記住，下年聯儲局係有八次議息記者會
自從Ben Bernanke開始為聯儲局議息會議加入會後記者會，一直都係隔次會議先有一次記者會。
記者會嘅用途，當然係加強貨幣政策溝通；特別係金融海嘯之後聯儲局要採用Quantitative Easing等嘅新式非常規貨幣政策，Bernanke有需要用記者會作公開政策解釋。
但進入加息週期後聯儲局每次加息，都係只會係有記者會嘅會議先做；好似今年之前三次加息都係咁。原因簡單，主席可以係加息之後用記者會加返啲Forward Guidance，令市場同聯儲局對未來加息嘅預期更為一致。
呢個做法可以講係恆之有效，但變相一年八次會議，只有四次真係會有行動，另外四次係純技術討論；而加息「時機」亦變成12週先會有一次，可能令聯儲局對經濟唔能夠作出及時反應。
但下年開始每次議息會後都會有記者會，就即係聯儲局嘅利率政策可以因應經濟現況而作出較即時嘅反應。特別係依家聯儲局政策利率「Just Below」自然利率嘅理論水平，而金融市場前景又唔太理想，聯儲局有更多「做得野」嘅會議時機，其實係相當理想。
但一個「副作用」就可能係聯儲局官員嘅中期預測嘅效用︳可能會較過往幾年為低。因為多左記者會，聯儲局可以更Data Dependent，轉身更快。