銀行閑談 (172) -BNPL Buy Now Pay Later 公司點解唔需要「放債人牌照」都可以為客戶提供分期呢？同「伊斯蘭金融」又有咩關係呢？
上期 銀行閑談 (171) 介紹咗 BNPL 公司嘅利潤模式同埋 BNPL 公司對傳統銀行嘅衝擊，文中最後講到 BNPL 公司之所以有咁多優勝之處，成功關鍵之一就係佢可以喺「技術上」唔向客戶提供任何 credit facility 下提供分期服務，即係：
- 客戶無需要申請信用卡
- TU 完全無記錄
- BNPL 公司「技術上」無提供任何 credit facility
- BNPL 公司本身更無財務公司 / 銀行牌照
BNPL 公司係點樣做到嘅呢？「伊斯蘭金融」又同 BNPL 有咩關係呢？今集一齊同大家銀行閑談喇。
BNPL 公司同 Bill Finance 或 Mortgage 最大唔同，在於貨物擁有權差別！
當我哋要檢查 BNPL 公司喺現行法例下有無提供任何「貸款服務」，要分開「向商戶提供」同「向客戶提供」兩個角度嚟分析。
大家細心諗吓，當 BNPL 交易成立嘅時候，BNPL 公司會先向商戶支付價格95 折，再分 3 期向客戶收款，咁到底 BNPL 公司係「借緊錢」畀「商戶」定係「客戶」呢？呢度有 2 種唔同嘅角度：
(1) BNPL 公司先貸款予「商戶」，並馬上收取一筆利息 / 手續費 (5% 啦)，再根據客戶每月的分期付款作為商戶的還款，即係類似 export bill finance 嘅玩法。
(2) BNPL 公司先貸款予「客戶」購買商品，利息 / 手續費由商戶承擔，客戶再每月分期還款予 BNPL 公司；如果商品有抵押，利息由客戶承擔，情況就類似買樓做 mortgage 喇。
但以上 (1) 同 (2) 對 BNPL 嚟講都係唔成立的，因為「商品」喺呢兩單 deal 嘅作用同實際上 BNPL 嘅玩法係完全唔同的，因為 BNPL 公司實際嘅玩法係：
(3) BNPL 公司先向商戶 95 折買入商品，再喺容許客戶分期付款下以原價轉售。
(1)、(2) 同 (3) 咁有咩最大呢！？就係貨物擁有權問題！
喺 (1) 同 (2) 入面中間人從來無擁有過件商品，中間人提供嘅係「錢」，所以整個行為係借貸，而喺 (3) 入面 BNPL 就曾經實際擁有商品，BNPL 做嘅係一買一賣，再加一個分期付款優惠畀客戶喇！
點解 (1) 同 (2) 借貸，但係 (3) 就係買賣？可唔可以解釋得詳細啲？
(1) 同 (2) 入面，中間人係對商品「背後」嘅買方或賣方進放借貸，而中間人係從來無擁有過件商品的。萬一客戶無按時畀錢 (或者叫還錢)，中間人唔係因為「商品尚未完付款」而追討買方或賣方，而係因為「貸款未有按時還款」而追債。
而就算商物有被抵押都好，中間人首先追嘅仍然係借款人，而唔係件「商品」喇，而就算要沒收件「商品」，都只係為咗要將佢賣咗嚟還債。再極端啲講，而如果遇上商品大幅眨值嘅情況 (aka 負資產)，中間人仍然有權繼續追債，因為而家係「借錢唔還」，當然追到還晒錢為止啦！
而 (3) BNPL 嘅情況係好唔同的，成件事只係一買一賣，BNPL 公司先向商戶購入商品 (而買嘢當然要即時畀錢，不過有折)，再即時轉手賣畀客戶，並容許客戶分期畀錢。
萬一客戶無如期「付款」，理論上呢個係「買嘢無畀錢」而唔係「借錢無還錢」，BNPL 可以收番因為無畀錢而引起嘅費用 (類似索償啦)，甚至要求追回商品 (雖然基本上唔會做)，但係唔可以收利息 / 罰息，係好唔同架。
如果大家有留意信用卡月結單，當大家用 Atome 喺 let’s say 喺 Pinkoi 買嘢，月結單上面會寫收錢嗰個唔係 Pinkoi 而係 Atome，即係話 Atome 並唔係純綷一個中間人咁簡單，Atome 係實際收錢嗰個人喇！
法律罅？大家知唔知穆斯林國家點做 Mortgage 嘅呢？
或者大家覺呢個係法罅，如果咁都講得通，咁將所有放貸都包裝成分期付款咁咪 OK 咯！咁唔使攞財仔牌啦！
咁我就要 side track 一吓，考吓大家知唔知咩叫「伊斯蘭金融」，而喺「伊斯蘭金融」入面係點做 mortgage 的呢？
古蘭經入面講到明「以錢生錢」係唔可以的，所以借錢可以，但係收息就唔得喇 (猶太人真可惡！)。咁但係我又係穆斯林，又想買樓，但係我無錢喎！咁點算好呢？
答案係你可以搵銀行「一齊買」，再叫佢每個月賣番佢個 portion 畀你，即係畀你分期付款贖番層樓 (見下圖)；或者乾脆叫銀行「幫你賣」，再叫銀行 mark 高個價賣畀你，再叫你分期付款咯。
哇，咁即係走法律罅啫！呢個仲要係走伊斯蘭律法嘅罅！但係你唔好理，穆斯林國家就係咁玩的，仲話咁樣唔係「以錢生錢」，而係「成果共享」添吖！
其實 BNPL 嘅玩法同呢種穆斯林 Mortgage 係好似的，都係先 full pay 買再 installment 賣，而哈里發都唔覺得咁樣叫「借錢」喎！
(btws, Islamic Finance 仲有好多特別嘢的，唔係剩係分期買樓咁簡單喇，有機會同大家慢慢講)
咁係唔係代表只要求期搵件垃圾嚟做「分期付款」就話自己唔係放債呢？事情又無咁簡單嘅
呢種「分期付款」不等於「放債」嘅法律罅，原意係為咗方便正常商業活動，先交貨、後畀錢，咁先容易促成交易嘛！
問咗啲律師朋友，我得到嘅訊息係英國係相對清楚嘅條文去界定「分期付款」嘅界線喺邊度，當 BNPL 真係貼住條線嚟行嘅時候，去進一步規管亦相對簡單直線一啲。
下期會同大家繼續講 BNPL，會講吓法例上對呢種「分期付款」vs. 「分期還款」嘅准確界線到底喺邊度。
大家繼續多多支持哦！
關於華田：
兒時夢想做i-banker，結果做了bank worker，還要是retail那種。過去在各大小銀行不同部門流徙，叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發，到現在還未安定下來。不懂財經、不懂經濟，只想談一下「銀行」這回事。2021 年開始 Medium 只會發佈部份文章，想知最新銀行 insider insight，就要訂閱我 Patreon(patreon.com/watin) 喇！2021 年 8 月 Medium 再次改制，讀者可以選擇將一半既 Medium 會費撥繳至你喜歡既作者。如果你想喺 Medium 上面支持我，可以去以下呢條 link (watin.medium.com/membership)登記做會員哦！華田銀行 FB: facebook.com/WatinResearch
華田銀行 IG: https://www.instagram.com/bank_of_watin/
華田銀行 HKET 專欄： https://wealth.hket.com/sraw116/華田銀行