銀行閑談 (64) — AlipayHK 將在全國通用的重大意義

邁向 20 億用戶的重要一步

雖然只係短短 3 個月，深圳就由好多香港人既「潮人聖地」變成「世界最遙遠既距離」，所以亦都唔會再關心到底內地 Alipay HK 即將全國通用有咩深重影響。

不過作為一個稱職既財演 (其實我都唔講財經既，或者可以叫銀演？)，呢單嘢真係幾緊要架，聽我講聽我講。

現時 AlipayHK 的窘態

而家大家就算喺香港有支付寶 / 微信都好，番到內地喺大部份情況下係用唔到既，除非大家幫襯一哋港資企業例如 Pizza Hut 啦，所以大家最直接既方法就係帶定啲「人仔」，不過大家試過都知咁樣係超級唔受歡迎既。華田對上一次喺廣州買黃牛，人哋都係要求 P2P 既，我嗰刻有些少懷疑買賣毒品係咪都要用微信既呢？

(side track 一個，下圖係廣州天河既「鮑師傅」，佢嗰隻小貝真係超好食，所以永遠都係超多人排隊，要排就會有職業排隊同黃牛，而我無骨氣，次次都係買黃牛既)

唔想帶現金咁點呢？咁大家就要有個「內地版支付寶」，不過「download 容易綁定難」，內地版支付寶只可以連繫內地戶口，咁你會話開番個內地戶口唔係好難啫？我就會話「開戶容易入錢難」，開戶有回鄉証基本上就可以，不過你點入錢呢？

由於大家唔喺內地賺錢，戶口個 balance 唔會識自動向上走，所以錢用晒就要入錢喇，但由於我國資本賬（Capital Account 喇）係封閉既，跨境入錢其實相當麻煩，最合法最平既既途徑就係攞現金番內地入，咁咪即係番番去第一個方法「帶人仔」咯...

AlipayHK 在全國通用後，下一浪會是 Alipay什麼呢？

雖然暫時並唔清楚可唔可以經 AlipayHK 用 Visa / Master 消費，又唔知道可唔可以用 AlipayHK 同內地支付寶做 P2P，但就算只准連接港紙戶口、只係准做消費都已經不得之了。

港紙係自由流動既貨幣，港紙得、即係技術上美金都得，所以如果而家開個 AlipayUS 連個美金戶口喺內地消費都只係政治問題多於經濟 / 技術問題。如果唔淨只可以做消費，仲可以做埋 P2P 的話，咁同人民幣 (在中國境內) 與外幣自由兌換無咩分別，咁當然我估佢會話「因為保安理由」而整番個 daily cap 既，呢啲嘢無阿公批准點會做到呢。

馬雲的 20 億中國夢

最近馬雲正式退休，又有人講番起佢 2017 年喺杭州年會時既一番話：

「今天从规模来讲，它已经是全世界第21大经济体。再过19年 (2036 年)，我们希望能够打造全世界第5大经济体。而第5大经济体，不是因为规模，而是责任，更是担当。我们希望为全世界解决1亿的就业机会，我们希望能够服务20亿的消费者，我们更希望能够为1000万家中小企业创造盈利的平台。」

暫時中國就只有 14 億人，呢刻用緊支付寶既就大概有 7 億唔到，咁點 chok 到 20 億 user 呢？

答案好簡單，向外走，全球有 70 億人，有 30% 人用阿里巴巴就係 20 億啦，所以阿里巴巴要喺美國上市，佢既野心亦從來唔只甘心做一家「中國企業」，做下一間 Visa / Master，就係阿里巴巴成為全球第 5 大經濟體既利器。

AlipayHK 喺內地自由行，就係好重要既一步喇。

版示一則：華田將於明天起安心回鄉，會有一排見我唔到，大家 be safe & be water 喇，Happy Moon Cake Festival！

每月 5 美金成為 Medium 付費會員，閱讀平台上所有文章，同時支持你喜愛的寫手繼續寫出你喜歡的文字。想知道更多我在 Medium 的心路歷程，按這裡吧！