追女仔101：唔好叫人改變自己

剛愎自用，咪搞到車毀人亡囉（唐唐 tone）

有啲朋友，係可以一個電話就叫到我出嚟。

「你覺得，我係咪太獨立？使唔使改下？新識仔仔要求我著熱褲或者短裙出街呀！」好友如是問。

我聽到差啲畀薯條梗死。黑松露味薯條好好食㗎，阻我食飯者死。

作為一個似男人的女人，我好少嘢會上心，唔開心都係鬧兩句就冇事，好少嘢會激嬲我。好死唔死，「要求一個女仔唔做自己」呢個 request 係其中一個。

中學老師喺我中二嗰陣講過一句嘢，我到今日都記得。所以其實，似男人的女人，同似女人的女人都一樣，都唔可以得罪。我嗰日一切如常咁嘻嘻哈哈，可能係嘈親佢老人家。

佢叫我「Be a lady」。

當年我唔識反駁，個心有啲唔舒服，但係笑笑帶過就算。今日飽讀詩書（好似係），終於識得反駁。點解教養一個女仔，係要 fit 佢入一個框框，逼佢長成一個「似女仔」的模樣？我到今日都唔明點解女仔唔講得粗口，而同時間男仔講粗口個標準冇咁緊。點解女人就係要做賢妻良母？要忍受 mansplain？要日日做哂啲家務先叫好老婆？

不如返去清朝啦。

對於衣著都要管到底係咩玩法？都呢個年代，點解仲可以有人大男人到咁，覺得個 partner 一定要聽自己講，連旁枝末節到衣著都要管？

心甘情願咁，覺得有啲嘢做得唔好要改，因為「I want to be a better person」而變就係另一回事。

更何況依家係 partner 都唔係。可見將來都唔會係。

唔鐘意衣著？唔好追囉，多你一個唔多。而且唔係改內在而係改外在，可以睇得出一個人有幾膚淺。

Girl you are amazing，just the way you are。