【跪地餵豬乸，都要睇值唔值】
連續幾個月，日日四點鐘都要焗住聽班差佬講大話，終於有記者忍唔住，要爆seed喇！（註一）
先黎個懶人包： 事緣前幾日，差佬又開例行記招， 有個女記者走出黎抗議，話班差佬對採訪社會運動既同行越黎越暴力，仲有針對佢地既趨勢。在場既警察公共關係科X先生聽到梗係嬲嬲豬（Sorry，而家唔可以亂講差佬個名，因為佢地申請左法庭禁制令唔畀人提）（註二）。佢即刻發爛渣，左一句「收聲」、右一句「呢個場係我哋嘅」，仲要趕人走……
Well，好大既官威，可以同2000年江澤文係北京當眾怒斥記者睇齊。
平時記者招待會，班差佬已經花大量篇幅 —同埋情緒化形容詞 — 去描述出面有幾亂、佢地做野有幾辛苦。而去到答問環節，佢地一聽到稍為爭議性既issue就避而不答。「花園」都唔同你「遊」，直接話 「無資料」就算。佢地次次都係咁，仲好意思話「保障市民知情權」果下好野。記者既責任唔係單純報道差佬/官員所講，仲要問大眾想知。既然咁驚畀人質問，又無諗過真係回答問題，不如，學林鄭市長咁，預先錄影條片，每天四點鐘準時放上Youtube播啦。
班差佬再唔係就去盡佢，向習近平申請，係香港特別行政區成立軍政府 （military junta），同蘇丹、敘利亞睇齊。到時「依法」將所有傳媒收歸國有，保證紙媒、網媒、電視、電台都捧警隊做「民族英雄」（註三）。個個警察都有三柴劉乜乜既禮遇，前呼後擁，Sir前Sir後。而家警察公共關係科「又要做雞，又要攞貞節牌坊」：一邊扮晒一國兩制、殘而不廢、做show有新聞自由；另一邊，就要人地只報道官方提供既單向/偏頗資訊，意圖利用傳媒引導輿論。香港人雖然係「港豬」，但仲未盲。唔係扮訓既人，週末食完晚飯，走落樓下（唔使搭車出九龍），打個白鴿轉就睇到/聞到第一手真相。而家咩年代呀，有常識既會畀你呃到？官方記者會唯一既作用，係畀TVB同埋一眾愛國愛黨傳媒霸住air time之嘛。
By the way，班記者又係唔抵幫既，當日難得有人大膽企出黎，維護同業尊嚴，呼籲杯葛差佬個記招，點知肯跟隊離場既只得蘋果日報、有線電視等等寥寥幾家。畀人踩到上心都唔肯反抗，仍然跪地餵豬乸等人「畀料」，值得咩？經過呢幾個月，係人都睇穿呢個會照稿讀唔會有料到架啦。若然要寫稿交差，開住無線新聞台照抄咪得囉，使鬼嘥時間去警察總部聽人講大話咩。
註：
- 〈警方記者會有記者不滿警不當對待發起杯葛 記招暫停〉，明報，2019–10–28
- 〈高等法院臨時禁制令 (HCA 1957/2019) — 針對警員及其家屬被起底及滋擾〉，警務署網頁，2019–10–28
- 〈被中國譽為「民族英雄」 傳光頭警長兒子留學紐西蘭被拒〉，自由時報，2019–10–30
(2019–10–31)