點解香港人英文咁廢？

我係話在座咁多位都係垃圾

機緣際會下我識咗一班ABC英文朋友。英文人之間最流行嘅話題，唔會係TVB或者umbrella revolution：飲嘢唔准講宗教同政治，係常識。所以最hit，最歷久不衰嘅話題，就係恥笑唔識英文嘅香港人。

「哈哈哈，上次去麥記佢哋連hamburger都讀錯呀」

「正話開會要講英文，Peter仔啞晒呀，都唔知佢個degree點讀返嚟㗎」

「都唔知點解香港人啲英文咁廢，they are fucking stupid」

點解香港人英文咁廢？我諗我班英文朋友呢世都唔會明 — — 因為佢哋未試過唔識英文。牛頓第八定律話「有樓可以變冇樓，冇樓就呢世都冇樓」。我諗「本身唔識英文，就呢世都唔識英文」應該可以叫做牛頓第九定律。點樣先可以「本身就識英文」呢？方法一：國際學校；方法二：英美澳加揀個國家，住三五七年。

唔行呢兩條路，你見過幾多個香港人可以跳出呢個框框，由唔識英文，靠返學上堂，變做識英文？

零

點解大家學唔識英文？呢個係一個哲學問題。你諗下「學」字開頭有咩四字成語？

「學海無涯」「學無止境」

上面嘅字有咩共通點？冇結果，冇endpoint囉。即係，大家真係好鍾意學英文。學識咗，就冇得再學，同泛民爭取民主同一個原理。為咗可以keep住有得學，大家唯有用一個呢世都學唔識嘅方法。你學咗廿年嗱？你表現良好喎，好，我恩准你繼續學。唔死嘅話學到九十歲都仲有得學，終身學。好似冇人諗過，我用兩年時間學識英文，跟住我學下一樣嘢㗎喎？

細個嘅時候睇過靈格風嘅廣告，聽講話3個月可以學成外語。我嗰時成日諗，點解學校唔行靈格風呢？每人一套靈格風咪得，炒晒啲英文老師佢啦。（後尾發現原來一套要成 5000蚊，所以都係請班英文先生抵玩啲）Well，如果你係教英文嘅，你會唔會容許呢件事發生？所以咪冇發生囉。

因為推廣呢種可持續學習嘅觀念（同時要保住全港幾千個英文老師嘅飯碗），香港教育局整咗全世界最神奇嘅英語課程。首先佢令到全港嘅細路都要讀12年英文。假設每個星期有7節35分鐘嘅英文堂，喺小學加中學入面，不論你係中文定係英文中學，你起碼用咗人生嘅1400個鐘頭去學英文。更神奇嘅係，你真係學咗好多英文，之但係讀完之後你又真係乜都唔識。

就好似你去教一個𡃁仔游水，但係遊戲規則係要教12年之後佢都唔識游水。可以點教？秘訣就係唔俾啲學生落水。「嗱，我而家教你游水。今年會教大家肌肉嘅構造，然後下年會教手部移動嘅動作，之後我會教好多關於游水嘅規則，分析唔同泳手嘅泳姿，每年年尾我會叫大家喺浴缸考核啦」。

所以話，諗到呢種教學法嗰個，係天才。用呢個方法都學得識游水嘅人，更加係天才中嘅天才。喺香港正正常常返學，都學得識英文嘅人，可能你係愛恩斯坦轉世。

人生最悲哀，莫過於明知一樣嘢唔work，冇用，但係都窮一生嘅精力去做。我會叫呢啲做「知其不可為而為之」。當然我唔係「為之」咗一次。我真係用傳統方法去學英文，學普通話，學日文，學法文……然後學唔識，失敗咗超過十次，再學，又學唔識，………

「知其不可為而為之，雖千萬銀吾往矣」

作為一個平凡人，我想話俾大家聽我失敗咗十幾次之後，點樣學識返少少英文，之後再唔知點解開始學習多國語言。

坊間啲補習名師，個個又A又5**又盛，點解要信你呢？

我唔直接答你，我用例子答你。你有冇試過減肥？嗱，我就跟鄭多燕減嘅。因為我知道佢本身係大肥婆，佢瘦到，即係個方法work。本身勁嘅人就用咩方法都勁㗎啦，係本身好廢，要由谷底都爬得返起身嘅，先至有參考價值㗎嘛。而細佬我：

• 會考英文攞D
• 真金白銀買咗3套靈格風返屋企（好貴，千祈唔好買）

係真係衰到貼地。淨係呢點你已經要聽我講啦。