《人情計算機》
原來我喺Medium無放過呢篇文，但簡介又介紹自己係文章〈人情計算機〉嘅作者……感覺似啲model話自己有36E但IG一張show胸嘅相都冇咁。為免觸犯商品說明條例，而家又將〈人情計算機〉炒一次冷飯……呢篇文係2009年作品，經歷無數次炒冷飯，到今日依然（自以為）歷久不衰。
───
踏入九月，又係瘋狂飲宴之時。每年嘅第四季可謂擺酒嘅高峰，記得三十歲頭，隔個星期飲一次，幾乎密過返工。踏入四十歲，要結嘅朋友已經結晒、離嘅亦開始搞緊手續……一年飲五六次啦，少好多嫁咧。
講真，我好中意去飲：
－ 自己應該唔會有得請人飲（有嘅話真係比悲哀更加悲哀嘅悲哀）－就算要結婚都唔會擺酒。
－ 成日喺人哋結婚見番啲失散多年嘅親戚朋友，聚下舊好開心。
－ 香港人最中意睇人仆街。睇住你朋友仆街，賞心樂事也。
－ 最緊要！係唔使諗食乜菜、叫乜餸！我獨居十幾年，每日最煩惱嘅時刻，係放工要諗食乜嗰陣！呢個問題比起我喺公司遇到嘅麻煩，難解決100000倍－佢每日都會出現(Frequency)，對我影響好大(Impact)，無得唔解決(Avoidance)。而去飲就正咧，可樂任飲、菜有人點好，呢道菜唔啱食，下道囉！最後唔夠飽，食多碗伊面、搭多碗炒飯，實夠。
嗱，我上面無話婚宴嘅內容好吸引，好多造作煽情，唔知以為香港抗戰成功……聽朋友講更離譜係外父用技安般嘅歌喉去娛賓－愚賓更貼切－最後朋友要喺婚宴中途離開。
───
我喺呢度提出人情計算機，等大家可以依住呢條方程式，輕輕鬆鬆計算出婚宴要付嘅人情。
唔使再問嚟問去，唔使用劍。跟住數，計計計就夠：
《底價篇》
請飲底價：$800
好恐怖。我十年前寫呢篇文，底價只係$500……十年漲咗60%，升幅幾乎追到樓價（我重申，呢幾年間升幅追得上樓價嘅，只有樓價itself）。更恐怖係，我咁多年嚟都仲係封緊$500……哈哈哈哈哈，唔怪之得少咗咁多人請我去飲。
$800嘅底價係點嚟？對唔治，無得解釋。你以為佳士德拍賣達文西幅《救世主》嘅7500萬美元底價，能夠用科學方法，做完一大輪分析去定咩？你太天真，太傻了－最後都係由Guillaume Cerutti (佳士德CEO)說了算。定底價係藝術，唔係科學。用咗接近40年嘅聯繫匯率（美金1:港幣7.8），根據本地經濟學者何濼生所講，係喺班高官同學者吹水嗰陣定出嚟，唔係根據計量經濟學，亦冇參考學術權威。
屌，總之$800起錶啦。一收到張帖，袋就冇$800－以下嘅嘢就係根據加加減減啦……
《去唔去篇》
唔去飲：-$200至-$300
即係話，大會攝影師幫你影嗰兩張相（可惜你永遠唔會見得返張相） + 乳豬 + 翅 + 炸子雞 + 兩三隻橙，淨值係兩三舊水。
當然，飲咗十幾廿年，我到今日都唔明，點解唔去仍然要畀錢。我覺得去飲係少數「你無享用或使用任何服務但依然要畀錢」嘅經濟活動之一。仲有乜類似嘅嘢？
交稅囉。
酒店擺酒：+$300至+$500
我同你講，畀人情真係藝術嚟。
闔府統請：每位+$300 所謂「經濟規模」（economies of scale）。你冚家一次過嚟晒，慳咗佢要一個一個咁搵人嚟填氹嘅時間同心機。
食西式／午餐：無須理會任何加減，硬掘$600
《背景篇》
認識新娘同新郎：+$100
咁寫係咪好奇怪？皆因我試過去飲，新娘新郎，甚至乎全場一個人都唔識。因為我係戇鳩鳩咁代我老竇去飲……老老實實，我飲完都唔知自己有冇去錯地方。
新娘／新郎係你朋友嘅年期：五年以上，每年+$50
朋友嘅定義為：你有三十歲人，識咗五年之後，一年仲會見兩次以上，每次見面超過兩個鐘，嗰啲先叫朋友。
點解識耐啲要畀多啲？因為，佢結婚之後你好大機會冇咗個朋友……順便畀埋另一種金……（你知道點解少咗咁多人請我去飲未？）
做兄弟：-$300
如果健力士有「做兄弟最多次數」呢項紀錄，我肯定問鼎到寶座－保守估計我做過十三四次兄弟。
次次做兄弟每每做到隻狗咁，要早過返工起身、體力勞動不在話下，仲要一朝早食埋啲唔知乜嘢自製食品。
有時唔知啲姊妹特登整得咁難食，定係佢哋已經盡力去整但依然比想像中更難食。好幾次同姊妹投訴啲嘢比屎更難食，佢哋一副難以置信嘅表情，不斷話「無理嫁由我已經落足心機」（而居然無反問我點解知道屎係乜嘢味）。彭浩翔話啲女人成日喺廁所集合諗計隊冧男人，肯定真有其事。
結論係，減你三舊水人情真係算少。夏天做兄弟，熱到件西裝渣得出汗嚟，減多你一舊添呀。加錢呀頂你個肺！
做兄弟太辛苦，近年有人請我做兄弟，我已經推撚晒。唔係因為我唔愛你呀朋友，而係我太愛你，唔想你結婚嗰日我塊面閪過閪呀！
做姊妹：+$200
做姊妹有利是收，附送折磨兄弟機會，簡直好似萬事達卡咁，此．刻．無．價。如果有人請我做姊妹，唔使變性反串，我包一圍酒席都仲得呀！我有信心一定折磨到新郎接唔到新娘，甚至乎把心一橫去娶過第二個。
做MC：-$500
做司儀幾乎食都無得食。加上要承擔可能講錯嘢嘅壓力。例如：
「祝新郎哥你年年有今日！」
「大家好～我又幫張志明做婚宴嘅司儀咧～」
「一陣睇下邊個死仔喺人情個信封放一蚊入去……」
《增值服務篇》
新郎哥唱歌：-$100
香港人好中意表演。平時我唱歌喺係K房，或沖涼嗰陣大唱特唱，總之收收埋埋。所以我唔明，點解啲男人咁有勇氣喺婚宴上唱歌，仲要(1)明知自己歌喉唔好、(2)唔去練歌、(3)揀首好難唱嘅歌。新郎哥一個二個都係阿舜。
……不過……
新郎哥唱以下任何一首歌：+$200至+$2,000
－〈回首〉李克勤：第一句 －〈幾分傷心幾分痴〉王傑 －〈離開以後〉張學友 －〈安靜〉周杰倫 －〈無賴〉鄭中基。唔係講笑，真係聽人唱過。 －〈餓狼傳說〉張學友：+$2,000。如果新郎係開頭一段狼叫中，忍得住唔笑，莫講話$2,000，兩萬都畀呀！
順帶一提，如果有賓客搶咪唱陳奕迅放題－〈於心有愧〉+〈阿牛〉+〈婚禮的祝福〉，記住封定帛金畀佢。呢啲錢唔慳得。
新娘喊：+$200
講真，好少見到新娘唔喊。不過，喊係一種真情流露嘅表現。
新郎哥多謝屋企人嗰陣喊：+$200
此乃孝之表現。
如果新郎哥見到老婆喊跟住喊：-$500
台上兩個人一齊喊，似哭喪多過辦喜事。女人喊嘅時候，男人應該好好照顧老婆，幫佢解圍。望到你哋一齊喊，我會忍唔住係台下面笑。最癲一次，一家人，新娘新郎爸爸媽媽一行五六個人係台上面喊。我心諗：「仆街，你係薄熙來，冚家準備畀人打靶咩……」
新娘表演吞劍、頂波、玩其他雜項：+$1,000
如果新娘吞新郎哥把劍……嗯……未諗到加錢定扣錢……口爆好似加$500……
姊妹有靚女：每個+$100，if any at all
雖然有呢個付費額目，但你放心，呢啲錢一定唔洗洗，慳番。遇到靚姊妹嘅機會，係零。唔好睇少女人嘅妒忌心。你以為佢結婚嗰日真係最靚？係呀，當世上靚過佢嘅人無分係婚宴出現，咪係佢最靚囉。你估李嘉欣有冇做過朋友嘅姊妹？
你有冇見過太子金都商場啲姊妹裙呀？大部份都係為咗令啲姊妹有咁醜得咁醜、自暴其短／其粗／其細／其肥而設計出嚟。只要你稍為平胸、腰粗、臂肥、腳短、頸長、屎忽大啲、皮膚唔夠白滑，啲姊妹裙都好似放大鏡+照妖鏡咁將佢哋表露無遺。
兄弟有靚仔：每個+$200
嗯……同靚姊妹唔同，呢個世界真係有靚仔嘅兄弟，尤其是當我做兄弟嘅時候。不過，靚仔嘅兄弟，一係結咗婚，一係嚟緊結……不過都唔係大問題，我就聽過有人就嚟結婚，走去做人兄弟；結果溝咗個姊妹，連婚都唔結。呢啲咪叫型囉……
《問答篇》
一如以往，有幾條簡單問答，釋除大家對於人情計算機嘅疑慮：
問：究竟畀人情，使唔使計對方回唔回到本？
答：戇鳩。
我再講一次，戇鳩先會畀人情嗰陣諗對方回唔回到本。
同樣地，只有戇鳩先希望對方封人情嗰陣諗下自己回唔回到本。
回乜嘢本？而家係搞個婚宴，等大家分享結婚雙方嘅喜悅。唔係做生意、唔係投資、唔係付費服務。你可以搞婚宴之前做財務預算，但目的只係預計喺唔同平均人情嘅情況下，自己喺唔同地方擺酒要真金白銀拎幾多錢出嚟，或者決定喺邊度擺、擺幾多圍、請邊個。
有啲人去食自助餐，又係要回本。生蠔$30隻，我食15隻，市值$450，自助餐$400，唔食其他嘢都淨賺$50。低能！你唔肯出街平均畀$30食15隻蠔，即係每隻蠔對你嚟講嘅價值每隻平均唔值$30！計嚟做乜春？我一直唔明回乜嘢本。
好味、食到你想食嘅嘢、滿足咪得囉。
正如去婚宴，做乜要計住計住，斤斤計較畀／收幾多人情？
一講呢啲，我就會畀人話「你都冇擺過酒，唔會明」。如果要明，我寧願唔擺。師兄，你結婚呀！我無迫你結嫁！你冇錢喺四季酒店擺，咪去四季賓館囉。你做個人決定，洞房我又冇份，我點解有義務去承受你決定嘅結果？
我呃鳩完你哋睇咁耐文，而家正式宣布：我根本唔信上面方程式嘅嘢，尤其底價嗰部份。我亦好肯定、好大聲同你講：
「我．絕．對．唔．係．跟．方．程．式．計．人．情」
＿＿＿＿＿＿
問：嘩，你條仆街，打住紅旗反紅旗，咁你其實係點決定封幾多人情？
答：上面條方妙拿咁撚煩，計到人哋離婚都未封到人情。
我封人情有兩個方法，混合使用：
1. 隨心。大致上根據同對方嘅交情而定。
2. 恒指大法。
當然唔係用恒指1點 = 1蚊，否則去飲兩餐隨即搵埋駐場律師搞埋破產（現時恒指約兩萬七）。我係用最新嘅恒指收市價，除以一個數字（最熟嘅10，普通朋友15，完全唔熟嘅20），再計出人情。
即假設某個星期五嘅恒指21,000點收市，星期六去老友度飲，我就會封$2,100做人情（21,000除10）。
＿＿＿＿＿＿
問：你問，如果恒指收21,010點，你咪要封$2,101囉？咪好唔吉利？
答：大佬呀！方妙拿係死，人係生家嘛。你四捨五入去到百位數咪得囉。
最後，煩都要講多次：去飲封幾多人情，爭拗一千年都唔會有定論。
你中意嘅，咪畀多啲；唔中意嘅，咪畀少啲。唔通你畀少啲，你結婚個朋友真係咬你食咩？我試過去飲唔記得放低人情，朋友個仔出埋世我先一次過補返咋、而有個朋友當年搵我做兄弟，佢個女就嚟讀幼稚園我都未封。大家開開心心，當去睇表演咪算，再唔係咪當去食餐酒樓飯。你朋友請得你去飲，只係想大家分享喜悅，一齊開心下。
做人咁撚計較，好撚早死嫁屌你。
Follow me on Medium，我嘅文字唔會令你失望（不過寫文嘅速度會）。 https://medium.com/@relgitsjg
【今年史兄喺Medium所得稿費，將全數用作支援魚蛋革命嘅義士。】
Facebook page：https://www.facebook.com/Relgitsjg