銀行閑談 (164) — 台灣 VB 一年談 — 樂天銀行同 Line Bank 經營情況如何呢？同香港比較係快定慢呢？

上期銀行閑談 (164) 講咗台灣第三家 (亦係暫時最後一家) 「純網銀」將來銀行喺延期超過一年之後，宣佈將會喺今年 3 月尾正式公眾營業，仲揚言要：「2年內衝出百萬用戶，4年內達成損益兩平」添！

大家都知台灣人口遠遠多過香港，大概有 2,350 萬人，即係香港 3 倍多少少，咁簡單數學嚟睇「衝出百萬用戶」的確比香港容易少少既，不過最好方法當然係睇睇已經營業差唔多一年既 2 家台灣 VB 同業「樂天銀行」同「Line Bank」既經營情況，只有 3 家 VB 既台灣，會唔會比有 8 家 VB 競爭既香港好撈啲呢？

9 個月創出 73 萬客戶，Line Bank 完勝樂天銀行

根據台灣金管局 2021 年底既數據，雖然樂天銀行要比 Line Bank 早 3 個月開張，但係經營咗接近 12 個月既樂天銀行無論存款、貸款、存戶數目都要遠遜於只經營咗 9 個月既 Line Bank，其中最誇張既係 Line Bank 喺 9 月之內已狂掃 73 萬戶，完勝樂天銀行既 6.7 萬，亦勁過晒香港所有 VB 同業喇！

Line Bank 狂掃 73 萬客，除咗因為台灣人人都有既 Line 之外，亦因為有超好康既消費優惠，例如 Line 金融卡可以攞到國內消費 3% 回贈，特定場景有高達 18% 回贈哦！

呢個回贈額喺台灣應該屬於核彈級喇，台灣渣打 Simply Cash 卡加埋 priority banking 先得 2%，而家你肯交低張身份証開 Line Bank 就有 3%，啲公仔仲要咁可愛，梗係搶到爆啦。

樂天銀行客戶質素之高，香港同業都莫塵莫及

咁樂天都唔係一無事處既，除咗蝕得比較少，平均存戶結餘有足足 9.4 萬台幣，即係 25,800 港紙。

25,800 港紙呢個數都幾勁，大家首先可以比較吓自己放咗幾多錢喺 VB 就知呢個數一啲都唔少嘢，如果用香港 VB 開戶數一哥 ZA Bank 做比較，喺 2021 年 8 月開業大概 1 年半之際，ZA Bank 宣佈客戶數突破 40 萬、存款規模約 60 億 — 即係平均存款「只有」15,000 港紙架渣！

仲有仲有，台灣生活指數遠低過香港 (信義區嗰個啲市中心例外啦吓)， 喺台灣 94,000 台幣要好使過喺香港使 25,800 港紙吧，而香港人又的確比台灣人有錢，所以都幾犀利的。

不過暫時只得唔夠 70,000 戶，咁既數目絕對唔足以支撐銀行營運，一定要想辦法做大啲個 customer base 先得喇。

Line Bank 貸款 9 個月做 10 億港紙，成績都唔錯架！

睇番 Line Bank 貸款數字，2021 年底錄到近 36 億台幣貸款額，折合近 10 億港紙，香港既情況又如何呢？

如果攞 ZA Bank 同天星銀行 2021 年 6 月底既年報做比較，呢兩間銀行喺經營一年之後，貸款額分別係 13.6 億同 8 億左右，所以話 Line Bank 9 個月時間做到 10 億貸款都真係幾勁。

要睇銀行營利能力，例咗個貸款要大，個存款額都不能拋離太多，如果存款遠遠高於貸款，就會出現資金過剩、白花利息既問題喇。睇番各家銀行既貸存比率，ZA Bank 同大概係 17% ，稍稍高於 Line Bank 既 15.3%，而天星就因為存款較少，貸存比率有成 36%，明顯比兩家同業都優秀好多。

不過咁講，36% 好似叻過對手好多咁，但仍然同理想水平差得好遠，一般商業銀行客戶貸存比率超過 70% 係好正常的，所以諸位仍要繼續努力喇。

燒錢之路一樣遙遙無期吧？

最後同大家睇埋蝕錢既情況，樂天銀行全年蝕 5.6 億台幣，折合 1.54 億港紙；Line Bank 全年蝕咗超過 17 億台幣，折合 4.77 億港紙。哇，都唔少錢喎 ！

睇番香港情況，ZA Bank 2021 年 6 月底頭半年蝕咗 2.78 億港紙，天星就叻啲，半年「只係」蝕咗 1.32 億港紙，賺錢真係唔係咁易架。

咁全年又點呢？2021 年全年數字就未睇到，不過繼續蝕錢都好正常吧。早前 Mox 就話目標係 3- 4 年內收支平衡，咁即係唔好話今年，係出年都唔打算可以 breakeven，都係繼續努力拼業績，之後先再講賺錢啦。

「2年內衝出百萬用戶，4年內達成損益兩平」可行嗎？

最後番嚟將來銀行，到底「2年內衝出百萬用戶，4年內達成損益兩平」係咪實際呢？

將來銀行個 potential customer base 其實都唔細，中華電信、兆豐金、新光、全聯都有最少 9.9% 股份，股東背景集電訊、金融、零售既於一身 (有少少 Mox + livi 咁樣既影子呢)，仲被網民戲稱做「國家隊」，大家可以幻想到呢個股東配搭既影響力啦。

至於係咪真係可以「衝出百萬用戶」，Line Bank 可能多幾個月就可以達標，而樂天銀行就未來 3 年都唔太可能，所以係咪可以「衝出百萬用戶」就要睇將來銀行有咩好爆既 product 攞出嚟吸引大家開戶喇，暫時就只係知道有自定號碼，咁係未夠個噃。

至於 4 年內收支平衡，呢個就好可能同開戶數係有啲衝突的，睇番香港既例子，各間 VB 因為未能夠好好將存戶既錢拆出去，都紛紛減息，但求留戶不留錢，都幾搞笑的。

收支平衡嘛，就係收入大過支出，即係最基本要利息收入要大過利息支出，先有可能畀得起燈油火蠟人工租金，當貸款都未做得起，吸咁多存款番嚟谷大自己個利息支出為咩呢？

所以我經常都話，香港 8 間 VB 入面短期最可能達到收支平衡既，我既愚見認係 PAOB 都幾有機會跑出，專心做好中小企，低調行事，唔吸多餘既存款，未嘗唔係一條聰明既出路哦。

國家隊可唔可以又上客、又番數呢？又睇吓半年後有咩驚喜畀我哋啦。

2021 年開始 Medium 只會發佈部份文章，想知最新銀行 insider insight，就要訂閱我 Patreon(patreon.com/watin) 喇！

2021 年 8 月 Medium 再次改制，讀者可以選擇將一半既 Medium 會費撥繳至你喜歡既作者。如果你想喺 Medium 上面支持我，可以去以下呢條 link (watin.medium.com/membership)登記做會員哦！

華田銀行 FB: facebook.com/WatinResearch
華田銀行 IG: https://www.instagram.com/bank_of_watin/
華田銀行 HKET 專欄： https://wealth.hket.com/sraw116/華田銀行

關於華田：
兒時夢想做i-banker，結果做了bank worker，還要是retail那種。過去在各大小銀行不同部門流徙，叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發，到現在還未安定下來。不懂財經、不懂經濟，只想談一下「銀行」這回事。