「都做北邙山下塵」：山坡羊．北邙山懷古

小小人物簡介。

張養浩係元曲大家，最出名既係山坡羊組曲。此外，張養浩仲係好典型既中國古代正直有為官員。

張養浩家境唔錯。細個讀書叻，在地方上稍有名氣。長大後有人舉薦，開始做官，以清廉著名。輾轉做到朝臣，輔助太子（後來元仁宗）。太子即位，升禮部尚書，主持元代頭兩次科舉考試。其後再升中書省，參與政事。

後來老豆死，個仔又死，張養浩辭官。之後皇帝被剌殺，一大班癡線佬互相攻打，張養浩更加係前後七次不赴朝廷徵召。

劉備請諸葛亮都只係請三次。張養浩係「七聘而後起」。

張養浩晚年復出，唔係因為有劉備級既賢主，而係因為陝西戰亂後大旱，佢出山救災。

結果係點？救左四個月災，佢就死於任上了。

張養浩 山坡羊．北邙山懷古

悲風成陣，荒煙埋恨，碑銘殘缺應難認。知他是漢朝君，晉朝臣？

把風雲慶會消磨盡，都做北邙山下塵。便是君，也喚不應；便是臣，也喚不應。

張養浩晚年出山救災，一路向（陝）西，佢一路行，一路寫呀寫。

邙山[1]位於洛陽北，係著名帝王陵墓集中地，同時係洛陽人墳場。目前已知在此埋葬著六代共廿四座帝王陵墓。其中東周時期王墓八座、東漢帝陵五座、曹魏帝陵一座、西晉帝陵五座、北魏帝陵四座、五代後唐帝陵一座。

所以，邙山係古時墳場既代名詞。例如：

晉 張載：「北邙何累累，高陵有四五。借問誰家墳，皆云漢世主」

晉 陶淵明：「一旦百歲後，相與還北邙」

唐 白居易：「何事不隨東洛水，誰家又葬北邙山」

唐 沈佺期：「北邙山上列墳塋，萬古千秋對洛城」

唐 王建：「北邙山頭少閑土，盡是洛陽人舊墓」

宋末元初 汪元量：「芒芒北邙山，高墳盡無主」

想像一下，夕陽西下，動身救災的張養浩迎風站在邙山，映入眼簾的是縷縷荒煙和滿目的墓碑石銘。

無論生前如何叱吒風雲。死後的漢朝君、晉朝臣和元朝平民都沒有分別。大家都只是北邙山下的一抔塵土而已。

所以張養浩說：「便是君，也喚不應；便是臣，也喚不應」

無論貧富貴賤，死左之後，對住個墳叫你都唔會應架啦。所以你班官唔好搞咁多啦，唔該。

睇完有線個新聞，我即時諗起哩首小令。雖然我唔想佢拆，但係我諗，張養浩應該唔會介意。

佢可能會話：拆攞，擺咁耐有咩意思？