非專業考證：西貢之謎
尋日 Twitter 有朋友感歎香港舊式街道命名，當中人物同地方名來自五湖四海，分分鐘比今時今日嘅普通香港人更有國際視野。仲記得細個好鍾意喺學校圖書館，睇啲有關香港街道、地方名嘅書籍，發現有啲街名、地名嘅由來好有趣。例如東京街嘅東京，唔係指日本東京 (Tokyo)，而係前稱東京 (Tonkin) 嘅越南河內。呢啲以外國城市命名嘅道路，反映出當年香港同周邊地區、城市嘅貿易往來，係香港歷史嘅印記。
同樣關越南事嘅仲有油尖旺區嘅西貢街。西貢街與新界西貢無關，而係紀念前南越國都、現名胡志明市嘅西貢 (Saigon)。不過兩者有個共通點，就係佢哋「西貢」呢個地名都係唔知點嚟。
越南西貢 (Saigon/Sài Gòn)
越南西貢，國語字作 Sài Gòn、漢字「柴棍」。為紀念胡志明，越戰後越南政權將西貢易名 Thành phố Hồ Chí Minh (城庯胡志明)、中文意譯胡志明市。儘管如此，政府未有取締舊名，Sài Gòn 仍獲官方及民間廣泛使用。車站、建築、品牌有以 Sài Gòn 命名者，胡志明市市徽亦同時列出 Sài Gòn 及 TP Hồ Chí Minh 兩個市名，市徽形狀更仿如 SG 二字結合而成。
Sài Gòn/柴棍一名由來眾說紛紜，各有各說法，至今未有確實答案。學者同意嘅係，Sài Gòn 一名自十七世紀初，越南人因南北朝戰爭南逃、逐漸遷入並越南化湄公河三角洲時，就已經流行起嚟。即使喺十七世紀嘅一系列南征、越南確立對三角洲控制、將 Sài Gòn 官方名稱定為 Gia Định/嘉定之後，民間依然習慣稱 Sài Gòn。而喺十九世紀中葉、交趾支那成為法國殖民地後，法國人決定以民間慣用嘅 Sài Gòn 作為當地官方名稱，並西化為 Saïgon。除去 i 字上方嘅法文分音符 ¨ 後，就成為 Saigon 嘞。
有種講法係 Sài Gòn 一名源於柴、棍兩個漢越詞，即漢字「柴棍」本身就係 Sài Gòn 意思嘅來源。由於「棍」喺越南語亦解作棉花，所以有人猜測「柴棍」同以前高棉人喺西貢一帶種植木棉樹有關。另一種講法則認為 Sài Gòn 所指嘅係喺西貢附近嘅樹林，即 Sài Gòn 一名同西貢喺高棉語嘅名稱 Prey Nôkôr (意譯森林城/森林王國) 同源，漢字「柴棍」乃係後加。而除咗呢兩個越南語起源嘅猜測外，亦有人認為 Sài Gòn 一名係源於粵語、泰語、占語、高棉語等。
至於中文名「西貢」又點嚟呢？上面講到越南漢字將 Sài Gòn 作「柴棍」，因此「西貢」應該係僑居當地嘅華人嘅產物。我斷估「西貢」係由明末清初逃入越南、或者係清中葉下南洋謀生嘅廣東、福建人，根據自己母語將「Sài Gòn」漢化而成嘅稱謂。
香港西貢 (Sai Kung/Sai1 Gung3)
至於香港西貢嘅地名由來就更難考據。細個睇嘅街道、地名掌故書，都話西貢相傳係明朝鄭和下西洋後、外國前來朝貢、貿易嘅船隊停泊嘅地方，因西方來貢得名西貢。有網站再擴充呢個講法，指當年珠江口係軍事禁區、由水師把守，未獲准進入廣州嘅船隊唔可以泊喺香港西面水域，只能向東駛、喺西貢對開停泊。但呢個講法我越諗越唔妥。
先睇地圖。明朝長期對民間實施海禁，早期對外貿易多為附屬朝貢活動進行。據史料記載，貢船進入廣州前要先喺珠江口申報，後獲護航至指定泊地待檢，而非由船隊自行擇地停泊。若然西貢一帶曾經係商船停泊待檢之地，理應有士兵喺附近駐紮、並同附近村落、墟市有交集，促成一定程度發展，使西貢一早喺各種地圖、記錄上留名。然而史書、地圖直到十九世紀中葉，都並冇提及、標示到現今西貢市一帶嘅發展。
例如 1552 年 (嘉靖 31 年，網絡多將年號訛作嘉慶) 嘅《蒼梧總督軍門志全廣海圖》就有提及將軍澳、龍船灣 (今糧船灣)，但就冇提及「西貢」。1595 年 (萬曆 23 年) 粵大記嘅《廣東沿海圖》同樣僅提及官富巡司 (今九龍東觀塘一帶) 及將軍澳。1819 年 (嘉慶 24 年) 新安縣志中嘅《新安海防圖》亦未見西貢二字。「西貢」見於香港地圖，要數到 1866 年嘅《新安縣全圖》，此時九龍半島已割讓予英國。
而喺《新安縣全圖》之前西方人繪製嘅澳門、香港航海圖，大多都未有仔細描繪清水灣半島北岸至吊鐘洲以內嘅海岸綫，卻多有畫出維港兩岸、博寮洲 (南丫島) 以及澳門、橫琴一帶嘅海岸綫及山勢——假如西貢真係船隻定期停泊嘅地方，噉各幅海圖將西貢一帶水域略過唔畫就極之唔合理嘞。由此足以推算西貢並非當時外來船隻停泊待檢或避風之地。
基於西貢一名相當晚期 (1866 年) 先出現喺香港地圖上，此前亦未有曾發展出較具規模墟市嘅記錄，加上官府大可安排貢船泊近屯門汛、九龍汛等駐兵地，我認為西貢海面曾為貢船停泊之地、以及西貢得名於「西方來貢」嘅掌故，均為都市傳說或以訛傳訛而成。
噉西貢呢個名嘅真實由來係點？我都唔知。要我斷估嘅話，我估計「西」字的確係同方向有關，但「貢」字本來就未必係指朝貢，而係由其他字變成。需知香港好多地方名都改過嚟，原因不外乎都係避諱雅化。因此我估「貢」字係由其他意思比較普通、低俗或唔吉利嘅字雅化得來。就好似相傳有老虎經過要大步行嘅「大步」變「大埔」、龍游淺水遭蝦戲嘅「淺灣」變「荃灣」噉。
後記
好心啲網站就唔好再係噉傳啲冇根據嘅講法啦⋯⋯Google search 嗰陣十個結果有九個都係同一段「西方來貢」嘅謠傳，只得一個表明西貢一名無從考究。當然啦，鄭和下西洋喎、貢船嚟香港喎，咁巴閉嘅嘢梗係抄咗先算啦。但呢個講法真係好唔合理呀嘛。
此外我亦無意中 search 到個約略係呢段「西方來貢」傳說嘅澳門版：「明朝廣州市帕司曾遷至高州電白 (今茂名市內)，及後再遷至澳門。」同樣係一個聽落冇乜道理但廣為流傳、僅有少數網站駁斥嘅講法。不過我對澳門唔熟，孰真孰假就要留返俾其他人考據。
