《男兒當入樽》－唔係櫻木流川嗰套
年份：1994年 導演：袁錦麟 編劇：郭偉鐘 演員：鄭伊健、古天樂、吳大維、鄭則仕、麥家琪
───
官方劇情
籃球健將灌男乃名副其實“波牛”一名，在球場上更贏得無數掌聲，故被出身自籃球世家的琪琪看中，應邀參加其父組成的一支青年籃球隊。受訓期間，灌男結識了一班同道好友，有電腦小子阿邦、侏儒仔小超、以及波神高秋，惟其對籃球嬉笑的行為，卻惹來以球技自持的King Kong不滿，公然向灌男挑戰。選拔賽當天，灌男等人為了爭回一口氣，竭盡所能，反觀King Kong自視過高，完全看不起灌男的球技，然而灌男憑著堅毅精神和靈活頭腦，終一挫King Kong之銳氣。可是，眾人在面對美國勁旅以爭奪超級籃球爭霸杯之時，卻顯得毫無鬥志之心，但經過訓練和與人相處的衝擊下，眾人終悟出籃球取勝之道在於團結一致，才能克敵制勝。
2000年後嘅爛片經典睇得七七八八，再睇再寫之前我又回觀啲90年代經典爛片－嗰陣香港泡沫經濟暢旺，啲人捨得去戲院睇戲，拍垃圾都好收得－神龍賭聖收幾千萬；於是好多人肯拎錢出嚟拍垃圾（而家都有人拍垃圾，不過喺大陸播咁解）。
今次介紹呢套港產片，叫《男兒當入樽》。嗱，名就一模一樣，不過唔係日本經典漫畫(Slam Dunk)嗰套嘅授權真人/漫畫版，只係一套講籃球嘅山寨貨。除咗個名一樣，套戲嘅選角有幾份似正版《男兒當入樽》：
－鄭則士（教練）＝安西；相似度＊＊＊＊＊＊（五粒＊最高）。如果有人要拍套真人正版《男兒當入樽》，鄭則士依然可以演安西。 －麥家琪（經理）=晴子/彩子；相似度＊＊＊。唔似係因為麥家琪波太大，而晴子同彩子同樣係洗衫板嚟。 －鄭伊健／高秋＝流川；相似度＊＊＊。兩人同樣定位為籃球高手，性格冷酷。一粒星係扣咗鄭伊健長頭髮、另一粒係扣咗鄭伊健唔識打籃球。（雖然鄭伊健外型似未入返籃球隊嘅三井） －King Kong=赤木；相似度＊＊。似嘅係黑黑實實。 －吳大維＝櫻木；相似度＊＊。似嘅係嬉皮笑臉。 －古天樂＝杜拉格斯；相似度＊＊＊＊＊＊＊＊＊＊。古天樂先生個中間分界嘅髮型同嘅杜拉斯格一樣。可惜嗰套係《龍珠》……同埋古天樂喺《入樽》出現咗約20分鐘，喺毫無預兆、毫無作用之下就消失咗……我翻睇套戲兩次，都唔明佢喺度做乜。
撇除選角相似，成套戲同正版《男兒當入樽》一啲關係都冇。
我中學嗰陣好中意打籃球，當年一見呢套戲講打波、又同日漫個名一樣，就同班同學衝咗入戲院睇……當年衝擊太大，造成創傷後遺症，對呢套戲嘅回憶收埋咗喺腦海最深處，今日都搵唔返。而家再睇，見到咁嘅陣容、咁嘅題材，已經一額冷汗，再睇一次比相像中更加胡鬧。
最胡鬧嘅地方有兩個：
1. 成班主角配角，得半個識打籃球
識打波嗰半個，係主角吳大維。觀乎佢喺戲裏面左手嘅運球能力，似打咗兩三年波咁上下，水平並未足以入到任何中學校隊、更遑論扮演職業球員。要演一個籃球員－職業好、業餘好－佢嘅技術唔夠說服力。
除咗吳大維，其他角色－高手鄭伊健、喺日本打職業籃球員嘅King Kong、出場廿分鐘嘅古天樂、所有配角（如張崇基德兩兄弟）、鄭則士麥家琪，全部都唔識打籃球。係 • 一 • 啲 • 都 • 唔 • 識 • 嗰 • 隻：拍波似打仔、射波用雙手推波、運球跑步時似麻鷹捉雞仔咁打橫行，根本係拍戲第一次掂到籃球嗰隻。真正識打波嘅係佢哋嘅對手、一班完全無對白嘅咖喱啡。
即使吳大維識打籃球，混埋一班對打籃球認知同實力全部為零嘅演員度，瞬間都變柒頭。偏偏套戲嘅設定，仲要係吳大維球技普通，相反鄭伊健同King Kong係高手。結果一打比賽一班小學雞喺操場度玩數字球咁跑嚟跑去，無隊形無戰術（sorry我對一班唔識打波嘅人唔應該咁高要求）。
你話，叫得「演」員，梗係扮啲佢唔識嘅嘢，仲要維妙維肖。例如史泰龍扮拳手、羅素高爾扮數學家拿殊(諾貝爾經濟學奬得主)、福山雅治扮物理學家，堅係入木三分，起碼望落佢有台形。港產嚟講，要演員扮運動員，前題係訓練，再配合特技同替身，一般唔會穿崩得太厲害。：
－張家輝同彭于晏拍《激戰》，上半身操得相當鋼條（下半身就差啲）。
－當年陶大宇出走無線，返大陸拍咗套叫《乒乓》嘅劇，扮乒乓波球員，揮動球板扮打波，後期加返個乒乓，仍不太離譜（套戲就另計）。
－周星馳喺《少林足球》嘅運球亦係用電腦製作。
－唔用電腦製作就用鏡頭遷就，好似《點五步》咁，集中演員表情、用分牌表示比賽，一樣掂。
大鑊嘅係，籃球最特別之處，係無球拍，要用手直接運球；加上比賽時演員一定要運球（足球你用腳踢空氣再加CG扮射門或者運球），演員一運球拍籃球，高手定低能即刻現形，無得用特技、亦無得用電腦幫手。
唔識打交可以用替身，唔識打籃球無辦法解決。《男兒當入樽》成套戲嘅籃球員都係門外漢，對手係職業黑人籃球員，前設根本唔合理，觀眾睇落去完全投入唔到。相比之下，1992年美國嘅籃球電影經典White Men Can’t Jump，兩個主角都識打籃球－據Bob Lanier（NBA名宿、電影嘅籃球教練）表示兩個主角嘅技術去到大學嘅水平。
唔單止演員，整個製作團隊都似乎欠缺籃球基本知識同比賽規則：鄭則士係「隊長」，但通常隊長都係球員嚟，而鄭則士根本無落過場。正確嚟講佢只係領隊或者教練；有球員射入三分，球證只係示意兩分；最過份係以下嗰樣……
2. 一套講打籃球嘅戲，只有一場波係認真咁打
最大問題係，因為演員唔識打波，於是劇情要非常夾硬改嚟遷就。於是乎場場球賽都冇認真咁打：
－20:00 吳大維同King Kong單挑，玩咗幾個馬騮搶波，吳大維除咗King Kong條褲，兩班人混戰打交……
－35:00 吳大維同伊健單挑，依然係打架，然後伊健使出空人3600度轉身（轉咗十個圈）再射個波埋去，跟住好型咁離開咗……
－50:00 華勝對King Kong隊，中途叫比賽，一班小學生喺操場走嚟走去，最後吳大維打波打到嘔。
所有比賽極度兒嬉，比賽好似搵咗盲人做球證咁，冇見過吹罰打人、犯規。
話說回頭，套戲開波出字幕，見到有動作指導，我應該當機立斷唔好再睇落去……一套講籃球嘅戲，球賽可以只係喻體，主旨係另有所指（例如最近Emma Stone嗰套男女單打賽，盲嘅都知係講男女平權）；不過戲中所表達嘅主旨－永不放棄、盡力而為，全部靠鄭則士把口講出嚟，具體劇情、對白、動作欠奉作支持。
好嗰方面諗，呢套戲可能啟發咗漫畫製作人肥良，幾年後佢畫咗本《風刃》，同呢套《男兒當入樽》有些少似。
總括嚟講，呢套《男兒當入樽》絕對係部爛片，劇本超爛，無交故事背景，結構鬆散，笑料欠奉，製作豆泥，演員技術低劣，後期製作欠周詳（白Tee白色畫面，配白字字幕，反晒光睇唔到），全部人吃力不討好。
當中有幾幕，導演想好認真講道理，因為套戲太爛，變咗超級好笑：
高秋（伊健）：「只要我控制到個波，就可以控制呢場賽事。」講嘅時候佢烏低身拍波，成個弱智咁。
鄭則士怪責身邊人：「你哋唔明，點解我要同巨人隊打。」問題係你根本無講過點解！
最令人失望嘅係，中途播主題曲，居然係經典日劇《東京愛的故事》首《突如其來的愛情故事》嘅廣東版呀！！！！佢將一首咁正嘅歌配咗做一套爛片度！！！！！！！！我屌你個屎忽呀！！！！！
不過，如果有人要我幫《男兒當入樽》呢套爛片諗綽頭，我會話佢係籃球界嘅《推背圖》。皆因此戲有三幕，居然幾年後喺現實中發生：
1. 吳大維用兩個波入樽(戲中約8 分鐘)
呢個係1994年嘅事－17年後嘅2011年，NBA球員JaVale McGee喺Dunk Contest用兩個波入樽；
2. 吳大維批評鄭伊健唔練波(戲中約35分鐘)。鄭伊健話：
「我入嚟係為咗贏波，唔係為咗練波」
喺套戲鄭伊健真係冇乜練波。8年後！2002年，球星Allen Iverson發表咗佢最著名嘅Practice言論：
3. 吳大維射出致勝一球
以櫻木花道作為抄考藍本嘅吳大維、流川為藍本嘅鄭伊健，喺戲中最後一秒合作，由鄭伊健傳畀吳大維再嚟個三分入樽，助球隊贏出賽事。作為翻版貨，佢同2年後正版《男兒當入樽》嘅結局－由流川傳畀櫻木花道射出致勝一球，概念幾乎同出一轍。
《男兒當入樽》嘅劇情早十幾廿年就喺套港產片出現！
───
題外話：2008年《功夫灌籃》
1994年嘅《男兒當入樽》爛、14年後到咗2008年嘅《功夫灌籃》，由鄭伊健變咗周杰倫，港產片變咗港中台合拍片，爛嘅程度變本加厲，劇情更加離譜、球賽更加不堪入目。球員平時練波嘅地方，係一個類似辦公室大堂嘅地方。
我非常奇怪，主角周杰倫識打籃球，曾唱作一曲鬥牛，點解會肯拍一套用籃球嚟胡鬧嘅戲。又更奇怪內地居然肯批一套咁符合國情嘅戲，充斥偷呃拐騙嘅奇特劇情：
－貪污：球證收錢吹黑哨 －黑吃黑：搵嚟武功高強嘅人，用武力制裁球證 －做假：夜場賣假酒
最後，今年劉鎮偉拍咗套《仙球大戰》，講古代足球，主演嘅係穿屎－已經講咗佢哋一齊主演嘅必屬爛片－結果比想像中更爛......
總之，華語世界拍運動題材…
───
養份時間：如何改寫《男兒當入樽》
《男兒當入樽》不合理嘅地方有兩個，相輔相乘：球員唔識打波、對手係所謂職業球員；即係你拍一套武俠片，劇情係一個完全唔識武功嘅人打贏張三豐，只會係不知所謂。
如果我改寫，會改寫背景為有一個舉辦多年、名氣好高嘅三人業餘籃球比賽。鄭則士後生嗰陣，好叻打籃球（由吳大維演）。佢打呢個比賽嗰陣，為咗救個波飛咗埋觀眾席，要避開未來老婆，自己撞斷咗腳，之後再做唔到運動。
一路鄭則士只能搵錢、做啲實際嘅嘢。到佢老婆早死，臨終話最靚仔嘅鄭則士係後生打籃球嗰個，死前希望佢做教練組隊拎返嗰個三人比賽嘅冠軍。
於是鄭則士搵咗幾個唔同背景嘅人，朝共同目標進發：余文樂（過氣球星想重拾自信）、周柏豪（有錢靚仔純粹想玩想威想溝女）、同爛賭鬼張繼聰（想拎奬金）。
打業餘球賽做背景，中途各人有矛盾同衝突（例如周柏豪中意嗰條女居然扑咗余文樂、有人畀錢張繼聰出賣球隊），去到最後面對由前職業退休球員組成嘅熱門球隊。雖然都係輸波收場，最尾發現對面唔合資格，大會DQ佢哋（符合香港精神），但佢哋有感途中已經賺晒，拒絕承認自己係冠軍。
－完－
────────────────── 【港產爛片系列】 －You know nothing,《吳清源》https://goo.gl/ZzD7Lo －《80分鐘好戲：殺人犯》 https://goo.gl/DQigtM －《畫蛇添足：兇手還未睡》 https://goo.gl/ySBCih －《穿屎主演，必屬爛片：見習黑玫瑰》 https://goo.gl/FxTfvk －《神龍賭聖之旗開得勝》 https://goo.gl/qOj5UK －《內衣少女》 https://goo.gl/3FNXgN －《我阿媽發仔瘟》 https://goo.gl/JG2i49 －《王老吉、OSIM特約：女人本色》 https://goo.gl/DnbXJA －《阿嫂》 https://goo.gl/cI7kHo －《遠離寒戰，冚家保平安》 https://goo.gl/MT5RSE －［非爛片］《導火新聞線電影版之深宵問答》 https://goo.gl/WwQYfU ────────────────── 歡迎大家加入 Medium，follow史兄： https://medium.com/@relgitsjgFacebook : Facebook page：https://www.facebook.com/Relgitsjg IG (主要用嚟睇女仔) : https://www.instagram.com/iamuncleshit/