《逆流大叔》港產平凡小驚喜

早前看了《逆流大叔》，平凡中有驚喜，劇本流暢，有人謂「近年劇本完成度甚高的港產片」，大概如此。沒有多餘的拖泥帶水同做作，家庭糾紛，對女生的愛慕，對自己幸福和理想的追求，多條線扭在一起點到即止。

「年輕人，係咪迫使你係暴雨中工作啊，係愛吖定係責任呀？」「係窮呀！」係窮，但也有志想伸，唔想被財團欺壓，公司磨蝕。小人物的故事，都是一般人的煩惱，令貧富大眾有所共鳴，大家就係咁捱下、悶下、辛苦下，又想反抗下，縮下，又懶下，好人性化又不失善良。

入面有啲戲劇位，有啲似之前劉天賜講座播俾我哋做sample 的 7、80年代電視劇，平凡但轉折，有啲位小小誇張，但就係好有人情味，你又唔覺得講唔通，令人好接受其合理性。

吳鎮宇固然係好，做小人物，即時唔似大明星，做乜似乜，其他演員，就是男角女角、小妹妹、黃德賦、《點五步》有嘅胡子彤，都係演得剛好，唔多唔少，導演要記下功勞。係柳俊江我不太喜歡。余香凝很明亮，一個有點大不透但點點成熟的妹子角色，亮得嚟唔會太過搶，但又點到睛（我一直以為她是杜小喬 sosad後來看完了才知道是余香凝，原來我係盲嘅）。我覺得比《點五步》個女角用得好。

扒龍舟真是令人感動，有《點五步》的風韻，好熱血，好眼濕濕。有人表示睇到好無聊，但我好投入，有玩過 team sport 就會明白其熱情，係用力不知為甚麼，係認真不知為甚麼，係傻更更地努力但好high。最後個 twist，估唔到但又估得到，吳鎮宇個幕，係好想喊，睇到都覺得好可憐。失落過後，人生如此，還是要咁過，大家還可以在空虛的頒獎台上自 high 自娛，舒一點悶氣，又繼續去。

Low budget 但拍得咁鬼好，編劇+導演陳詠燊真係好犀利。當然呢部又係電影發展基金的戲，監製又係有周圍張羅幫撲人情牌吧。

這部有點像英國戲 《Swimming with Men》，講一班失敗中年男人玩韻律泳，後者更帶騎尼荒誕更頹廢，但都是運動中尋找自我與生命，異曲同工。無咗後者個啲用力的後現代人生探討與泳姿藝術樣式，《逆流大叔》更平易近人。