豬年新春前雜談

話晒都係入 Medium 以黎第一個農曆年，點都搵啲野寫下

每逢農曆新年一到，大家就知道一眾抽水廢老長輩，又已經開始蠢蠢欲動。長輩式問題，大家都心裡清楚明白，去親拜年，除非你一踏入家門就即刻高叫我屎急要即刻去大便，否則都一定要中一兩題（甚至更多）：

「考試成績點？諗住讀乜科？」

「有無阿乜乜表哥乜乜表姐咁叻？」

「月入幾多？」

「幾時拍拖／結婚／生仔？」

「有無買樓？」

其實諗深一層，農曆新年明明一家團聚，開開心心，本來係好事，但點解硬係都要有人不識時務問呢問露，破壞晒啲氣氛？

講到最尾，可能都係代溝問題。老一輩雖然話就話食鹽多過我地食米，人生閱歷經驗豐富，但並不代表一定能言善道，隨時交際手腕歪埋一邊，甚至完全唔懂得點樣同後一輩既親戚作有效溝通。等於呀羅局長都可以一臉無辜咁問點解人如果真係有百二歲六十歲唔可以叫中年啦。

離地既野，都係點點滴滴， 1cm 1cm 咁累積而成。等於龍珠舞空術一開始都係浮空先啦。尤其係當恃住自己輩分高，一年又見得果一兩次咁大把，理屈詞窮被迫無話找話咁講，自然就飛埋晒呢種家問題出黎。你話係咪可以本質都係出於一種關心呢？我都唔可以完全100個%抹殺既，但係自己耳仔聽到果下，真係完全唔係果回事，直頭覺得俾差佬盤咁囉。

況且依家香港真係唔係咁好景，好少人係香港真係話活到如魚得水，成功在望，即將上岸，大家都係有苦自己知，用唔同既力道日日咬緊牙關過日子。講真有邊個會突然拜年受左呢啲問題之後，可以好似花輪同學好意氣風發咁講：

「吖，你唔問開我都唔想講，我岩岩先跳左去大摩，加左一倍人工，依家年薪有過千萬，同埋下個月同一位法俄超模結婚，預料都至少會駛一二千萬係呢個馬爾代夫，歡迎你到時黎觀禮。至於新居方面，暫時諗住住住干德道頂住先。都唔算太貴，六成首期我都係一炮過。至於條女梗係我晚晚都唔對佢客氣啦，我估計下年就有成果架啦，姑媽你等我好消息呀。」呢啲情節，比寫小說出現炸嘉頓雜餅更離奇啦。

本來大節都係為左凝聚家族，展望將來，新一年有個好意頭，呢個我推測係個慶祝既本意。但係，當一件事本來就有傳統成份，就會有一定程度既迷信色彩，而本來係科技既帶領、智能手機既出現、個人主義日益風行既今日，農曆新年真係應該可以話係變質，甚至係可有可無既，一切都視乎你究竟有幾著重我呢段頭一句，係咪可以抵消其他一切光怪陸離既形式：

明明已經有 Youtube 仲駛乜睇汪明荃？明明已經有自動過數仲駛咩派利是？明明我自己一個可以上網打手機，點解我仲要同班親戚痴痴呆呆坐埋一檯？呢一切一切，都係反映緊愛就係選擇，選擇就係放棄。農曆新年，關鍵在於能唔能夠放下自我，擁抱他人。如果你過到呢關，姨媽就算係咁塞你食藍罐曲奇嘉頓雜餅瑞士糖，仲當緊你十歲細路，你都可以處之泰然。

你話真係好無謂。拜年浪費晒自己啲時間。 Well，人一生浪費既時間，又豈止在於拜年呢！香港仲有五六個鐘先進入子時，我祝大家新一年文思飛躍，一文風行啦。

By the way，新春電視真係好興炒冷飯。但我如果呢幾日有時間，又將啲完全都無人 Clap 而我又覺得幾岩時間既文拎番出黎推俾大家一齊炒冷飯先。我地打賭今年 TVB 會唔會又播唐伯虎點秋香吖不如。