隨想 #66 — 回家的路、療傷、花果飄零的香港

突然翻起呢篇舊文，兩年差唔多已經過去，諗番起當晚，仲留低喺香港 / 公司嘅人已經所剩無幾 (定係經已全數清倉？)。

大家傷痛仍在嗎？或者大家已經無再回頭望，走與留，大家已經學識一切只向前看喇。

—

原刊於 Patreon — 2021 年 12 月 11 日 — https://www.patreon.com/posts/59781116

今日其實想講吓文學。

記得幾年前田太幫手一個 world literature 既 course，入面有講到 “diaspora” 既課題。我諗 diaspora 呢個字唔係好多人認識，勉強可以譯做「離散」，詞源可以追溯至希臘語 diaspeirein，意思係 “to scatter, spread about”，其中 dia- 意思係跨越、speiro 意思係散播，唐君毅先生筆下既「花果飄零」大概都係呢個意思。

用西方既角度睇，<<出埃及記>> 可能係史上離散文學既第一本巨作，描述猶太人被迫離開認許之地既一段歷史，之後離散文學既另一高峰就係後殖民時代，無論係殖民者要番去家鄉，定係被殖民者為咗理想同生活去宗主國尋找機會，都出現大量描述個人甚至一個族群離鄉別井 (自願也好、被迫也好)、一方面思想行為都向主流文化靠攏，另一方面因為無法剝離原居地既文化習慣，繼而產生身份文化認同危機既文學作品。

呢類離散族群好多時會喺新既居住地形成一個次文化族群，並且開始集體地喺意識上建構一個經已逝去、甚至根本從=來都無存在過既原居地面貌。

係吖，即係留低既人同已離開既人，隨住時間推移，大家所認識既香港會愈行愈遠咁咯。

散水飯與一份禮物

琴晚又一餐散水飯，離開與留守的各自道別，有一刻我覺得原來人生同工作都係好兒戲的，哪怕工作上有幾多恩恩怨怨，最後大家都只係人，理你係高層定低層，最後面對既人生問題其實係一樣的。

在座唔單單有準備離開呢座城市既人，仲有對呢間公司已經失望透頂、要另尋出路既人，仲有營營役役 30 年，赫然發然人生原來係場倒數計時賽，係時候爭取時間開始下半場既人。

琴晚雖然有好幾個人散水，但係我只係好小家地預備咗一份禮品，無咩原因，純綷另外幾位唔足以 friend 到要我花神諗吓送咩禮品，我亦唔太介意畀人發現我只係預備得一份禮物。

同事是什麼？只有當大家都踏出呢間公司，我哋先係朋友，而今日當你踏出呢度，我亦無打算同你做咩朋友咯，咁我做咩要送禮物畀你呢？

療傷與回家的路

最近同一個搞開社運既老朋友傾起佢既近況，佢話最近都忙碌於辦一啲療傷活動，有人受傷所以選擇離開，而留低既人撐過第一次傷害，卻因為離開既人受到第二次傷害，佢覺得佢有責任去幫吓呢班人，同時都幫吓自己。

其實我無怪佢哋，離開唔見得比留低容易 (唔一定更難，不過一定更煩)，我希望大家仍記得回家既路，唔係嗰個經已逝去、甚至從來都唔存在既家，而係呢個我仍然留守緊 (或者亦都已經就快撐唔住) 既香港。

一切非常好運吧。