講吓「大台」近日連番舉措

最近 TVB 有好多動作，而每次都係柒到甩碌嘅，仲要係接二連三、災難性地柒。 其中包括：不識送禮勤、祖藍扮柒婆、矮佬俾高仔串（按年紀講），同隔離台battle下均相形見絀、劣評如潮、通通慘敗收場。

近期唔少老股東表態，明示大台營運方針過時急需調整：本來請「兩大矮人」高調坐陣，原意係想「吸納後生仔」市場；但明顯近期嘅舉措係本末倒置 — — 更加進一步逼使「正常人」紛紛表態同大台嘅「老嘢文化」割蓆。而大台就更進一步成為大眾心目中「outdated」、「上年紀先睇」嘅象徵。

我無意猜度大台呢個舉動係咪想曲線宣傳炒熱：但無疑從好幾個恥笑大台嘅post嚟講，根本就無幾多人係會想搵番條原片嚟「睇佢有幾柒先」：當大台嘅「柒」已經成為一種常態，事情發展已經喺群眾嘅預期範圍內，其實佢唔積極變陣嘅話，根本就唔會再得到群眾注意。（雖然本人好憎林作，但我不能不提嘅係佢自我宣傳嘅手法尚算成功，因為佢懂得掌握「群眾嘅期望值」。）

講咗咁多，其實我對 TVB 不至於憎恨：對於由細到大「餸電視飯」、無電視不歡、沉迷程度「中電視毒」嘅電視精嚟講，點都會有少少感情，但又不至於會為佢講說話。

正如我搬咗屋之後係完全無睇大台嘅習慣。但返到娘家，仍然係可以就咁開著部電視成晚：佢就算播啲濕鳩電視劇、每次都係「曹永廉」、「蕭正楠」等人擔正扮後生，我都會照單全收有得佢播住當背景聲就算。或者係我唔忿氣啦，我會寧願一個月益佢一晚收視，都會有個主觀意願睇佢有咩變化。不過就算中毒如我都好，如果你叫我睇佢果啲所謂「攪笑」嘅「綜藝節目」，我都會忍唔住轉台、熄電視。

簡單一句結論就係：越大動作越多舉動，就越破壞慣性收視。

所以你話，攪咁多嘢做乜？

其實唔止大台，最近睇到好多嘢都係咁：你越想變、越急於求變，件事就會越「變」到去你唔希望轉變到嘅方向。所謂嘅「越掙扎越加速滅亡」就係咁解。我目前對大台嘅走向係無感嘅，只係純粹覺得：佢要自取滅亡嘅邊個都擋唔住，我哋啲少少網民塘邊鶴一句半句贈言就令到佢起死回生、萬壽無疆，就我哋入咗去做出謀進言啦。