鍾意 politics？唔好做政治記者。

呢句係同自己講。

香港 01 訪問咗個前記者。

佢一個月前辭咗職，返去自己成長的屯門，參選區議員。我同某朋友不約而同 highlight 咗同一段。

他由政治新聞做起，每日跟不同政界中人打交道，收風、套料，寫很多「吹風故」。

他覺得不自在。「點解某名人生仔、某名人去邊個嘅婚宴要報？到底新聞係咪咁做呢？但無可否認，佢哋係名人，個生態係咁要寫來維繫感情。」

睇呢一段，完全感受到嗰種無奈、無力感。係種夢想破滅，幻想中的肥皂泡，被狠狠地戳破的感覺。當初夢想要改變世界的年輕人，結果發現自己變成一件工具，仲要係一件放風的工具，係好唔開心的一回事。

做政治組，日日出入立法會，立法會個記者證有埋自己個樣，見親都係高官達人，仲要個個都行埋嚟同你好似好好傾咁，梗係開心㗎。After all 人總有啲虛榮心。

但後退一步，就會好清楚，同記者熟，咪又係因為你做嗰間傳媒有影響力。

( 元秋 mode ) 係你間公司勁，唔係你勁，okay？

所有做記者的人都諗過改變社會，但後來好多人都發現，世界好大。大到一人之力，做唔到啲乜。做記者係一件揼石仔的工作：現實係，寫到一百隻好故仔，都未必可以改變到個世界。

自己唔好被世界改變，保持初心同純真，已經好難。保持初心，與人為善，係一種選擇。

好耐之前（ fine 其實唔係好耐），有人問過我要唔要轉做 politics。「哈哈，唔好啦，我怕嬲到爆血管」，我嗰陣咁答。

我心入面嗰句冇真正講出口。「我唔想我的朋友變成我的資產。」

細個嗰陣太熱血，一唔小心就識咗好多人。得閒吹下水，約出嚟食下嘢，講下邊個的 campaign 就搞唔掂，食下唔同派別花生，係好開心的一件事。

但將興趣變成事業，後果就係本身的 connection 會變成一個記者的資產。搵邊個收風，邊個搵我放風，完全係出自利益計算。係，我知道寫哂平時聽到的野出嚟，可以上位上得好快，但為咗份工，冇咗班朋友，咁又是何必呢對不對？做一個記者前，首先要做一個人。

（唔係講笑，我試過平時吹水，吹完發現，唔小心上埋新聞。我以後同嗰位朋友講乜，都要就住就住。做朋友做到咁，仲係咪朋友？喂阿哥，心結呢啲野，真係唔提就唔存在咩？呢位朋友以後的 credibility，同當年推緊 23 條的葉局長一樣：「我相信過多幾年後，你會相信局長係冇呃你哋。」）

另一個原因係，企得太近會真係爆血管。

戰地攝影記者 Robert Capa 講過，If your pictures aren’t good enough, you aren’t close enough。

但作為記者，站得太近，同受訪者一樣感同身受，有時會見樹不見林。更甚者，見識得太多噩夢，會被吞噬；感覺會麻木，憤怒會磨蝕，連喊都喊唔出。

六月以來，我見識得太多記者，已經太攰太痛苦，變成唔想有感受。唔記得自己係一個人，唔記得受訪者係一個人，唔記得六月以嚟，被捕被打被非禮被性侵犯的，都係有血有肉的人。

我好敬佩呢班人，因為我自己實在做唔到。我一定爆炸。過於熱血沸騰，會沖昏頭，順手燒死埋自己，嬲到稿都打唔出。我唔夠堅強，冇辦法笑住面對朋友入獄，笑住講「上次過嚟，有個燃燒彈喺我頭上飛過」，「哈哈，藍水有效治療灰甲喎！」

Robert Capa 最後喺越南採訪時，踩中地雷。死時只有 40 歲。