「追蹤些關於面試 基本需要」

原來早不缺少。

自從上次嗰篇《怎去開始⋯⋯解釋這履歷？》分享撰寫個人履歷之後，置記一直喺度諗，係咪應該寫關於 interview 嘅 Dos & Don’ts 。咁作為一個搵過工、見過工；又試過喺面試桌上嘅另一邊飾演 Interviewer 嘅過來人，我又唔怕講幾句嘅。

雖然大學生搵工去到三、四月已經錯失好多大機構嘅首輪面試，但其實呢啲大規模招聘活動總有人會 no-show ，亦有人會 drop offer ，請唔足人之下，咪又係要繼續招聘。置記當年成功轉行，同自己當時喺招聘活動水尾嗰期先至遞交申請，避開咗 peak season 大圍紅海嘅血戰，亦多少有啲關係。所以呢，有心真係唔怕遲。

上次我話，一份好嘅履歷應該要三有、三冇。三有：有結構、有取捨、有針對性。三冇：冇倒模、冇失實、冇基本錯誤。

咁如果咁好彩有面試機會，又應該點呢？今次我嘅答案係宜四有、戒兩有。宜四有：有備而來、有講有笑、有碗話碗、有綠再聚；戒有恃無恐、戒有求必應。

宜：有備而來

我相信天生我材必有用，但係唔等於你要打天才波。如果空槍上陣，同盲婚啞嫁有乜分別？隨時入錯房、叫錯人名，直到人哋面黑黑先知出事。呢個風險對於畢業在即，可能要見十幾份工、見到滑晒椏嘅朋友嚟講，係必須小心管理嘅。

如果準備，可以做嘅實在好多。首先， Due diligence (盡職審查) 邀請你嘅公司，睇下人哋咩背景、最近有咩大新聞 (去豐澤面試至少要知公司係長和旗下、李嘉誠退休，唔好喺人哋面前批評長實啲樓乜乜乜) 。

第二，Due Diligence 下 interviewer ， LinkedIn 可能有人哋 profile ，知道人哋過往做邊間公司同乜嘢崗位，甚至睇下有冇 common connection ，了解下人哋性格同喜好，可以趨吉避凶。如果有 headhunter 穿針引線嘅，佢都可能畀到啲線索你。

跟住，認真睇返你 in 呢個崗位嘅 Job Description ，包括職責同埋要求。盡可能將自己相關嘅技能同經驗套返落去，包裝下自己以證明你應付得來。如果真係冇乜相關經驗嘅，預早睇下啲相關資料，唔打得都起碼耍返一招半式 展示誠意、 impress 下人。

至於面試前記低面試時間、地點，預算交通時間唔好遲到，早一晚預備好一套得體合宜嘅衫，呢啲咁基本嘅嘢就唔多講喇。

宜：有講有笑

正所謂「先入為主」，你去到公司，同開門畀你嗰個職員見面嗰下，已經係第一印象。唔好以為好小兒科，如果說話語氣太囂張、眼神太兇狠、行為太冇 manners 或者反應太遲緩，人哋係會留意到甚或記住嘅。你估下邊個人負責通知 interviewer 過嚟會議室見你？好大機會就係頭先接你嗰個保安或者 HR 。佢哋嘅怨氣會否轉達畀面試官？你估下。

到你真係見到面試官，無論你心情有幾忐忑，手汗流到落褲浪都好，請保持微笑。怯，你就輸一世。記住，人哋都係打份工架咋， interview 阻咗佢做正經嘢嘅時間，你如果可以令佢對住你嘅時間過得輕鬆愉快，咁咪利己利人囉。

當然，唔好一味掛住傻笑，記得握手 (如果 interviewer 唔睬你就算數) 同埋打招呼。往後嘅對答，亦請保持友善 (唔係僵硬) 嘅微笑，用適中嘅速度、適量咁講。

宜：有碗話碗

頭先講過要做好準備功夫，盡可能包裝自己。打個比喻，就好似女士們化妝打個眼影、修修堂眉、搽啲胭脂同唇膏咁。係化妝，唔係喬裝，唔係易容，更唔係整容。

即使你再想得到一個 offer ，作出失實陳述 (俗稱講大話，再俗啲就係鳩吹，英文 misrepresentation) 都係唔可以接受嘅。舉個例，你曾經暑假做過公共圖書館嘅助理，你可以話自己有協助解答市民嘅疑難、幫佢哋搵想要嘅書。將呢啲經驗引伸成為你有客戶服務同 problem solving 嘅經驗係可以嘅，但吹到自己有管理下屬或者分析數據、作出決策，怕且面試官會變成 Nick Young (黑人問號) 。

假設你當下冇畀人拆穿，但其實公司點都會喺聘請你之前做 background check ，問返你前任上司你擔任嘅崗位、職能、表現及薪酬。所以真係唔好諗住吹到天花龍鳳冇人可以驗證你嘅口供。

總之有杯話杯，有碗話碗，有碟話碟係啦。

宜：有緣再聚

別了依然相信，以後有緣再聚。你永遠唔知道今日 in 你嗰個人，第時究竟係你老闆定係你嘅行家，完結面試之際，記緊多謝對方花時間見你，事後補多封 thank you email 甚或喺 LinkedIn connect ，雖然唔擔保你有 offer ，但做咗一定冇衰。

舉個例，置記見過幾份工，其中一啲 interviewers 後來都有保持聯絡。正所謂買賣不成仁義在，你唔獲聘未必係你本人嘅問題，可能只係公司方針有變，或者有其他人比你更適用。但建立咗嘅人際關係，同埋你嘅技能、知識，對於本身都要打工交功課嘅 interviewers 嚟講，或者有你意想不到嘅價值。

如果你相信識人好過識字，你認識過嘅每個面試官，都可以係幫到你嘅貴人。而家未必幫到你，但將來或者得。

忌：有恃無恐

面試係一個相睇嘅過程，合唔合眼緣，往往主宰咗嗰 20 – 40 分鐘會面嘅成果。如果你自信心爆棚，即使做足上述四「有」，亦可能隨時掉入過度自信而侃侃而談、忽略咗 interviewer 所需所想嘅雷區。

明白大家見得工都對自己有一定信心，但係你覺得自己處理到一切大小難題，同對方係咪信任、信納你嘅陳述，實在無必然關係。面試官係想搵一個人去填補一個空缺，嗰個空缺可能係三角形、長方形甚或星形。太過硬銷自己嘅長處同強項而忽略咗公司嘅需求，可能適得其反。

何況，你再叻識變形都好，人哋一樣可以令人擔心你 over-qualified 養唔熟。冇人想請一個人返嚟一年半載就蟬過別枝嘅，事關招聘嘅時間同成本，以至職位空缺期間其他同事填位補位造成嘅損耗，都係公司唔願意承擔、不必要嘅成本。腳踏實地做公司需要嘅人材，會係較易獲得 offer 嘅途徑。 (V.O.：真嘢唔好拎出嚟講嘛！)

忌：有求必應

唔知係咪個個人都好似置記咁騎呢，但見得人多，總有覺得沉悶、生厭嘅時候。如果唔想重重複複行禮如儀， think out of the box 可能係一條出路。例如話，喺面試過程入面故意問啲刁難你嘅問題、挑戰你嘅信念、撩撥你嘅底線。

面對故意為難或者西面嘅面試官，如果你跟住佢嘅章法硬碰硬，咁就好可能中伏。你諗下，佢為難你，除咗自娛，仲有咩所求？當然係欣賞你受壓力下臨危不亂、神態自若嘅英姿 (如有) 。

置記遇上過面色好難睇嘅面試官，唯有且戰且退，笑住同佢遊花園，直至搵到佢有咩憎惡嘅 counterparties 然後同佢企埋同一陣線、同仇敵愾。當佢臉上嘅表情逐漸變得寬容，甚至展現笑容，嗰一刻我知道我得咗喇。

相反，置記遇上過一個氣焰迫人、過到老闆 first interview 嘅求職者，佢自信滿滿嘅樣子，我正好要挫挫佢銳氣。結果當事人受到挑戰之後，露出不屑嘅神情，冷笑一聲，坐姿由恭敬變得 bossy ，and the rest is history 。我唔係特豋設陷阱「裝」佢嘅，不過人嘅真面目，一不小心就 chok 咗出嚟，我都幫佢唔到咯。何況日常工作湊客更多更刻薄同咄咄逼人嘅情況都有，幸福係冇得勉強嘅。

記性，面試嘅每條問題都總有動機，係純正定係陷阱，要自己小心區分。遇上應付唔嚟嘅問題，老實回答唔識、唔知，再兜個圈轉移重心，總比硬著頭皮死撐甚至開火來得好。

以上都係一啲置記見過、經歷過所得出嚟嘅心得，唔一定啱但可能幫到大家。有咩疑難嘅，私底下問我都 okay 。