遊行出事，真係會被釘證監牌？

星期五傍晚，一眾同事收工之前都十五十六緊，究竟下星期一返唔返到工。

咁呢個世界總有啲公司嘅安全系數比較高嘅，再三叮嚀員工下星期一唔好射波。新聞報道有講，有中資股票經紀行高層警告員工，如果遊行集會期間有咩冬菇豆腐，員工嘅情況會向有關部門同證監會報告。換句話講，呢啲高層認為，藉「被證監釘牌」作為要脅，有阻嚇作用。

咁 SFC 牌照係好多金融從業員搵食嘅入場券，牌照不保就如被斷衣食，好撚大鑊。問題係，證監真係會因為持牌人士參與公眾活動而採取行動？你肯定？

其實證監會對於持牌人士嘅要求呢，係有一套指引嘅。英文叫 “Fit and Proper” ，中譯「適當人選」。 Fit & Proper 本身有四大項：

1. 財務狀況或償付能力 (破產人士要等等) ；
2. 學歷、資歷及經驗 (文盲免問) ；
3. 稱職、誠實及公正地行事 (精神病、疏忽職守、管理不善、缺乏勝任能力嘅唔好諗) ；及
4. 信譽、品格、可靠程度及財政穩健性。

咁睇落，似乎四項入面，最可能因為遊行、示威而觸發嘅就係第四項。咁呢項又包括啲乜嘢呢？

1. 被裁定犯有詐騙、不誠實或不法 (misfeasance ，常見於「公職人員行為失當) ) 行為；
2. 同適當人選有關嘅刑事罪名或指控；
3. 被專業或監管機構取消資格、譴責或處分；
4. 被拒絕持牌或從事專業行業；
5. 被法院撤銷董事資格；
6. 因市場失當行為罪成，或干犯 SFC 等監管機構嘅守則或指引；
7. 作為公司大股東、董事或管理人，而間公司冇錢還債而被清盤、或被裁定欺詐罪名成立、或未能履行投資者保障基金嘅責任，等；及
8. 涉及償務重組等。

可以見到， SFC 對於適當人員嘅指引，係有一定局限，並唔係話你亂拋垃圾或者衝紅燈就會釘牌嘅。至少，被控非法集結或更嚴重嘅暴動刑事罪名 (頭盔：犯法嘅嘢唔好做) ，都唔見得同 fit and proper 有直接關係。

需知道，監管機構做事有規有矩、有板有眼，有冇先例援引，審視嘅流程上又係咪合乎程序公義，確保冇諗漏、講得通，係好基本嘅要求。必要時，仲係徵詢下法律意見。

如果由僱主方面向證監報告員工遊行出事，到證監完成調查及下決定，講緊都可能係數以月甚至年計嘅時間。仲未計公司內部 Compliance 要𢱑爆頭諗個 notification 點寫呢？

與其係等 SFC 釘牌，中資企業將唔聽話或政治不正確嘅員工豉椒炒魷其實仲方便快捷。當然，僱主可以擔心畀人話無理解僱，但一來以政治立場去決定員工去留，本身已經合理；二來，咁大間機構，驚勞工處食咗你咩，咪玩啦。

所以我覺得，用釘牌阻嚇員工參與政治集會，其實純粹靠嚇。中資企業要擺政治正確嘅姿態，但又唔願意拿屎上身，將個波踢畀監管機構，變相增加衙門嘅負擔，此風真係不可長。

臨尾戴多個頭盔，今時今日，落街又好，發夢又好，成本都可升可跌。如果大家份工本身有大陸嘅 exposure ，尤其是要北上返深圳或者上海開會嗰啲，萬一如果唔好彩畀警察抄牌，日後公幹可能都比較責使。唔係個個老闆都理解你發生咩事，甚至可能企喺你嘅對立面。

所以，如果本身有顧忌，有家累⋯⋯總之真係唔係咁方便嘅，就唔好行咁前、唔好留咁夜、行為唔好咁激進喇。我哋需要人，亦需要有人搵錢，去幫助能夠出心出力出時間，但冇咁多錢嘅人。每一位香港人，喺唔同嘅崗位，一樣都咁重要。香港人加油。