說起 Yellow Object，我只想起孟子和齊宣王

回鄉數天，當我喺公司攞罐小熊維尼爆谷出嚟做手信嗰陣，我呀姐剩係講咗句：派 Yellow Object 咁大膽？

我嗰時都未知咩事，唔識畀反應。（搞錯呀！？）咁回鄉就係要逃避一吓呢個咁 twisted 既香港嘛，而家咪 catch up 番咯。

一睇完單新聞，我即刻諗起讀書嗰陣學既一句孟子既名句：

聞誅一夫紂矣，未聞弑君也。

未聞弑君也

尊重知識產權，quote 番個原文先：

齊宣王問曰：「湯放桀，武王伐紂，有諸？」孟子對曰：「於傳有之。」曰：「臣弑其君可乎？」曰：「賊仁者謂之『賊』，賊義者謂之『殘』。殘賊之人，謂之一夫。聞誅一夫紂矣，未聞弑君也。」

畀番個 21 世紀廣東話版畀大家：

齊宣王問，商湯流放夏桀 (夏朝亡國之君)，周武王就隊冧咗紂王 (商朝亡國之君)，有無啲咁既事？

孟子就話：咁中史書係咁寫既。

齊宣王就串佢：咁臣子弒君 OK 嗎，亲。

孟就話答：破壞「仁」既 object 就叫「賊」，破壞「義」既 object 就叫「殘」，又「賊」又「殘」既 object 就叫做「Yellow Object」。我呢，就剩係聽過有嚿 Yellow Object 叫紂王畀人隊冧咗，弒君就無聽過喎。

呢種思維真係好可怕

或者大家會覺得成個推論雖然唔太完美，但仍然可以接受，不過我就覺得真係好可怕。

如果成個推論只係話「無仁無義」就失去作為「君王」既資格，大家可以取而代之，就都 OK；最可怕個位係成個推論逃避討論「如何合法地弒君」呢個問題，變相堅持「弒君」仍然係唔啱既，但又為咗自圓其說，格硬安另一個名號畀呀紂王 (原文叫「一夫」、我個 version 叫「Yellow Object」)，咁「聞誅一夫紂矣」就當然無問題啦。

用暴力去傷害一個已失去反抗能力既「人」當然唔啱，無論咩時候警隊都一定會認同，但係都鐵証如山你啲手足打人咯喎，no no no，it’s just a yellow object。

咁荒謬咁無 logic 既嘢都講得出！？背後佢 skip 咗一大堆字無話你知啫，著黑衫既就係「賊」、戴頭盔既就係「殘」，又「賊」又「殘」咪就係 yellow object 咯，明唔明？

講吓講吓，股「浩然之氣」仲要湧埋上嚟添呀。

曱甴、Yellow Object，我哋已經失去咗一整個警隊

撞到呢種思維，正常人會好憤怒 (根本無 logic 可言嘛)，認同既人卻視之為真理 (就係真理先唔需要 logical thinking)，由人到曱甴再到 yellow object，就同「聞誅一夫紂矣」一樣，大家經已再無討論空間喇。

所以當大家話禍不及妻兒、po po 都係打份工既時候，我只係笑而不語。對家經已無當你係「人」，反而你仲當對方係「人」，只能講道德情操之高，鄙望塵莫及。

呢個時候我又想起 <<論語 / 憲問>> 既一句：

或曰：『以德報怨，何如？』

子曰：「何以報德？以直報怨，以德報德」

以德報怨，你對得住其他對你既善行？

用適當既代價回報惡行，用善行回報對你既善行吧。

後補幾句：

我好記得當年鄭生話，如果一個思想、一個學說有幾荒謬、點樣畀人不斷攻擊都好，如果佢喺人類既歷史長河入面總係陰魂不散、死唔斷氣，佢一定有佢既道理。

無 logic 其實好多時都唔係咩問題，我更家唔係貶斥儒家，吸收佢有道理既一面就好了。

每月 5 美金成為 Medium 付費會員，閱讀平台上所有文章，同時支持你喜愛的寫手繼續寫出你喜歡的文字。想知道更多我在 Medium 的心路歷程，按這裡吧！