【辦公室奇人奇事】英國恐龍大隻啲
每間公司都總係會有啲奇形怪狀嘅人同不可思議嘅事
何謂恐龍？
上回及上上回提要：何謂恐龍？
每間公司都有「恐龍」。
- 呢啲「恐龍」可能係停留喺白堊紀時代，脫晒節連 email 都未識用；
- 呢啲「恐龍」亦可能係一啲言行舉止同世界充滿違和感嘅人；
- 呢啲「恐龍」亦都係一啲「無料又要扮四條」嘅冗員。
恐龍理論：
只要人或事夠嚇人，即使已面對好多次，都依然會有震驚嘅感覺。
「恐龍理論」嘅情況就好似見到嚇人嘅恐龍咁，明知隻暴龍又大隻又兇殘，見到自然驚，而唔會因為我喺侏羅紀玩得耐咗就唔驚，只要佢夠得人驚，咁我見親佢出現我都係會驚驚㗎！
之前已有兩篇文分享過我喺香港辦公室見識過嘅恐龍，今次講吓英國有乜「恐龍」。
砌架變拆架
呢單嘢係正嘅！正在無諗過可以發生。
一個貨倉要起兩三層樓高嘅陳架，外判搵專門嘅起陳架公司搞，要訂料送料，再搵專門嘅工人嚟鑽地起架，都唔係細工程嚟嘅。傾好晒尺寸、物料、設計、價錢、動工日子，咁一切就按計劃進行㗎啦！
但呢個國度係無「按計劃」呢樣嘢。
首先明明定好咗送料日子都好，但佢臨時又話啲料缺貨，要推遲兩星期先送到料嚟。無料無嘢砌，自然工程就延誤咗。
終於等到送料嚟，鑽地、裝嵌，兩三日間已經起咗半個倉咁大範圍嘅架，樓高兩三層。咦，但到第三日下晝，佢全部同拆返晒，咩事呀喂？！好地地做乜拆？趕工喎！
工頭：「原來啲鋼架枝唔啱 size，短咗，我哋砌完想放個陳格上去先發現太窄，放唔到，所以一定要拆晒再起。」
WTF? Wrong size? Is it a JOKE?
工頭繼續：「不過啲啱 size 嘅料呢要下星期先送到，邊日未知。」
咦？即係又要耽誤工程進度喎！
問題係：
- 訂料前你哋唔係計好尺寸？
- 訂料後唔會對下尺寸？
- 開工前唔會睇一睇啲料啱唔啱？
- 砌好一層時唔會試下得唔得？要砌咗半個倉範圍嘅架先嚟試？
係咪好似恐龍咁嚇人？我另一個同事兩個已略有喺英國工作嘅「驚」驗，所以，我哋相視而笑，同時講咗句：
“Welcome to UK!”
Welcome to the 侏羅紀。
不請自來 x 三顧草蘆
大型啲嘅公司會唔會無咁恐龍？唔會囉！侏羅紀就度度都有恐龍㗎啦！大隻啲定細隻啲咁解，睇下係速龍、暴龍定三角龍咁解。
抄錶、報錶、交水費，本來就係咁簡單，唔係咩？我一直抄緊公司入面嗰錶，開咗 account，定時報錶，但後尾發現公司外圍地下都有個水錶，迷惘之下打電話去供水公司問，佢話我抄錯錶，外圍嗰個先啱，室內嗰個唔啱。
好啦，咁我之後抄返啱。
但跟住就發現外面個水錶行得超快，平均每日用量係 5 噸水！收到張賬單都嚇死你，兩個月幾千鎊水費，於是又打去查問下。
問咗十九萬億年同廿九萬幾次（真係歷時幾個月），佢話派人嚟睇，唔見有人，email 去追，無人覆 email，打電話去問，佢話叫我哋等佢哋覆 email，叫我哋唔使再打去追問。吓？緣分到了就嚟呀？
然後忽然一日，門鐘響起，佢哋嘅人喺我公司門口，忽然緣分到了。佢望下地下個錶，同我講咗句：
「係唔正常，郁得好快，我哋會派人再嚟睇。」
隔幾日佢真係再嚟多次（算極速喇），帶多個人嚟睇，嗰個人話：
「應該係有水管漏水，但要搵專門嘅人嚟檢查。」
隔咗唔知幾多日，「專人」忽然間到訪，又係無預約無剩，打我電話問而家嚟得唔得。得，因為話唔得，你會下世先嚟。
嚟到，揭開望一眼，閂蓋。
「係漏水，要掘地睇下。」
而家掘？
「我哋再搵人嚟。」
吓？你哋嚟咗好多次，每次都係望下個水錶一眼就走，肯定逗留時間長過佢交通時間，因為只係望一眼，5 分鐘都唔使，然後每次嗰句廢話你唔講我都知個水錶有問題啦！
但，水費佢已自動轉賬形式收咗。我唔理佢整幾耐，退錢應該都有排玩。
最最最正係，佢哋話的知外面個水錶唔係我要俾錢嗰個，裏面嗰個先係。
吓？！
送貨時間僅供參考
不請自來嘅人經常有，成日忽然間就出現，個忽然間仲可以係清晨 7 點半嗰種，有無諗過間公司係咪一定咁早有人喺度？而有時送貨司機可以就咁自己早咗嚟就早咗嚟，成件貨就咁放喺你門口就算。
乜買嘢唔係有約好時間幾時送貨嘅咩？有㗎，佢都會話你知送貨日期同時間，有啲好絕哋寫 0700–1900，明明係商用地址，office 嚟嘅，邊個得閒同你朝 7 晚 7 等收貨？
好喇，就算有啲好人道又好準確地話 1100–1500 送貨到你屋企，但都可以等到 1600 都未有人嚟，然後再收到通知送貨時間改做「Day End」，咁人哋咪白得你囉？請咗假喺屋企等咪浪費咗日假期？
混亂的財務阿姨
財務阿姨人唔差，工作勤力，問題係亂。
佢啲 Email 格式睇到人眼都花，同埋好似唔識用 email 嘅附件功能，不論收同送信都有問題，經常覆我叫我補文件俾佢，但明明一早就係上一封 email 俾咗佢，而財務部嘅中佬亦成日追返佢，問佢攞返應該附加嘅文件。
睇見呢啲 email 來來往往心都累。
「補返啲單俾我吖。」（明明俾咗）
「有無間 vendor 銀行資料？」（你上次咪找咗數，點會無。」
「呢張 Amazon £107.89 嘅單係乜嚟㗎？」（又點呀？）
由於真係太亂，於是佢「發明」咗個新方法，整咗個好複雜嘅 excel 表，叫我做完一張單上去填表，填公司名、買乜、銀碼，再剔有無收據、有無審批、有無填找數表格、有無上傳檔案。
唔單止咁，佢仲要人每張單開一個 folder，個 folder name 要係公司名加銀碼，譬如喺 Amazon 買咗 £237.89，咁個 folder name 就叫「amazon237.89」，而個 folder 入面就要放返上文 excel 表剔咗有嘅資料，個 folder 要分月份開，但又係你用錢買嘢嘅月份，係找數嘅月份。
有無搞錯？我哋要幫你做埋你自己嘅 filing 工作？你先係財務部喎！
重點係，每個人叫佢找數時 email 俾佢都已經填咗張表，附件有齊晒上述嘅所有資料，咁點解人哋要幫你再 filing 分類？
學校無教過
個個返工都係嚟做嘢㗎啦，唔識就邊學邊做，但應該唔會有人諗住嚟收錢返工淨係學嘢呀嘛？
又有啲人係咁，工作表現唔理想，需要提點同再觀察，但佢好不忿地話自己好勤力，仲會挑戰返工做啲嘢「學校都無教過」，仲講自己喺學校成績有幾好有幾勁。
喂呀，十優狀元都唔係返工乜都識晒呀嘛？唔識咪虛心學、勤力學囉，講乜學校無教過所以唔識？然後仲要講返讀書時候嘅成績？咁係咪可以出張成績表俾你代替出糧？再講不如你返學校讀多幾年書先再出嚟返工喇！
更多英國神獸級工作態度可睇下文：
更多辦公室奇人奇事詳見以下目錄：
恐龍出沒注意！
埋嚟睇，埋嚟揀！CLAP & LIKE！
以下目錄係介紹呢期最新文章同推介其他舊文，歡迎嚟慢慢坐、慢慢睇。