貝星人 2024 睇啲乜？ — 3 月份
《Pam & Tommy》、《Community》、《誰叫你不乖》、《韋科慘案﹕末日烈火》、《火山危機：白島救援行動》、《致死方休，跨國情侶弒親疑雲》、《少年法庭》、《淚之女王》
呢個月睇啲咗 2 套美劇、2 套韓劇、4 齣紀錄片，喜好排名如下：
- 《Pam & Tommy》：拍得好、演得好、寫實又戲劇性，發人深省。
- 《致死方休，跨國情侶弒親疑雲》：紀錄冊，離奇凶殺案，永遠都無人知邊個先係真正兇手，同上面《Pam & Tommy》並列第一名。
- 《Community》：超齡學生，大學背景，輕鬆搞笑處境劇。
- 《淚之女王》：非典型韓式財閥愛上平民嘅愛情劇，搞笑浪漫但老套同膠。
- 《少年法庭》：認真題裁，超膠韓劇劇本，但案情同道理 OK，同《淚之女王》同分，都係膠住咁睇。
- 《韋科慘案﹕末日烈火》：紀錄片，都係睇美國警察幾廢，同埋邪教幾邪。
- 《誰叫你不乖》：紀錄片，包裝成學校嘅虐兒機構。
- 《火山危機：白島救援行動》：紀錄片，去旅行參觀火山遇上火山爆發。
質素平平居多，得頭三位值得推介。
《Pam & Tommy》
呢套劇之前寫咗篇後感（望上一行就係「傳送門」），我嘅評價係幾高嘅。翻炒話題性真人真事舊聞拍成電視劇，劇本、選⻆、演技全部都好到位。彭美拉同湯米李可以話已經唔係呢個年代嘅藝人，但喺 90 年代佢哋都紅過，尤其當時社會風氣唔及而家開放，彭美拉以賣身材成名點都俾啲道德人士睇唔起，以致佢同老公嘅私藏性愛錄影帶流出一事，喺當時互聯網初冒起嘅年代，法律保障唔到佢哋嘅私隱，連普羅大眾對佢哋都無太多同情心，更甚係傳媒炒作、欺凌，令兩位受害人多年嚟不斷受到二次、三次、N 次傷害。
呢套電視劇好睇之處係佢無賣弄色慾場面（少少鹽花又實有），反而好努力還原緊成件事嘅始末咁，當然直相只有天知道，但作為觀眾覺得導演其實係為彭美拉發聲，撻伐互聯網世界幾荒謬、人性又可以幾醜惡、傳媒又幾殘忍、法治又幾無力，多過係借彭美拉嘅呢段過去賣錢。
我覺得有啲似英國電視台 ITV 將英國郵局醜聞案改編成電視劇 《Mr. Bates vs The Post Office》一樣，舊事重提或者係鈎起受害者不愉快回憶，但同時亦可以令觀眾反思，甚至引起社會關注。BTW，而家警方可能界入調查呢單郵局醜聞案，因為有證據指 Royal Mail 管理層一早知道個系統有問題，但都老局啲郵局支局長穿櫃桶底。
講返《Pam & Tommy》，詳細後感可睇上面「傳送門」篇文，呢套係今個月我睇完覺得最好睇嘅電視劇，真人真事改編，Juicy 得嚟又發人深省。
《致死方休，跨國情侶弒親疑雲》
今個月喺 Netflix 睇咗 4 套紀錄片，得一套好睇到值得推介，就係呢套。
《致死方休，跨國情侶弑親疑雲》講述一對高材生情侶留學時喺大學認識，個女仔屋企有啲家底，個男仔老豆係德國外交部人士，大家都有啲財有啲勢咁。未幾，女仔父母發現死喺屋企，被兇殘手法謀殺，佢哋個女雖然有唔少異父或異母哥哥姐姐，但都頓成孤女咁，個個都好同情佢。
不過劇情好快就峰迴路轉，警察憑佢哋喺事發時租車旅行嘅行車紀錄，發現行駛里數同呢對情侶俾口供講去咗咩地方唔係好夾，反而個距離就似係往返個女仔屋企，於是就開始懷疑呢對情侶，而呢對情侶就展開歐洲逃亡，亦等於間接承認咗同單凶殺案有關。
呢套紀錄片最引人入勝之處係，呢對情侶被捕後口供不斷變，到最後判罪、坐監、放埋監都無結論誰是兇手，劇情 keep 住峰迴路轉，但兩個人就咁喺監獄幾十年。而女主角後生時幾靚之餘仲有種特別嘅魅力，比佢年輕幾年嘅男主角明顯唔夠帥氣同乳臭未乾，令人覺得奇怪同懷疑，呢個女仔睇得上佢，係咪只係利用佢嚟殺自己父母。
查案初期，男嘅話係佢自己殺，女嘅就話無估到個男真係會咁做，跟住個男嘅又唔甘心，話其實係個女仔殺自己父母，佢只係配合做不在場證據，而個女仔就堅稱自己有諗過無做過，而男嘅亦一直堅持自己清白。兩個人由打得火熱嘅年輕情侶，然後變成喺庭上互相指控嘅過氣怨侶，相方都有各自論點同所謂嘅證據，法庭最終判兩個人都有罪，佢哋嘅人生最光輝嘅三十幾年都喺監獄度過，但最後又離奇地同時得到特赦，之後女嘅禁口不言，男嘅依然話自己清白，且相當活躍，兼且親自喺呢套紀錄片度講返佢嗰個版本嘅劇情。
究竟誰是真兇？
我自己覺得兩個都係兇手。
《Community》
呢套我本身係「陪太子讀書」而睇。鬼佬 G 好鍾意呢套電視劇，話自己係 huge fan，見到 Netflix 有得睇，佢就想同我一齊翻睇，睇下我鍾唔鍾意，當我睇睇吓開始都鍾意睇時，佢甚至唔俾我一個人自己睇，好堅持想我同佢一齊從頭睇多次，可見佢係真心愛套劇。
劇集以大學做背景，幾位主角就係同學，由被吊銷律師牌嘅中年假律師要考返個 Degree，有寂寞但有錢嘅老人讀極都唔畢業，有純情但小家嘅年輕女學生，有自閉同低能嘅男同學，有單親黑人媽媽，有熱衷社會活動同男女關係嘅金髮美女，一班完全唔同性格背景嘅人走埋一齊，喺一間低能嘅學校入面鬧出各種笑話，但賣笑聲亦賣溫情，輕鬆得嚟又有點暖嗰種。
一開頭覺得《Community》有啲似佢之前推介我睇嘅《The Good Place》咁，都係處境劇，幾個主角都係不同膚色、不同階級、不同價值觀，睇佢哋之間嘅互動同矛盾，點樣由爭執變和而不同，點樣相愛但又唔使樣樣相同。不過，睇落去我覺得《Community》更似《老友記》（Friends），睇住 7 個性格鮮明又矛盾嘅主角慢慢建立友誼，觀眾好似一齊參與喺佢哋嘅友誼之中，然後劇情係低能不合理，但好多搞笑場面，輕輕鬆鬆 20 分鐘一集，相比之下，《The Good Place》多少少人生同人性嘅探討，層次同方向都不盡相同。
《Community》總共 6 季，第 4 季我「被棄劇」，因為忠粉 G 話第 4 季換咗導演，啲笑位笑唔出，唔睇無損失，甚至導演回巢執導第 5、6 季時，都好似當第 4 季嘅劇情無發生過咁去寫。我個人推介可以睇第 1、2、3 季就夠，第 1 季係建立緊 7 位主角嘅人物性格同佢哋之間嘅關係，第 2 、3 季就係根據佢哋嘅角色而衍生好多笑料，第 5 、6 季已換走咗 3 個主角，有啲就紅咗無時間再拍處境劇（好似當年古天樂要拍《神鵰俠侶》就離開咗《餐餐有宋家》咁），有啲就耍大牌不滿第 4 季內容差而唔再接拍，但當主角無咗 3/7，後加幾多新角色落去都已變咗質，同一煲湯換咗幾樣材料都唔會再有同一味道。
《淚之女王》
今個月睇咗兩套韓劇，兩套都麻麻地。
《淚之女王》有金秀賢（《來自星星的你》）同金智媛（《太陽的後裔》）呢對金童玉女做男女主角，加埋編劇朴智恩曾執筆《來自星星的你》同《愛的迫降》，照計都係愛情喜劇嘅保證，但呢套劇情好有一貫舊式韓劇嘅老套：平民打工仔愛上財閥太子女、女主角身患絕症得返三個月命、白鴿眼嘅外母同難頂嘅外家、男女主角有怨侶變返情侶等等。
編劇嘗試加啲新鮮元素落幾條老套橋上：有錢嗰個係女主角，喺韓國男尊女卑嘅文化入面，而家劇入面大聲講嘢有話事權嘅係女主角；男女主角係兩公婆，但係係感情唔好嘅兩公婆，面對絕症唔係喊苦喊忽，而係男主開心可以呢世甩走個霸道老婆，兼氹掂老婆仲可以有一大筆遺產﹔兩公婆感情好有隔閡，但男主角為咗討好有絕症嘅女主角而得到遺產，扭盡六壬氹女之間令兩人唔覺唔覺翻撻返。
但即使有呢啲元素，依然係老套。尤其見到男女主角明明已經做咗三年夫妻，但見面互動時仲好似未開始戀情嘅少男少女咁又尷尬又面紅耳熱，好無說服力，由本來設計成好笑嘅橋段變得好唔合理，我作為觀眾睇得尷尬。雖然成日話睇韓劇要將理智放埋一邊，因為唔合理嘅犯駁劇情太多，但作為一套劇嘅大橋，呢下真係好難咁唔理智地睇落去。
睇到第 5、6 集，有少少想棄糊。
《少年法庭》
前幾年上嘅韓劇，因為女主角係《信號》（Signal）女主角做而開嚟睇，點知第一集已嚇親我，女主角整容整到我爭啲認唔出佢，塊面又濶又膠，一對朱唇打針打到孖潤腸咁，佢本來都唔係話賣靚，但個樣搞到咁好令人出戲，好彩係佢個樣只係喺第一集尤其崩壞，後面集數都叫膠得嚟可接受。
劇集係講韓國嘅少年法庭，未成年嘅少年人犯法，就會去呢個法庭受審。根據套劇講，韓國少年法庭嘅法官人數好少，個案囤積。劇中有啲法官就只想 KPI 好好睇睇，快刀斬亂麻，講求效率咁審晒啲案就算；有啲就對少年人充滿愛心，希望透過法律同教導，調校好走歪咗嘅下一代；有啲就好似女主角咁，好憎少年犯，判官上身（佢又真係法官），用法律懲誡少年犯。
劇情最膠係女主角成日似刑偵警探多過似法官，佢走出去私下查案嘅劇情可能仲多過坐喺法庭上審案，韓國啲差佬死晒咩？同埋自己做法官都唔守法唔避嫌，佢本人都漠視法紀喎。但撇除呢點，套劇本身啲案件同帶出嘅道理都係睇得過嘅，特別見到啲權貴犯事都可以喺法庭上輕鬆甩身，呢種不公義喺現今社會並唔罕見，法律面前究竟係咪人人平等，大家心裏有數，理想歸理想，現實歸現實。
《韋科慘案﹕末日烈火》
除咗《致死方休，跨國情侶弑親疑雲》外，今個月睇過嘅另外 3 套紀錄片都相當平平，所以只短評。
《韋科慘案﹕末日烈火》講嘅案件同邪教「大衛教」有關，所以又有人叫呢單案做「大衛教慘案」。呢個邪教組織喺美國（係，啲紀錄片慘案 90% 發生喺美國咁）擁有自己嘅大宅，教主同佢嘅信眾住埋一齊，因為佢哋囤積武器，於是引嚟政府（AFT — 美國煙酒槍炮及爆裂物管理局）去搜查，然後展開咗歷時 51 日、接近兩個月嘅對峙。
事件荒謬之處係 AFT 去到現場並未成功搜查到，但就引發槍戰，2 小時槍林彈雨嘅場面仲誇張過虛構嘅警匪片，一嚟已經令 2 個執法人員同 6 個大衛教教徒喺亂槍中死亡，然後 FBI 介入都無用，雙方僵持咗 7 個星期，最後大宅失火，燒到無晒，教主大衛同幾十個信徒葬身火海，包括大肚婆同廿幾個細路仔。
紀錄片以訪問唔同政府部門（警方、AFT、談判專家、FBI）以及逃出生天嘅教徒交代案件始末，呢個手法睇到各方都自說自話零溝通，如果佢哋合作好啲，未必要死咁多人，所以基本上呢套紀錄片又係喺美國執法人員塊面上大巴大巴扯埋去。
唔睇毫無損失，鍾意睇紀錄片的話可以送下飯，本身一般興趣的話完全可以 skip。但呢單案亦拍成咗電視劇《Waco：The Aftermath》，都可能會睇下。
《誰叫你不乖》
呢套紀錄片 嘅特別之處係，受害者唔係做受訪者，而係以導演身分兼第一身位置去拍攝呢套紀錄片，帶住啲舊同學回到過去嘅恐怖校園，一齊闡述返少年被虐嘅回憶，揭露美國教育制度下竟然存在嘅虐兒學校。
呢間學校嘅巿場推廣做得幾好，講到間學校好有愛，只係愛唔係溺愛，而係要「管教」，佢哋主要客群係問題少年嘅父母，令啲父母相信送啲有行為問題嘅仔女去寄宿接受「矯正計劃」，等專業教育人士好好嚴厲管教下，然後可以行為端正，學業有成。
Well，教仔女嘅嘢真係唔可以假手於人，呢間學校實質掛羊頭賣狗肉，所為嘅「嚴厲管教」實制上係精神同肉體虐侍，佢哋啲規條同教導手法儼如邪教組織。當啲父母幫仔女報名返學之後，學校就會派人半夜嚟你屋企用「綁架」手法擄走少男少女，然後一班少年人入到校園就失去自由、尊嚴、人權，因為父母授權，佢哋就被迫同一班虐待佢哋嘅變態老師「困獸鬥」，由於體型同權力不對等，加上學校位置偏僻，又被禁止對外（包括父母）自由聯絡，基本上長期被虐亦無處可逃，叫天不應、叫地不聞。
套片拍得唔特別好睇，組織有啲鬆散，但係內容係驚人嘅，喺美國竟然有好多呢種合法嘅教育團體每日非法地以「管教」之名虐待青少年，而啲青少年父母仲要俾學費佢哋⋯⋯
而更荒謬係，佢哋嘅虐待式管教只係「管」，無咩嘢「教」過佢哋，成個青少年唔只虛渡，仲要身心受挫。雖然套片拍得唔叫好，但好尊敬同欣賞導演以受害者身分企出嚟去揭發呢單案俾世人知。
《火山危機：白島救援行動》
最後呢套紀錄片一集過，講紐西蘭白島嘅火山遊覽活動，最後喺 2019 年因為火山突然爆發而釀成可怕災難，超過 20 人遇難。
好好地去旅行，有一對夫婦仲要係 Honeymoon，點知咁嘅收場，死嘅死，逃出鬼門關嘅人都一身火燒傷疤。
事後又係話其實座火山會爆發並非無跡可尋，2013 同 2016 年都爆過，點解仲開放俾旅客參觀？呢單意外之後，而家白島係封咗，但係意外造成嘅傷亡係跟住傷者同死者家人一世。
由於成套紀錄片只有零碎旅客拍嘅片同受害人坐定定受訪嘅片段，所以睇起嚟會有啲悶。
埋嚟睇，埋嚟揀！CLAP多 49下！
多謝大家睇到最後，Medium 改制後，以「拍手」同「留言」去計算俾作者嘅稿費，如果篇文唔差，請幫忙多多拍手，可以拍足 50 下！
以下目錄係介紹呢期最新文章同推介其他舊文，歡迎嚟慢慢坐、慢慢睇。