拍，難度甚高，劇本更加係大問題，瀨嘢機會率係戶愚呂弟100%中嘅100%：1994年尚格雲頓套真人動作版《街頭霸王》，悶到抽筋，到咗2009霍士去拍真人版《龍珠》，依然仆到直。

綜合嚟睇，呢個時期嘅改編真人港產片，冇乜邊套可稱經典存世－除咗《力王》。

───

【推介】

《力王》(1991)

呢個時期要揀一套睇，睇《力王》。《力王》劇本非常忠於原著，選角一流，畫面夠血腥，整套戲經得起時間考驗。港產 cult片四大天王（《力王》、《伊波拉》、《生化壽司》、《人肉叉燒包》），我對《力王》嘅整體評體最高。

樊少皇做主角，佢嗰種大隻、嗰種四肢發達頭腦簡單、嗰種好大力，同原著100%相似……唔係，根本係原著照住樊少皇嚟畫，哈哈哈哈哈。唯一唔似，就係原著主角性格較從容，處變不驚，而樊少皇成套戲都一副兇狠、便秘兼肉緊嘅樣子。我睇《力王》嗰陣，心諗阿 JJ賈曉晨對波會唔會畀力王一手渣爆……

套戲無CG、無乜特技，片中血淋淋嘅畫面用好原始、土法煉鋼嘅方法去做，拍出嚟反而有血有肉，好真實，硬橋硬馬，頂級血腥，隔住個芒都感受到嗰種血淋淋同腥味。佢血腥到一個點，令你忘記啲人點解要殺嚟殺去，反而會緊張下一批敵人究竟點死、同埋導演用乜嘢血腥方法呈現出嚟。呢套戲嘅暴力鏡頭，昇華至一個傳奇，令觀眾唔再理會劇情，實屬難得。

今時今日，呢套戲喺戲院上，要心智起碼四十歲、西九補選冇投票畀泛民先睇得－心智唔成熟睇呢套戲，一定發惡夢，日日都係香港最黑暗嘅一日。

望見力王嘅身形，我猛然醒起，當年真人電影可加插吳剛師傅－食炭嗰個，唔係喺月球斬桂樹嗰個－作為中頭目，出嚟搞下笑。兩個大隻佬力搏，吳剛師傅使出火遁「口吐熱炭」、「高熱滾油」，橫練鐵布衫，力王一拳打死佢，然後話啲炭同油都係假貨……

全片重點：最終大佬，獄長何家駒變身出嚟嘅怪獸，畀力王掉咗落碎血機，

嗰隻怪獸其實係林雪扮嘅。

───

《夏日情人》(1992)

李麗珍下海拍三級片前最後一套二級片。成套戲完全無印象，淨係記得李麗珍「除咗上衫、打側面向鏡頭、半邊胸進入鏡頭、但冇露點」嗰幕。當年有份雜誌，叫呢樣嘢做「裸而不露」。

嗰幕我睇過一百次，尖東金獅嗰盒錄影帶畀我睇到花晒。而套《夏日情人》講乜，我到今日為咗寫呢篇文先知。

李麗珍之後拍嗰三套三級片，我夾埋睇過起碼兩百次。當中《不扣鈕的女孩》同梁思浩肉搏嗰一段，而家電腦仲有段片，偶爾會開嚟懷緬下。我屋企仲有李麗珍本寫真集。無錯，咁樣寫出嚟我覺得好恐怖，好痴漢。當然，有段時間，我好羡慕同妒忌梁思浩，點知呢個對象漸漸變咗潘源良同髮型師Jacky Ma……然後我唔再羡慕任何人了。

全片重點：李麗珍裸而不露（戲中大概53分鐘）。

───

《破壞之王》（1994）

《破壞之王》好睇，好睇在周星馳。嗰個年代周星馳嘅戲，睇幾十次都唔厭－《食神》係重複睇過最多次嘅戲，睇過約五十次，識背啲對白。

值得一提：《超級學校霸王》（1993）

王晶出品。

到咗201X年拍《賭城ＸＸ》，王晶依然用緊1993年《超級學校霸王》嗰種炒雜燴嘅胡鬧手法。啲乜嘢化粧品成日搵女星賣廣告，話凍膚、肌膚回復廿年前，都戇鳩嘅，下次轉起用王晶啦－佢成個人停留咗喺1993年，無撚郁過呀！王大導有幾厲害，今年年頭寫過一次：

－－－

註：想當年買A-club，只為佢登嗰三兩張《淚眼煞星》或《妖獸都市》嘅裸女相

第二階段

第三階段

Follow me on Medium，我嘅文字唔會令你失望（不過寫文嘅速度會）。 https://medium.com/@relgitsjg

【今年史兄喺Medium所得稿費，將全數用作支援魚蛋革命嘅義士。】

Facebook page：https://www.facebook.com/Relgitsjg