港人揀結婚公仔，錯咗都唔知？
(廣東話注意) 早前見Medium唔少作者講開港式婚禮(文章最後有link)，我都想湊吓熱鬧，不過角度有啲刁轉。香港人搞婚禮，有一part唔算係最重要，有時甚至無咗都得，但新郎新娘應該點都會係咁易傾吓呢個問題，就係點樣揀「結婚公仔」嘞。
我唔知外國興唔興呢味嘢，不過香港就十分常見，通常會放花車車頭，又或者放喺婚禮會場個迎賓位。我發覺大家用嘅，好多都係日本卡通公仔，又或者用迪士尼角色。可能新人貪公仔夠得意啦，又或者想討個好意頭，希望兩公婆會好似卡通人物咁，有段童話式婚姻，快快樂樂咁生活落去。
最常見嘅有Hello Kitty X Dear Daniel、米奇X米妮、大雄X靜香，最近亦見過有人放小雲X小寶寶，其實效果都唔錯。
不過！我有時行街望吓啲花車，就留意到有好多古靈精怪嘅公仔配搭，諗落真係唔多老黎喇。想知有幾離譜？而家就同大家歸納一啲最常見嘅錯法。
1. 亂點鴛鴦
如果男女雙方分別鐘意小新同小丸子，想將兩個公仔拼埋一齊代表自己，除咗山寨感重啲之外，本身都無乜問題嘅。不過刻意揀同一套作品嘅角色，但佢地本身又唔係情侶，就真係幾突兀。
例子︰小丸子X花輪同學
已故作者櫻桃子，借小丸子講自己細個嘅經歷，相信好多人都知道。先唔好計作者本身離過婚呢啲unlucky嘢，小丸子喺故事入面，無特別講過鐘意邊個男同學，但對於富二代花輪同學，一向都係厭惡大過好感多多聲。如果小丸子真係同花輪結婚，點睇都似係BAD END多啲。
2. 雌雄同體影分身
有啲角色背後故事簡單，作者並無設定到主角嘅男/女朋友，但又有新人想要嚟做結婚公仔，於是就發揮創意，將主角複製，然後要佢著禮服/婚紗！成件事除咗「自攻自受」之外，抱歉我真係諗唔到其他詞語去形容。
例子︰SNOOPY、MIFFY
3. 拆散情侶
如果一套作品裡面有情侶角色，咁正路當然揀返呢PAIR啦。偏偏有啲新人鐘意將情侶拆散，然後換一個無乜關係(甚至係死對頭)角色落去，將自己嘅快樂建築喺人地痛苦之上，咁又何苦呢？
例子︰麵包超人、紅精靈
講明先，我都唔太熟《麵包超人》個故事。但據網上情報(咪又係Wiki)，紅精靈雖然係反派(細菌人個妹)，但竟然鐘意咗麵包超人……個friend方包超人，仲發展到瘋狂單戀。但礙於身份懸殊，始終唔敢告白，於是用盡一切手段(包括cosplay)想接近心儀男神，甚至會為咗救方包超人而打返細菌人轉頭。但紅精靈嘅愛只係方包超人限定，同阿哥對住麵包超人一樣唔會手軟。而家將麵包超人同紅精靈呢pair寃家放埋一齊，真係無陰公。
題外話，如果將方包超人配返紅精靈又點呢？其實作者都講過，麵包同黴菌係無可能結合，只會係一場實現唔到嘅單戀。咁唔吉利，用嚟做結婚公仔都真係唔太好。
4. 強行變性
喺香港搞得婚禮嘅，我諗超過99.9%都係一男一女喇卦。但真係唔止一次，見到兩個卡通角色(性別︰男)放埋一齊，仲要幫其中一個著婚紗。如果新娘本身係腐女，成件事都勉強可以接受嘅。又或者新郎覺得自己根本就係同男人結婚，最離奇係新娘又會覺得無問題喎……
例子︰麵包超人 X 細菌人
你可能會以為麵包同細菌都係無性別生物，但原來睇返wiki，兩個都寫明係男性(其實睇外表都知啦)。細菌人係鐘意扮鬼扮馬，但要佢著婚紗同麵包超人開開心心咁結婚，就真係講唔通。更出奇嘅係麵包超人著婚紗都有！其實呢pair死對頭鬥足幾十年無停過，搵離做結婚公仔，係唔係寓意兩公婆將來會日日家嘈屋閉，甚至大打出手？
5. 變性+亂倫
上面所講嘅錯誤都夠晒離奇，但更估唔到嘅係，有新人鐘意玩亂倫！假如好似Little Twin Stars咁，都可以話當係花仔花女吖，但明明係兄弟(有時仲要雙胞胎)，都硬係要將其中一個屈做女人，再湊成一PAIR，亂到咁，真係色情遊戲都未必搵到呢啲設定喇。我實在好懷疑新人到底係咪對角色「0認識」，先會犯咁大嘅錯誤。
例子︰鋼牙 X 大鼻
呢套《花鼠俱樂部》喺80年代尾好HIT，鐘意嘅人都應該唔後生喇。裡面嘅主角就係鋼牙同大鼻，就正正係雙胞胎兄弟，由於太似樣，所以好多人都分唔到邊隻係鋼牙邊隻係大鼻(包括我)。但有睇過嘅，至少都要知道佢地係仔仔吖嘛。上網見到迪士尼都有出過結婚公仔，著裙褂嘅好明顯係女倉鼠(留意眼影、腮紅同眼睫毛)。既然套片都有女角，做乜要夾硬拗攣其中一人要佢地近親相姦呢？
不過有時又唔可以怪新人不求甚解，事關官方有時都會癲埋一份。邊個IP咁離譜？未就係本地出身嘅《麥兜》囉。印象中《麥兜》動畫裡面無提過佢有女朋友，如果官方為咗賺錢，夾硬搵個角色(果啲牛啊鴨啊)同麥兜配成一對，FINE，我會體諒。但係點解麥兜另一半要搵佢表弟麥嘜呢？我仲無意中發現到2013年嘅報紙鱔稿，內文寫住「可愛的麥嘜易服扮作俏新娘已夠搞鬼」，萬聖節搞鬼就話啫，結婚呢啲人生大事都要搞鬼，無嘢啊嘛？
我知，可能有人覺得我太鑽牛角尖，結婚公仔意義呢啲嘢，根本從來都無香港人CARE。卡通人物嘅嘢，求求其其未得囉，況且新人覺得無問題，外人又有咩資格指指點點呢？但既然肯花一兩年時間PLAN結婚，三五七十萬去擺個Dream Wedding，鋪排到咁完美，點解要特登放粒老鼠屎整壞一鍋靚粥呢？
其實結婚公仔有同無，分別唔係好大，好多時都係想討個好意頭咁啫。既然係咁，麻煩揀之前做少少功課，查吓角色背景先決定用唔用，免得淪為笑柄！
【延伸閱讀】