【老屎忽喊破喉嚨也徒勞】
每年五月尾六月頭，DSE接近尾聲，大學生又考晒試，fresh grad們走出校園，陸續開始搵工。係呢個企業揀卒既旺季，中原地產創辦人施永青身為華資老闆界KOL，趁機發功，一連兩日於旗下免費報紙am730既專欄〈C觀點〉，點醒/教導/指點年輕人應有既工作態度咁話。
上回，施老闆透過投行朋友把口，提醒香港年輕人要保持「大都會競爭力」，跑贏中國專才，恆常加班是不二法門。今次，佢就引用中篇小說〈老人與海〉黎說教（註一）：
它（老人與海）使我明白，人生不能光以收穫多少來衡量，而是更在乎你是否努力過，並且為此而付出過犧牲。若是沒有犧牲，即使獲得多大的收穫，也不會覺得有多大的意義。
〈老人與海〉（Old Man and the Sea），美國二十世紀作家海明威（Ernest Hemingway）作品，並憑此拎到1953年普立茲小說獎及1954年諾貝爾文學獎。
故事講述係古巴，有個曾經風光一時既老漁夫，英雄遲暮，晚年捉唔到魚，窮到連漁網都賣埋。有一日，佢獨自駕駛小艇出海，引到一條超級馬林魚（marlin）上釣。老漁夫憑著無比信心同毅力，不怕割傷、抽筋、飢餓、疲勞、捱夜……同呢條超級大魚激戰三日三夜，終於獲勝。老漁夫將大魚綁係船邊，拖返漁港。點知，死魚既血腥味召來一條又一條鯊魚追擊，老人沿途竭力保護戰利品都無乜用。到佢返回港口果時，條大魚只剩底十八呎長骨架。老人雖然得到勝利，但欲哭無淚。
蘇軾有云：「橫看成嶺側成峰，遠近高低各不同」。一個出色既文學作品，自然有多種解讀。〈老人與海〉呢個故事亦唔例外。有人話，故事歌誦老漁夫不屈不撓既精神；有人話，故事反映任憑人類如何努力，亦不能逆轉天意……唔同讀者根據自身經歷同需要，就有唔同得著。
施老闆於專欄，想籍住海明威既小說，叫年輕人只問過程，唔好計較收獲，要有「釣勝於魚」（註二）心態。
因此，我希望香港的年輕人，也別斤斤計較努力是否必有收穫了，能全程投入，單是生命的過程，也可以有它獨特的意義。
道理本身係無錯既，不過個個都有資格講…
唯獨施永青無資格！！！
大家都知佢間公司係做地產中介生意，絕大部份員工都係地產經紀，靠食佣唯生，鼓吹多勞多得，無單開就自然流失。作為公司管理層，你咪又係睇數（i.e.收獲）做人，難道會可憐一個努力但無數既前線嗎？（註三）
人生在世，的確有好多野值得只問過程不問收獲，例如參加課外活動同興趣班、拍拖溝女、養兒育女、做各樣研究……前提係，你先要enjoy過程。而家講緊返工喎，個個返工，唔通個個想返果份工咩？尤其係產業單一既地方，唔通澳門人都鍾意派牌？香港人都鍾意做sale屎、服務業、同做公務員？係呢度，有幾多打工仔唔係人浮於事，就係為錢。有幾多真心想做果份工？大家都係搵食，就梗係重收獲，畀少個崩都即走啦，right？
人際間，非親非故，所有關系都係雙向既。施老闆呢班老屎忽一次又一次要求年輕人咁好斤斤計較，咁一眾老細又有無下下都同員工計住計住先？遠既唔講，自從九七主權移交之後，市道稍為唔好，公司賺少左，仲未蝕到入肉，甚至只係「預視」經濟將會唔好，香港班大中小企老細已經急不及待走出黎話要裁員、減薪、cut福利，要人共渡時艱。
平時就算市道當旺，你地班老細亦唔見得唔下下計算：小至annual dinner要伙記自費、抽到獎品要當薪酬報稅（咁樣，公司就將獎品當係「出糧」開支，就可以扣稅）（註四）；大至為慳福利而不斷將工種外判、或剷走成team人搬去第三世界國家。
點解，施老闆所代表既老細們，高舉資本主義市場大旗左度右縮果陣，唔諗下自己犧牲少少？唔諗下不問收獲？
香港人，經過近二十年幾次經濟衰退，都睇清晒一眾老屎忽老細既真面目。年輕人已經醒覺，「獅子山精神」又好、「唔怕蝕底，抵得諗」都好，今時今日淪為奴役員工既謊言同籍口。人心早已轉向，施老闆呢類愛國愛黨老屎忽對任何議題只識老調重彈，任其如何喊破喉嚨也徒勞。
另外，趁今日平安夜，我想講一句：
「聖誕快樂呀，施永青！」
#港青 #同一招對聖鬥士（香港人）是沒用的
註：
- 〈年輕人發奮也徒勞嗎？ 〉施永青，am730，2019–5–23
- 〈釣勝於魚〉，陳之蕃
- 〈美聯裁員中原蝕1億〉，蘋果動新聞，2018–10–30
- 〈公司Annual Dinner抽中獎要報稅〉，Yahoo財經，2018–3–26
(2019–12–24)
傳送門：西米Go短評 #001–100，#101–200，#201–300
傳送門：反社會人格既上到位，真係好可怕
傳送門：為香港的老屎忽擔心