香港人都有病 — 太多個零搞唔清幾多症

黃子華講過當你去同觀音借庫嘅時候，借幾百萬又有，借幾千萬又有，但無乜人借幾億。

佢解釋話，因為D人唔知道幾億可以點樣洗，佢啱，因為當一個數字，大到某一個位嘅時候，香港入面就有一堆病人，無辦法知道佢究竟有幾多，或者幾大。

佢地只會知道係「好多」、「好大」，但實際上呢，對於10000億同1億嘅差距，佢地無概念。

即係話當D「0」多到某一個地步，例如8–9個左右，病人除左「好多」、「好大」之外，就無辦法再明白更多。

所以呢個病個名有D長，叫做「 太多個零搞唔清幾多症」，實在太多個零啦，我真係唔知有幾多。

一千萬可以買五架跑車，二十億呢？唔知了。

其實中學有學過一種叫指數記數法嘅方法，去比大家表達呢D後面有咁多個零嘅數字，去比大家學識佢地究竟有幾多呢個概念；但係當然啦，「讀數學都無用」，所以有好多病人都仲係唔知一萬億究竟有幾多。

施政報告話會用10000億儲備去起人工島？ 「So what？咁就係用好多錢囉，咪同起高鐵差唔多囉，你睇下而家高鐵通左車幾方便？」

講上面D野果D病人，你可以好好心機咁解釋比佢聽，其實高鐵「只係」用左幾百億，「明日大嶼」係會用好多好多錢。

但佢地唔會明白，因為呢個「 太多個零搞唔清幾多症」係一個病，你同一個感冒嘅人講，叫佢唔好發燒係無用嘅，因為個病會令佢發燒。

所以「 太多個零搞唔清幾多症」嘅患者，無論你點講，佢都係唔知究竟有幾多。

「香港要向前行丫嘛！」病人會咁樣同你講。

咁病呢，之前都講過，得兩個結果，一係好返，一係死。所以而家香港呢個「明日大嶼」倒錢落海計劃下面，香港嘅結果都係得兩個，一係仆街，一係好撚仆街。

雖然諗深一層，即使全香港人都無呢個「 太多個零搞唔清幾多症」，呢個「明日大嶼」計劃都仲係會繼續進行，因為制度嘅問題，我地除左推翻呢個制度之外，根本無咩方法可以阻止佢地搶我地錢同強姦我地。

所以唔講填海呢個問題啦，講返個病。

呢個病有一樣好神奇嘅野，就係病患者會因為樓價嘅上升又或者通脹而少少少少咁將自己明白嘅數字向上調。

即係話，1999年黃子華講果時，大家借極都係幾千萬，我肯定2018年今年，觀音姐姐已經借緊幾億幾億咁出去。

而當整個社會幾十億、幾百億、幾千億、甚至乎一萬億咁比人呃嘅時候，唔會在乎嘅病人佔左社會大多數嘅時候，我地其實真係無乜可以做。

因為講真，只要一日病人覺得「讀數學無用！」又或者「你做乜要搞到D問題咁複雜啫？」嘅話，呢個病一日都唔會好。

或者，或者咋下，如果有一日瘋狂通脹，明明今日一百蚊可以買到一包米，但係到左聽日一百蚊只可以買到一粒米嘅時候，病人就會因為個數字大幅度上調，然後全部病好。

萬一呢種情況真出現，香港會好仆街，好撚仆街，同埋好撚鳩柒仆街。

但係呢？香港仆完街之後，起返身，可能先係唯一一個可以見到晴朗天空上面藍天白雲嘅方法。