英國 — 潔癖既地獄
英國人既日常衛生意識比較低，雖然我無潔癖，但有時都會頂佢哋唔順。更大鑊既係，佢哋成日都今日既我打低昨日既我——低處未算低，我黎佐一年幾，間唔中都仲會俾佢哋嗰種視所有嘢都係乾淨既行為，出其不意咁嚇親。
著住鞋入屋四圍踩＋地羶呢個組合＝勁污糟
大家睇電視都會見到好多外國人著住鞋直接踩上床，呢個係真既，好多英國人都係著住鞋入屋四圍踩，佢哋仲要係舖晒地羶，我其實真係唔明點解入屋唔除鞋。
有次我個櫃有問題，前屋主就著住佢對行山鞋想直接踩入我間房，好彩佢見到我面有難色，問我駛唔駛除鞋，我即刻話要。大姐，我間房入面張地羶雖然唔係好乾淨，但係你對鞋真係好污糟啊。
我搬佐入嚟之後，一直都覺得張地羶好污糟，我買過啲地羶清潔過幾次，都仲係覺得唔乾淨，我好唔鐘意地羶，但係因為我住地下，如果無地羶冬天真係會好涷，所以又唔可以掉，我依家係用一張CHEAP CHEAP地羶蓋過張污糟地羶。
後來屋主過佐身，佢細佬見到張地羶，驚呼：「呢張係我哋阿婆／阿嫲（grandma）既地羶啊。我心稔，救命啊，呢張地羶到底用佐幾耐啊。好想掉佐佢啊。
後來同同屋傾，佢話有啲英國人真係會一返工企就跳上床，但當然唔係人人都係咁，佢就唔係，佢入屋係會除鞋既。
著鞋上床，稔真啲，其實可能都係習慣唔同，英國人係朝早沖涼，可能佢哋本身就已經當床係一個唔乾淨既地方。同埋佢哋本身都會隨地瞓地下，所以或者佢哋唔覺得床係需要乾淨。
加上我係唔會見到佢哋著住鞋踩上床，只要佢哋唔好著鞋上我張床，我唔會話好震驚。
講開地羶，好多有返咁上下歷史既英國人既屋企個厠所入面都舖佐地羶，同厠所入面係無洗手盤，即係每個人開個厠所門都未洗手，稔起就覺得污糟……
所有地板／平面都係乾淨既
好嘞，地板雖然應該係乾淨過地羶，但係英國人視所有地板都係乾淨既態度簡直係無香港人能及。
第一次嚇親我既係有次六點落酒吧食個快飯——話時話，落酒吧食快飯呢件事真係好英國。嗰時係因為放學之後要去聽小提琴演奏，而演奏廳附近就有間酒吧。
呢度既酒吧一般都會有fish and chips, burger同meat pie。未嚟英國之前我其實無食過meat pie，但係食佐一次就鐘意佐。嗰日我一邊食meat pie，一邊飲啤酒，見到四個西裝骨骨既男人走到bartender到落order，之後行去我對面企係度等，一邊吹水，一邊除低西裝褸連埋公事包就咁放落地！仲要四個都係咁！
酒吧地下其實都唔慌乾淨得去邊架啦，佢哋啲西裝褸睇落都唔係便宜貨色，而西裝褸又唔可以成日洗，我真心唔明點解可以就咁放地下。
不過，我班中學生成日除佐啲大褸同校褸都係隨手掉落地下，冬天巡課室唔小心啲隨時仆死，唔通佢哋由細到大都覺得褸係應該放喺地下。
同埋太陽一出現，啲英國人就會即刻爭取機會去曬太陽。我啲同事就係咁，午飯時間，一見太陽就會衝出去教員室外面既枱開餐，嗰張枱係啲郊野公園野木餐枱，唔會話好乾淨，但係佢哋成日都就咁放晒啲餐具同水果喺枱面。我會淨雞雞用紙巾舖住餐具位唔好搞到自己好似有潔辟咁。
廁所既地板都係乾淨既
啲同事成日入廁所都會放啲袋同褸喺地下。
咁都算，佢哋仲會拎茶入厠所。我甚至見過一盒出緊蒸氣既飯盒（即係啱啱喺教員室叮完盒飯）喺廁所，大佬（應該係大姐，我入唔到男厠唔知男老師會唔會都係咁），廁所有味架。我真係接受唔到。明明literally行多四步來回八步就有張枱可以放住啲嘢先，點解會連呢八步都要慳呢？
䄛袋都係乾淨既
我成日都見過有老師喺教員室攞餅乾直接放入西裝褸袋，又會見到啲老師喺䄛袋直接攞返啲餅乾出黎食。大佬，我當你個䄛袋好乾淨，但係你就咁放啲餅乾入西裝褸袋咪整污糟個西裝褸袋囉？？我又唔信佢哋會成日洗西裝褸……同埋佢哋仲要成日放啲西裝褸喺地下……
我第一次見到同事喺褸袋拎餅出嚟食，我個表情應該係有變化，但係個同事以為我喺想食餅，仲拎多一塊出嚟問我要唔要。
餅乾都叫係乾既食物，最多都係有餅屑，我最震驚既一次喺見到一個老師喺教員室度剝緊橙，佢個對講機叫佢去操場支援（有仔打架），佢竟然將剝佐皮既橙分開幾階然後放佐一階入口將其他就咁放入䄛袋……然後一路行一路食。
水果係唔駛洗既
教員室入面既水果籃通常都有蘋果，有時會有橙、柑、香蕉、提子甚至奇異果。呢幾樣水果，除佐香蕉我都會洗佐先食。但喺呢度大部分人都係唔會洗水果而直接連皮食（除佐香蕉），我有次同個英文老師吹水，佢喺個果籃入面攞起個奇異果直接放入口咬。首先，我真係無見過人食奇異果皮，第二，奇異果皮有毛，連皮食係咪應該要洗下呢。
有次一個老師生日邀請我去佢個生日會（呢邊生日gathering係主角自己搞自己約朋友㗎，我稔係佢哋由細都係屋企搞生日會自己返學校派邀請咭所以大佐都係咁？），去Pub但係自備食物喺Pub外面野餐，佢哋一盒盒喺超級巿買既水果，有提子藍莓士多啤梨等，打開就直接食。
而我會洗水果呢樣嘢其實有時啲英國同事覺得有啲怪。我去實習學校時，圖書館變佐我哋個臨時教員室。學校有啲桃喺水果籃。我拎住個桃，見到其他人入部都就咁放入口食，我最後都係行去無雷公咁遠既飯堂洗桃。
之後有次去參觀Amazon office，因為我哋係訪客，所以去邊都要有職員陪住。午飯時間有桃，我要請個職員陪我去洗個桃，我返到黎，我個實習拍檔問我去佐邊，我話去佐洗桃，佢話：「係喎，我記得你一定會洗水果先食。」
原來會洗水果係一件咁罕見既事，罕見到我個實習拍檔會記住。
一支草全世界分
喺個生日會，有個老師送佐一支草俾主角做生日禮物，主角點佐黎吸之後就隊俾隔離個老師，個老師吸佐一口又隊佐另一個老師，之後個老師遞俾我，我無食過煙，草就更加唔會知係點食，所以我都就咁笑笑口話唔駛。
就算我係食煙，我都接受唔到同咁多人一齊分享一支煙。救命啊。
有次去酒吧又係咁，成班老師喺度vape，我同緊個老師吹水，佢忽然講：「呢個吹波糖味好得，你試唔試下？」
我讀書嗰時無試過俾人叫我試下吸煙／吸毒，估唔到黎佐英國俾人問佐好多次。我個樣係咪似會吸煙呢？
所以，如果你係有潔癖，嚟英國真係要有多少少心理準備，尤其如果你有小朋友，佢哋會好快適應呢度既生活習慣，真係你想堅持乾淨都唔得，唯有默默地接受同為你既小朋友有更好既抵抗力感到欣慰啦。
廣告：https://ko-fi.com/ceoce 大家如果可以，請支持一下。呢度（無論係Medium定嚟緊開始做既「無牌電腦老師」）收入真係太低……
