隨想 #114 — 人大了，關於 Fantasy Premier Leauge，這是我總結的 3 個人生領悟

(原文刊於 24 年 2 月 4 日 Patreon)

有讀者問點解咁耐無寫「人大了」系列，因為我而家職場上位處食物鏈最底層 (知唔知邊個叫 Jose？)，無同學仔得閑唔時刺激吓我，咁咪無咁多「人大了」系列咯。

不過呢個係 evergreen 系列，隨時都可以重溫吓嘅…

Patreon 傳送門：

無後生仔刺激我，又唔代表人生無領悟嘅。今日同大家分享一吓玩 Fantasy Perimer Leauge 嘅 3 個人生領悟。

唔知咩叫 FPL？唔緊要，入正題之前簡單介紹吓 FPL 係點玩的，已經係知深玩家嘅，就可以自動跳入正題喇。

Fantasy Premier League 係乜嘢遊戲？

如果大家有睇開英超，就好可能有玩 FPL。遊戲玩法大概是咁的：

喺 FPL 入面，每個玩家需要每週組建自己嘅夢幻球隊，挑選現實世界入面真正嘅球員，並且根據佢地喺「真實比賽」嘅表現嚟獲得分數。

例如今週 (week 23) Spurs 球員 Richardlison 攞到 15 分，因為佢呢周對住 Everton 入咗 2 球 (10 分) + 上陣 90 分鐘 (2 分) + 全場表最好 (3 分)，所以總共攞到 10 + 2 + 3 = 15 分。

當然遊戲係唔容許大家全部放晒最出名嘅球星落陣容的，因為每個玩家都有一個固定預算，頂級 / 知名嘅球員嘅價格會比較高，大家亦唔能夠只放入波機會比較高嘅前鋒，而要放夠足夠球員喺前中後龍門四線。

喺有限預算、有限陣容要求吓，成隊波點砌，就要考吓大家喺平衡球員價值同潛在回報嘅能力同眼光喇。

咁呢隻遊戲可以有咩人生領悟呢？聽我講埋落去啦！

領悟 1 — 有好成績當然重要，但表現持續穩定可能更重要，人生都係咁啦

由於我唔係職業球迷，所以截至今週 (week 23) 喺全球 1,100 萬名玩家入面，我只排大約 50 萬名，叫暫列 top 5%，純綷娛樂吓咁啦。

不過幾有趣嘅係，喺暫時 23 週入面我只有 2 週能夠僅僅進入全球排名 50 萬名以內嘅，有圖為証，Game Week 23 Overall Rank (OR) 係 492,549，而如果睇番每週分數，只有 Gamw Week 20 同 22 嘅 Game Week Rank (GWR) 係 50 萬名以內，有 2 週甚至衰到去接近 1,000 萬名咯。

點解會咁？因為所有人都會有 ups and downs，要入全球 50 萬名以內，係唔需要每一週都喺 50 萬名以內嘅，甚至可以係每一週都入唔到 50 萬名，個 overall rank 一樣可以入到；同樣道理要做世界排名第 1，其實真係唔需要任何一週攞世界首名的。

代表啲乜？有好成績當然重要，但表現持續穩定可能更重要咯。

人生係場馬拉松，我諗大家都明，不過就係好容易會沉迷於自己「某段跑得特別快」嘅光輝歷史，「頭 5 公里我排第 1 架」！

Sorry，無人會 care 你頭 5 公里跑第幾 (除咗你自己)，大家只關心邊個最終第 1 名衝線，當然你唔能夠段段包尾，但真係唔需要太沉迷一剎那光輝咯。

「搞錯吖！佢一個分站冠軍都無攞過過，但係佢係全場總冠軍？」

有好成績當然重要，但表現持續穩定可能更重要，人生都係咁啦。

領悟 2 — 人和重要，天時地利一樣重要，人生都係咁啦

咁係咪揀晒最勁嘅球員就得呢？

當然大家唔能夠揀啲太廢嘅球員 (甚至根本無得上陣嘅球員)，不過呢個只係「人和」嘅部份，大家揀一個球員，唔單單係揀佢嘅能力，仲要佢背負住嘅「天時」同埋「地利」。

即係咁，暫時今週嘅得分王係 Aston Villa 嘅前鋒 Ollie Watkins，Game Week 23 斬獲 1 入球 3 助攻，攞到驚人嘅 18 分！

咁佢都勁嘅，我今週都有放佢 (仲 assign 咗 Captain 有雙倍分！)，不過佢攞到 18 分唔單單因為佢勁，仲因為佢今週對手係榜尾嘅 Sheffild United ！

而要有單場 1 入球 3 助攻，即係球隊最少要入到 4 個波先得，仲要球球佢都有參與！英超又有幾何會一隊一場入到 4 球呢？

好少，不過今週 Aston Villa 係入咗 5 球咯！

大家睇番全球頭 100 名球家，真係無咩邊個呢周無放 Ollie Watkins。

又因為遊戲規定 (唔出 wildcard 情況下) 每周只可以轉換一個球員，應該無咩邊個頂尖玩家會換佢走，因為 Aston Villa 下場雖然會辛苦啲主場對曼聯 (今日嘅曼聯只係中游球隊，呼…)，之後 3 場係現時排名12、17 同 16 嘅Fulham、Nottingham Forest 同 Luton，入番幾球都幾應該吧。

球員水準當然重要，球隊主場定作客亦好重要，對手水平就更重要，而球員 (或者佢啲好拍檔) 有無傷患出唔出到場就當然更更更重要啦 (出唔到場講條鐵咩)！

FPL 係一個揀球員嘅遊戲，更係一個揀主客場、比賽對手、傷患問題、球隊狀態、球隊賽程嘅遊戲！

人生都係咁，最後都係一班人喺一個空間做一啲事，但係「人和」背後，更多係「天時」同「地利」。喺問「我做乜嘢先可以成功」之前，不妨先問吓「幾時喺邊度做乜嘢先可以成功」吧。

人和重要，天時地利一樣重要，人生都係咁啦。

領悟 3 — 份內事唔好出錯，份外事要偶有佳作，人生都係咁啦

喺 FPL 入面，都係 1 個入球，各個球員得分可以係唔同的，前鋒會有 4 分、中場會有 5 分、後衛就會有 6 分。

又同樣都係不失球 (clean sheet)，後衛會有 4 分、中場會有 1 分、前鋒係無分的。

又可樣係失波，每失 2 球後衛會倒扣 1 分 (喂，已經無咗 clean sheet 嗰 4 分架喇)，但係中場同後衛就唔使扣分。

點解會咁？因為做好防務係後衛嘅份內事，所以失波唔單單要令後衛無咗 clean sheet 嗰 4 分，仲要扣分添咯！

又不過咁，由於入波更多係前鋒嘅責任，而後衛係唔 supposed 入波嘅，所以同樣係入波，後衛入 1 球就有 6 分，而前鋒就只有 4 分。

呢個就係「份內事」同「份外事」嘅分別，「唔係一隊波 11 個人一條心只享榮辱嘅咩？」，傻啦，又唔見 11 個人都可以用手接波？又唔見 11 個人人工都一樣？

做人嘅嘢，份內事千祈唔好出錯，失波對後衛嚟講係扣分項，失一球也太多；同時入波永遠係多多益善嘅，份外事亦要做吓，好似 Tripper 呢啲帶刀侍衛，全球有 39.7% 玩家都有揀，係英超 261 個後衛之中最多人揀嘅一個，大家明白係咩原因啦。

份內事唔好出錯，份外事要偶有佳作，人生都係咁啦。

人大了，關於 Fantasy Premier Leauge，這是我總結的 3 個人生領悟

今次藉住遊戲同大家分享 3 個人生領悟，分別係：

有好成績當然重要，但表現持續穩定可能更重要，人生都係咁啦
人和重要，天時地利一樣重要，人生都係咁啦
份內事唔好出錯，份外事要偶有佳作，人生都係咁啦

下次再同大家分享「人大了」系列。

—

關於華田：兒時夢想做i-banker，結果做了bank worker，還要是retail那種。過去在各大小銀行不同部門流徙，叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發，到現在還未安定下來。不懂財經、不懂經濟，只想談一下「銀行」這回事。

2021 年開始 Medium 只會發佈部份文章，想知最新銀行 insider insight，就要訂閱我 Patreon(patreon.com/watin) 喇！

2021 年 8 月 Medium 再次改制，讀者可以選擇將一半既 Medium 會費撥繳至你喜歡既作者。如果你想喺 Medium 上面支持我，可以去以下呢條 link (watin.medium.com/membership)登記做會員哦！

華田銀行 Patreon: patreon.com/watin 華田銀行 FB: facebook.com/WatinResearch 華田銀行 IG: instagram.com/bank_of_watin/ 華田銀行 CTGoodJobs 專欄：resources.ctgoodjobs.hk/columnist/author/137/華田銀行