「走飲管」- 麻鷹唔管管雞仔

近年興起「走飲管」黎環保，老實講，如果呢個只係一種個人選擇，我覺得係無問題嘅，等於有人唔食牛，有人唔食海鮮，有人唔食肉，都係一種選擇黎啫，每個人都有佢嘅自由。

但如果呢個「走飲管」變左一個政策呢？咁就大有問題。

即係一間餐廳，杯係即棄嘅、筷子係即棄嘅、碗係即棄嘅、杯蓋係即棄嘅。而家你乜都照舊，剩係走條飲管當減左塑，呢D唔叫環保，叫「偽善」。

就好似一個男人，佢打老婆，禁固佢老婆，逼佢老婆做佢唔想做嘅野，乜都做齊，然後情人節求其送一支玫瑰比佢老婆；咁樣唔係叫「好男人」，叫「偽善」。

你如果唔係真心想環保嘅，你咪大大聲講出黎囉，唔夠膽大大聲講出黎，咪唔好出聲囉。我相信真係會因為你唔環保而唔幫襯你嘅人其實唔係好多，你繼續用即棄餐具，你生意都唔會真係大跌。

但係而家一堆大餐廳偏偏唔係咁，而係大家一齊加入偽善嘅行列。最得人驚嘅係，佢地係擺到明偽善嫁啦，不過香港人同佢地埋單，好啦，大家一齊偽善啦，大家一齊為環保「出一分力」啦！

我屌丫，你地知唔知人類同猿猴最大嘅分別係咩？

唔係果1% 嘅DNA，而係人類識得用工具，猿猴未識呀！

飲管係一個好偉大嘅發明，佢令人類唔會係飲野嘅時候淋到自己，亦都令人類飲野嘅時候嘅動作變得優雅。

作為一個人類，你唔想要膠飲管，係咪應該拎D替代嘅工具出黎呢？例如之前台灣人發明嘅䉀渣飲管，又或者洗得乾淨嘅玻璃飲管之類丫？

無，佢乜都唔比你，叫你「忍」下，叫你為環保「出一分力」！

乜野呀！明明一件大好工具係發明出黎解決問題嘅，而家你叫我唔好用，叫我「忍」，叫我為環保「出一分力」？你對唔對得住發明飲管嘅人呀？

同埋如果咁樣係講得通嘅話，人類所有嘅工具都講得通嫁喎！

即係你唔好用電腦啦，電路板係好難分解嘅，所以用返算盤啦！「忍」下啦，為環保「出一分力」啦！

你又唔好著風褸啦，因為尼龍係好難分解嘅，所以著返純棉啦！係有D拮，「忍」下啦，為環保「出一分力」啦！

你又唔好住係高樓大廈啦，因為石屎係好難分解嘅，所以住返山洞啦！「忍」下啦，為環保「出一分力」啦！

係咪痴線嫁！

老實講，所謂「走飲管」，其實完全係「麻鷹唔管管雞仔」，對真正嘅問題持迴避態度，然後叫受害者承受後果。

「走飲管」其實好少事，我真係唔係好介意拎起個杯黎飲汽水（特別係 IKEA 餐廳果隻杯，唔落冰其實飲起黎幾方便）。

但如果你接受左呢樣野，就好容易會被人滑坡到你接受其他更多唔應該接受嘅野。

例如「民主」，香港人無民主嘅真正問題係中國共產黨果度，但如果你迴避問題，成日掛住玩香港嘅立法會選舉，咁就係「麻鷹唔管管雞仔」，叫香港人含淚投票，「忍」一下，「大局為重」，為民主「出一分力」。

咁後果係點？呢幾年大家香港人都有目共睹啦！