話說前排我俾人綁架左去娜美星…

[粵/懺悔禱文]我都知道用呢個理由去解釋自己係 Medium 成個幾月都無寫文，係比較牽強一啲。岩岩睇番下個 Partnership Program 既 Stat，即刻發現自己既稿費近期跌到零，真係慘無人道呀。原來係 Medium，同現實世界一樣，真係會手停口停架。但係無辦法啦，邊個唔知呢個世界真係生活迫人呀！

想寫野係一回事。有無時間寫係另一回事。

係，我知道大家都應該無乜興趣會想知我呢個社畜係呢段日子究竟做左乜。但係難得黎到呢個 Long Weekend，終於俾我搵到幾分鐘出黎寫文，我認為機會難逢，真係唔應該輕輕放過。大家舉高你地既雙手啦，俾啲力量我！（悟空元氣彈 mode）

首先都係一定要黎番啲三幅被：

係香港本身就唔可以悠閒渡日。正所謂你有你既生活，我有我既 OT，只不過呢輪辦公室工作比平時更忙，老細俾平時更 Chur ，完全做唔到所謂既互諒互讓，反而佢地既「無節操沉解標準」，就不斷調低好讓佢地永遠都達標。

所以時間，比本來更加拮据。

而且，呢輪香港發生左兩件幾大既事，咁岩都同我有少少關，令到我有啲更為分身不暇既感覺：

第一，就係山竹襲港

或者你會講：山竹關你屁事！作為有廿年以上睇打風既業餘觀察氣象愛好者，對於有熱帶氣旋襲港點都會有一種情意結係度。尤其係見到一個咁強既颱風（名副其實就係：好強既氣！）打過黎香港一個豆膶咁細既地方，心入面往往就會覺得好矛盾，一方面就唔想佢打到正一正；但另一方面又想見到究竟吹到超過 118 km/h 甚至更高速既風，會係點樣既一回事。

畢竟聽老人家講咩溫黛愛倫露斯黛蒂，想當年既野，當年既小辣椒們（或稱為十號風球名人堂）依家都入得老人院咁滯啦。於是果幾日，就係咁係個網度睇數睇圖睇預測，同其他氣象觀測者吹廢水，就咁浪費晒啲光陰。同埋，出乎意料既係，結果山竹對香港既破壞，係遠遠唔及自己政府本身所造成既人禍架！

呢個故事教訓我地一條金科玉律：

天作孽，猶可恕。自作孽，不可活。

更多有關政府果陣推廣大市民返工去死既評論，我會慢慢係 Facebook 度剪輯番啲文俾大家睇。希望大家可以期待一下。至於第二件事就係：

第二，香港股市大跌

其實香港既恆生指數係六月就已經係33,000 點到見頂。當人人都以為貿易戰只不過係嘴炮，而美國股市又不斷破頂既情況下，根據舊有理論，香港股市照計係好難跌得落既！但正如我一直提倡既 Crisis 理論：如果俾你估到會發生咩咩咩既，呢個世界就唔會有 Crisis 唔會暴跌，人人都可以係股票市場撈一筆，仲駛打工打到五癆七傷啦！

而正因股市不斷向下，我地呢啲唔見棺材唔流眼淚既，就日日係度短炒渡日啦。而結果當然，就係炒黎炒去，都係得個桔。唔駛連交易費都輸埋，都算係咁。低手既野有時就係咁：有時浪費既時間，隨時仲寶貴過你賺番黎既錢架！於是另一個教訓就係：

永遠都要跟住大戶走！

但有時，同你老婆或者女友一樣，你根本唔知大戶想點。你以為跟左大戶，點知大戶一早走左，然後仲起勢用剷泥車剷走你。我地直頭有朋友直言：個市好難玩呀！

的確。較經典既係上一兩星期一日插完五百點，然後下一日又夾番轉頭，夾下夾下夾番去 28,000點！走少一陣，真係春夏秋冬咩袋都夾爆你！

Anyway，全身而退已經係萬幸。好啦，希望黎緊可以寫返多少少文。我仲有好多文債未還呀！！之前有篇話要講日本仔談香港美食既未寫，中文 medium 咖啡熱潮又未寫，有幾首詞評應承左又無寫，仲有啲其他小說短文話放又未放之類……

講完對唔住之餘，大家真係要等我。如果未 follow 我既，計我話都係拿拿臨 follow 左我先。hard sell 完畢。