黃牛飛根本只係IT問題

黃牛飛問題已經開始無咩人提，我就最鐘意過咗個潮流先出文嘅。（慢就慢啦）滿城都係講黃牛，作為一隻IT狗，我認為完全係票務系統太廢嘅問題。

你買唔到飛？bot買到喎！

點解會有黃牛呀？明顯地係買咗嘅人唔係想睇，想睇嘅買唔到先會形成黃牛。一個正常嘅網站應該係serve人，唔係serve bot，如果一個網站要你refresh 2000幾次先入到買到，佢真係想俾人買飛？

對呢堆仆街票務系統來講，邊個買到飛從來佢哋都唔care，佢哋只係想收手續費，話知你南亞定撒亞人，係人定係bot，最緊要磅水。要upgrade套system？根本就冇對手，為你班蟻民投資？你都on99。

點解bot會買到？

bot買到而你買唔到嘅原因得一個，就係因為server唔夠資源serve你，而你又唔夠bot咁快同咁有恆心，同埋有d濕尻網入唔到，佢仲會redirect你去一版垃圾page，你再F5只係不停load緊話你知入唔到果版垃圾，仲衰過俾個500 error你！結果你要先back一次，或者paste返原本條url再enter，咁點可能贏到bot呀？

要去block一個bot究竟有幾難？係咪要用超前技術先做到？

屌你老母一句code就搞掂啦。用Google隻recaptcha，有幾難？應該仲未有AI破到，一個剔就知你係人定係鬼，同傳統果d連人都考起嘅驗眼圖片完全唔同次元，實屬Google自家黑科技。你如果refresh幾次佢就會出IQ題考你，寫bot嘅你真係有信心同Google d AI鬥？你個對手係識寫AI嘅AI，無人喺入面返工架！（資料提供：果d圖，字嘅captcha一個簡單AI可以90幾%破到，咪撚再用啦唔該。）

提實名制嘅人都係9upper

實名制係可以完全杜絕炒賣，正如機票，你無得轉名嘅話就只可以你去，完全冇炒賣空間。係正喎！不過，買飛要實名，但你點enforce入場都check到係果個人？

你諗返搭飛機你要早幾多去到機場？出機票，驗證件，檢查行李到底要幾多時間？一架A320裝得果200人都要提早咁多，紅館成萬個位要幾多人力物力去check？最有效率嘅實名驗證機制就係，自助出入境果set閘機，有種就成套搬過去囉！問題係政府係咪會咁樣投資做實名入場？身份證都當你做到啦，但你計吓條數。當你2分鐘做一個，俾你50台機，每台機要應付200人，即係要400幾分鐘，即係起碼要6個鐘先俾晒d人入場。你睇演唱會果日係咪會請半晝去排隊入場？仲要係分批入，個個迫哂7點入嘅話包你演唱會完咗都未過到閘。喂，仲有大陸同胞嘅通行證，海外fans嘅passport呢？咁咪要整返個人手counter？老人家大肚婆外交官要特快入場咁又點算呀？不如每個場館都歸哂入境處去run啦笨！根本已經係一個關口嚟！

我買咗飛，我係咪一定得閒去？果日我係咪唔可以病？我本來諗住同條女去，但提前咁多買定飛，我已經換咗第條女，實名制下，唔通一定要我面阻阻坐個ex隔離睇黃子華咩！外國經驗，你唔俾人轉名，就一定要做退票，呢d係消費者權益。點樣退？上box office或organizer office先退到，到時一定會多咗人要退款，我真係唔知你要請多幾多人去做，通利果d一定同你死過。當然一d好用嘅payment gateway都會提供refund api，credit api嘅，但有時買飛果個人未必係應該收到退款嘅人，我幫個friend買咗飛佢已經俾咗錢我，用credit card退，咁我唔俾返錢個friend人間蒸發埋賺咗？退多幾步講，就算有得退飛，退咗嘅飛會唔會再有人買得返，點通知d人嚟再買，幾時cut off，到最後點樣影響入座率，我只係睇到organizer預期係比而家蝕底。真係有risk真係蝕錢嘅，最後肯肯定又係羊毛出自羊身上，梗係消費者孭啦！買張飛嘅手續費一定會大幅提高。

完全執行唔到嘅idea就唔該你唔好當solution咁講出嚟啦，人唔笑狗都吠呀！

買家非用家問題

如果真係咁care買家唔係用家，喺checkout page度加返set multiple choice問題，問返開演唱會嘅unit相關嘅問題，例如幾時出道，問歌詞之類。個pool夠大就可以每人rand gen幾條，答中俾買答唔中就唔俾買，IT狗角度容易過食生菜啦，根本唔係做唔做到問題，而係有冇人夠膽做嘅問題。買飛果吓爭分奪秒，仲要答問題，咁大壓力唔係個個都受得嚟架，有時就算識都會突然答錯架嘛。

抽籤買飛

久石讓果隻抽籤買飛，根本就只係令系統負荷減低嘅權宜之計。拉長個selling period，自然同一時間衝入嚟嘅人就會冇咁多，渣到爆嘅系統爆鑊嘅機會自然細d。但IT角度，一個purchase嘅process，split做抽籤，買飛兩個process，真係on9到冇朋友。人哋所有ecommerce tools都係諗緊點樣幫你click少個制，打少隻字，你竟然玩到分兩次仲要隔咁耐先俾人完成個process。UX上完全係大倒退，絕對係劣幣級做法。

payment gateway通常都會提供authorize and capture嘅mechanism，簡單d講就係好似你去酒店碌卡簽deposit咁，果個只係一個authorize嘅動作，係冇俾到錢，你月結單上亦唔會有呢條transaction。如果無必要，佢係唔會call capture嘅。抽獎大可以用同樣機制令件事變成1－step process：先authorize，抽到再capture，咁就唔使再返轉頭先俾錢，大大提高conversion rate。

不過業內朋友爆料，話原來呢種做法係因為牌照問題。一般唔涉求俾錢抽獎嘅，只需要申請【推廣生意的競賽牌照】，過程比較簡單，費用亦低。但只要涉及俾錢抽獎就唔係單單呢隻牌照就得，係要申請【有獎娛樂遊戲牌照】。即係之前著名嘅嘅五月一番賞事件咁，亦因為咁所以細個喺報攤玩嘅抽獎遊戲而家都冇再喺市面見到啦。

合理解決方案

其實只要有一個網上平台，可以block到bot，可以頂到幾千人同時入嚟買飛，基本上就滿足到一眾用家嘅需求，如果真係供不應求，炒賣點都會有架啦，市場經濟下必然發生亦都冇辦法可以阻止。

先進少少嘅解決方案

歐洲有間叫 Blocktix 嘅公司，已經做好咗套dApp，用ethereum嚟做賣飛，買飛用ETH或佢original token TIX，入場可以用wallet入，仲搵埋KennyG做代言人。你點都唔會俾咗成個銀包人去入場掛？同打mobile game link gmail／itunes account一樣，你要做到買賣個麻煩係大到你唔想去做。咁樣間接地係一種實名制，當然成效如何，就要再睇啦。

唔好以為呢個係ICO scam，人哋已經annouce咗七月就會有live event試運作。

FF完，不過香港班大帝肯用錢做好個系統係無可能嘅。認真寫完呢篇文都唔會幫到件事，不過都希望大家幫手share，尤其係IT同業，唔好俾政府借d咦又攞多d data，又搞到閒日冇得睇concert。