阿里巴巴芝麻再開門

首先，重要嘅嘢要講三次：

「我唔畀投資意見。」

「我唔畀投資意見。」

「我唔畀投資意見。」

一來無論賴叔抑或置記，都係股海明燈，買邊隻跌邊隻，無謂拖累大家。二來，我真係唔識寫一隻股票會升定會跌。三來，大家如果係為咗攞「追、揸、沽」貼士嘅話，根本就唔應該嚟睇我啲文啦。

聽得明嘅話，我哋可以入正題。

上一個豬年 (咁似曾相識嘅？) ，阿里巴巴網絡喺香港上市，股票編號 1688 ，集資過百億港元，以每股 13.5 元，折合約 100 倍市盈率招股，反應熱烈過陳奕迅演唱會，一手難求。咁啱咁橋，置記當年碰運氣抽新股，又咁啱好彩畀我抽中一手咁大把。

2007 年 11 月 6 日，阿里巴巴上市首日，開市後旋即搶高兩倍，最高位約為 40 元，置記冇本事摸頂沽出，但都叫賺咗幾千蚊，開心下。

之後嘅故事，係環球金融海嘯，雷曼兄弟倒閉，然後美國信貸評級被下調、歐元區債務危機爆發，港股由 2007 年 10 月近 32,000 點高位，一年內撻到落 10,000 點附近，之後幾年都係喺兩萬點上下浮沉。

至於一代科網股王阿里巴巴，除咗上市初期嘅剎那光輝，之後基本上跟隨大市急插，跌穿招股價不在話下，最低更見三個幾。即係如果有人喺初期高追然後冇止蝕，帳面可以輸足九成。及後阿里股價跟住大市喘穩，但係如果睇圖，基本上係跑輸大市 (圖片見文末)。如果再拼埋去「真．股王」騰訊度，見住 #700 由十零蚊輾轉彈上四十幾蚊，阿里巴巴首次在港上市嘅表現都真係被比下去。

結果， 2012 年阿里巴巴母公司提出以 13.5 港元私有化。係呀，同 2007 年上市招股價一撚樣。芝麻開門，芝麻關門，咁樣「瀟灑走一回」，留畀香港股民一個得啖笑嘅回憶。

一年之後，阿里巴巴醞釀再度上市，市場憧憬再次為香港帶來一次重量級 IPO 。不過阿里本身行合夥人制度，股權架構屬於「同股不同權」，有異於一般喺香港上市「同股同權」嘅公司。港交所同證監會當年並無為阿里巴巴破例，而阿里就選擇喺 2014 年遠赴美國上市。

其後，證監會就「同股不同權」進行諮詢，並且喺 2018 年落實改革，為阿里巴巴再臨香江打開大門。

阿里喺紐約上市時招股價係 68 美元，雖然曾經跌穿招股價，但係自 2017 年開始走勢凌厲，一度升穿 200 美元，而以 2019 年 11 月 22 日嘅 186 美元計，都升咗接近兩倍。

今次阿里巴巴喺香港「第二上市」，集資近千億港元，定價 176 港元，較最高招股價 188 為低，亦較美股折讓近 3%。但有一樣嘢係肯定嘅：今次阿里喺香港上市，唔會再好似 12 年前咁以倍數計炒高，因為股份價值一早已經喺美國市場反映，喺香港嘅 IPO 只係畀多一個場地畀資金參與，尤其是一啲因為唔同原因而唔能夠走出去美國投資嘅資金。

講白啲，咪就係大陸錢囉。喺中國嘅資金管制之下，紅色資金邊有得話咁易可以碌去大西洋買賣阿里巴巴？喺香港呢個獨一無二嘅市場，要沾手就比較容易。日後當中國證監批准，大陸股民亦可以透過南下嘅「港股通」玩埋一份。

如果你問我，我覺得阿里返香港上市，多少有其政治目的。上面講嘅大陸錢只係前奏，縱觀近年中共「國進民退」嘅步伐加快，馬雲宣布「退休」，退下阿里巴巴管理嘅火線，都似有安身立命，為企業配合國策，甚至日後容讓國家機關掌握管治實權而舖路嘅味道。

而香港股票市場，講到尾都只係一個集散地，仲有利用價值嘅時候，大家就好好珍惜啦。