青年開遮係暴力，警察開槍係慈母

每逢關鍵時刻，啲所謂中立人士又出黎暴露佢地嘅五毛真面目，相信大家身邊，FB 同 whatsapp 都有咁嘅人。講緊就係啲成日話自己中立、唔講政治，但永遠鬧緊民主派同年輕人果類人囉。特徵包括：

話反對暴力，青年開遮就譴責，但警察開槍又唔譴責。

叫大家理性討論，鬧民主派唔討論，但無視政府拒絕大辯論。

叫大家停一停，問年輕人咁激進做乜，又唔問政府咁急立法做乜。

叫人多了解，問年輕人反對前有冇睇內容，又唔質疑支持者有冇睇內容。

話大家各有立場要多諒解，但唔諒解通過咗送中我就唔可以再表達立場。

話最衰都係政黨，但永遠係鬧緊民主黨，唔見佢鬧共產黨。

話外國勢力介入搞亂香港，不過對中國勢力介入搞亂香港冇意見。

話議員咁樣點教細路，但律政司帶頭犯法、財政司帶頭劏房、警察開槍，又唔見佢話影響教細路。

反對粗口，示威者爆粗就唔啱，3萬警察同社團人士X市民老母就扮聽唔到。

佢鬧人就得，你串佢兩嘴就唔得。

有啲人 (i.e. 老豆老母) 就同我講咩唔同政治立場啫，唔洗搞到咁personal。講真，sorry，我覺得依家唔係政治立場問題，係人性善惡問題。對於依類人，我好難唔質疑佢係人格有問題。咩平日佢都好有禮貌好nice乜乜乜，我就聽過話阿希特拉身邊啲人都話佢唔發火時都對人好有禮貌好nice㗎。