隨想 #89 — 桌遊之夜 — Dexit — 說話含糊也是人生生存之道

我諗好多人喺 Cafe 都玩過 Dexit，或者其實你玩過，不過唔知道呢款遊戲叫 Dexit，不如我講吓遊戲規則睇吓有無喚起到大家少少印象。

• 遊戲每回合輪流揀出一個主持人，喺手上 6 張卡片揀 1 張，然後根據卡上面嘅圖畫講一句句子(aka 故事)，然後牌面朝下放喺枱上面。
• 主持人以嘅參加者根據故事內容，喺手上揀 1 張同剛才句子內容最似嘅卡片，一樣牌面朝下放喺枱上面。
• 主持人將所有牌洗混，然後逐一將卡片打開。
• 所有參加者一齊競猜主持人打出嘅卡片，然後主持人就會開估。

遊戲規則好簡單啦，即係主持人揀牌、講句子、其他人又出牌、再一齊估，就係咁喇，不過最唔簡單嘅係計分方法。

主持人以外嘅參加者當然想估中主持人張牌，不過主持人只要講到九唔搭八，明明張牌上面係一隻兔仔，但係就話係一嚿雲，咁就肯定估唔到啦係咪？

No No No，個遊戲唔係咁玩的，重點係喺個計分方法嗰度。

Dexit 計分方法

• 如果所有參加者都「估中」正確答案，又或者所有參加者都「估唔中」正答案，主持人得 0 分，所有參加者各得 2 分。
• 如果只有部分參加者猜中正確答案，主持人同猜中謎底嘅參加者各獲 3分。
• 如果參加者攞出嚟卡片獲得選票，每有 1 票將獲得 1 分。

即係話主持人嘅遊戲目標，就係講一個玄之又玄、含混不清、似是疑非嘅故事，令唔係個個人都 get 到 (否則會 0 分)，又唔會令每個人都 get 到 (否則又會 0 分)，但又偏偏有一兩個知音人，咁就 fit 喇！

而作為參加者，除咗要做呢個「知音人」，仲要諗下點誤導你身旁嘅對手。嗱，故事就係主持人決定咗架喇，但係每個人手上都有 6 張牌，有無一張可以成功令到身邊參加者「諗埋一邊」呢？呢個就考大家功力喇。

Dixit — 說話含糊也是人生生存之道

Dixit 係拉丁文，譯做英文大概就係 He / She said，所以卡片點樣唔係重點，重點係你點講嘢喇。

遊戲好簡單，但係就一隻百玩不聊嘅 party game，1 分鐘學識，4 人或以上就可以玩，理論上幾多人玩都可以，亦係 2010 年嘅 Spiel des Jahres (Game of the Year 啦)，幾勁架。

Dixit 之所以有趣，因為佢要求大家將說話講得含混不清，講真話好簡單、講一個完全脫離現實嘅謊言亦好容易，但係要講一個虛實之間嘅故仔就好難喇！

或者人生都係咁，歷史總係沉悶嘅，但係經過加工嘅歷史故事就總係有趣；或者夫妻相處之道都係咁，講真話即死 （肥咗喎）、講假話亦唔掂（邊有，肯定套婚紗仲著得落啦）。

遊走於虛實之間，就係人生生存之道啦。

關於華田：
兒時夢想做i-banker，結果做了bank worker，還要是retail那種。過去在各大小銀行不同部門流徙，叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發，到現在還未安定下來。不懂財經、不懂經濟，只想談一下「銀行」這回事。

2021 年開始 Medium 只會發佈部份文章，想知最新銀行 insider insight，就要訂閱我 Patreon(patreon.com/watin) 喇！2021 年 8 月 Medium 再次改制，讀者可以選擇將一半既 Medium 會費撥繳至你喜歡既作者。如果你想喺 Medium 上面支持我，可以去以下呢條 link (watin.medium.com/membership)登記做會員哦！

華田銀行 FB: facebook.com/WatinResearch
華田銀行 IG: https://www.instagram.com/bank_of_watin/
華田銀行 HKET 專欄： https://wealth.hket.com/sraw116/華田銀行