靈光一閃再閃，法國晉身四強

世界盃八強賽事揭開戰幔，由星光熠熠嘅法國對住藍領兵團烏拉圭。呢場波雙方都唔算「夫添」出賽，法國有正選左翼馬杜迪停賽，烏拉圭有射手卡雲尼因傷缺陣，由史杜安尼頂替。

法國上場驚險淘汰美斯同阿根廷，年僅 19 歲嘅翼鋒麥巴比鋒芒畢露，加上陣中有基斯文同普巴等球星壓陣，牌面上似乎稍稍佔先。不過烏拉圭喺對葡萄牙一役展現嘅機動性同效率一樣唔少嘢，更重要嘅係佢哋毫無錫身，身體質素又好，埋身肉搏 (甚或踢老鬼波出少少超技術) 隨時壓倒踢法較陰柔嘅法國隊。

比賽初段由法國主導，兩閘柏華及盧卡斯靴南迪斯不時助攻，基沙文同麥巴比伺機喺中路入楔，但係烏拉圭嘅四人防線加上三個防守中場包圍禁區相當嚴密，反而係烏拉圭反擊嗰陣由蘇亞雷斯做第一點，兩閘拿薩特同卡沙利斯策應，不時威脅法國防線。其中法國右閘柏華身型較單薄、踢法較斯文，先後被敵軍以身位壓制或侵犯，日子相當難過。

埋門方面，烏拉圭有史杜安尼施射斜出，法國亦有麥巴比接應基奧特頭槌攻門高出。如果你問我，呢場波烏拉圭就似馬德里體育會，先求穩守，指望蘇亞雷斯 (之於馬體會嘅基沙文) 策動攻勢，但冇咗卡雲尼就好似馬體會冇咗迪亞高哥斯達咁，容易被對手封殺。至於法國呢，某程度上係似曼聯嘅，兩閘出擊之餘，基奧特好似盧卡古咁作為前線柱躉爭取先機，並喺陣地戰上保持耐性，長傳轉邊以求猜散對方防線，代價就係攻勢迂迴同唔入肉。

冇咗馬杜迪嘅法國起用杜利素打左邊，但係佢助攻助守嘅作用都明顯有所不及，間接令盧卡斯靴南迪斯工作量增加，並喺上半場中段領黃牌。蘇亞雷斯見有機可乘，馬上喺右路發難，不過隊友埋門一腳唔爭氣，讓法國門將羅利斯輕鬆化險為夷。

完上半場前五分鐘，法國喺右路博到罰球，基沙文左腳開個內彎波⋯⋯唔知係咪普巴或安迪堤目標太大，烏拉圭班後衛居然睇漏咗華拉尼，畀呢位皇馬中堅窒一窒步就擺脫敵衛、有空位銅頭一搖頂成一比零。烏拉圭馬上作出回應，同樣係右路罰球，卡沙利斯人堆中頭槌攻門，可惜被羅利斯橫身單手擋出。半場法國就咁領先一球。

唔知係上場搏得太盡，抑或係卡雲尼缺陣嘅影響，烏拉圭今場嘅表現似返分組賽階段嗰隊，缺乏創造力、行軍唔算快、想谷都谷唔起嘅慢波。蘇亞雷斯算係好畀心機造就隊友，但係缺少咗卡雲尼，就係爭咁啲囉。總唔可以大貪到話蘇亞雷斯右路落底傳中，蘇亞雷斯禁區內接應攻門咁樣樣架。

反而法國揸住一球在手，繼續有耐性慢慢猜，博到罰球由基沙文或麥巴比斬入禁區，每每都製造到險象。烏拉圭不甘於畀法國隊消磨時間，未到 60 分鐘就換人，都係相同位置嘅調動，基斯頓洛迪古斯及麥斯高美斯後備上陣。

不過換人未見成效，烏拉圭就多失一球：麥巴比中路交畀左邊嘅基沙文，後者離門廿幾碼射門，力水一般但係相當之飄，今屆表現一直平穩嘅門將梅斯利拿居然彈琵琶而將個波送入網頂。烏拉圭再次旋即反撲，基斯頓洛迪古斯禁區頂左腳射地波僅僅出界，不過即使命中目標亦可能畀羅利斯救出。

當大家見到卡雲尼仲著住件龜背坐喺後備席、絲毫無意慾去熱身嘅時候，場波嘅形勢大致都塵埃落定。不過冇得踢波啫，人就有得踢嘅。麥巴比打完一下後肘畀隊友之後，無波走位畀基斯頓洛迪古斯 (又係佢，後備上陣存在感都好高) 用手抽咗下水，麥巴比就撻落地，好似巴黎聖日耳門嘅隊友、巴西隊嘅尼馬上身咁典床典蓆，烏拉圭隊長高甸見到就把幾火拉佢起身，然後大家就一齊起鬨蘇亞雷斯老遠跑返嚟叫囂，要勞動巴塞隆拿嘅隊友安迪堤勸阻，尚差一張就要停賽嘅普巴仲由勸交變成撩交打，㩒低烏拉圭中場蘭迪斯個後腦，又畀教練迪甘斯省咗一鑊。

如果你問我，法國呢場贏波嘅功臣固然有基沙文同麥巴比，但係勤勤懇懇、默默耕耘嘅防守中場簡迪都好重要，畢竟佢作為防線第一道屏障都破壞咗好多對方嘅攻勢。門將羅利斯都有幾下撲救相當重要，如果好似葡萄牙咁一個唔小心畀烏拉圭佔先然後龜縮，法國單憑球員個人質素，喺組織唔算流暢、戰術同合作性都冇乜過人之處嘅情況之下，其實冇乜板斧致勝。

由於場波早早進入垃圾時間嘅關係，我其實好想未到 80 分鐘就㩒掣出文嘅。不過既然仲有時間，我又再講講法國四強嘅前景。

• 首先係教練迪甘斯嘅調度問題：當場波都擺咗入雪櫃，點解只係換走副選中場杜利素？普巴、基奧特、柏華三個必然正選都孭住張黃牌在身，其實冇必要畀佢哋冒險。
• 其次，下場對手無論係巴西抑或比利時，級數都遠比烏拉圭或丹麥為高，喺普巴遲遲未上力、麥巴比樹大招風嘅情況下，一對二閘助攻嘅責任必然更重，亦意味住對方邊線快速反擊隨時有機可乘。無論係韋利安抑或係夏沙特，下一場對住法國都應該有幾多空間發揮。
• 馬杜迪嘅復出對於球隊左路攻守會有好大幫助，但係右邊⋯⋯旨意麥巴比回防助守定係普巴安守本份協助柏華？

阿根廷同葡萄牙次圈出局，說明咗冇「單天保至尊」呢支歌仔唱。法國以幾位球星撐起球隊，但論戰術同論團隊合作都唔算突出，要殺入決賽，恐怕仲要多一點點運氣。