睇下邊個激死邊個先 2
隨筆花生 | 點同《極夜之城》個男作者 IF 合作落去呢？
其實唔覺唔覺同 IF 都合作咗一個月喇，當初呢個「合寫小說」大 Project係由佢提起先嘅，而我就憑直覺貪口爽咁答佢一句「好」而成事，令《極夜之城》喺 6月中誕生（下有傳送門，請多多支持！睇下 & Clap多啲！）。
廣告傳送門（每章兩個故事，她+他兩篇為完整一章）：
好喇，眨眼一個月，我其實都想講下（呻下？）同 IF 合作寫《極夜之城》嘅一啲感受，但佢出名 X人X到開晒巷（佢自己講嘅），所以我都好驚踩親佢條大尾巴，因此，我寫呢篇隨筆事先都好尊重佢老人家，問准過佢一聲先敢公然講佢「壞話」。
話唔敢就係扮下嘢啫，雖然都有少少怕唔知佢係咪方丈，但咁問佢都係想博佢本尊大方咁話OK，我策略成功咗！至於佢要我講嘅大話我係唔會講嘅。（笑）
好，入正題！
一個人寫小說唔易，兩個人寫小說更難（就好似一個人單身唔易，兩個人相愛更難咁），難在好多樣嘢都需要溝通、磨合、合作。一個故仔兩份寫嘅難度就似細個返教會玩嗰啲「盲人揹跛子走路」嘅遊戲，一個行到睇唔到，一個睇到行唔到，兩個要成功行到目的地，中間必須要緊密溝通，互相合作。人同人之間嘅不一樣，就正正係合作嘅難題。
首先一定要再講下 IF 嘅全形標點符號強迫症！
強迫症呢家嘢我都有，對錯字、對標點、對格式等等都會，但我係輕度患者，佢係嚴重患者。上回《睇下邊個激死邊個先》 都有提及過 IF 有呢個病（佢都應該康復無望）。初初合作時，我經常清晨一醒就收到呢啲咁嘅 message：
你用嘅括號，間中會 inconsistent，有時全碼有時半碼
省略號你有時會置咗中
你嗰篇仲有啲括號未改好
你副題嘅省略同內文嘅省略 inconsistent
我之後都有同佢解釋過，因為我有時用 MacBook，有時用 PC，有時用電話寫文，而且唔係一次過寫，有時間又有靈感就寫下咁，有時係坐緊黨鐵寫，所以咁樣會令標點符號唔統一（我又唔係特登嘅！），但佢嘅敏感度高過女人 PMS時，最後我見佢咁辛苦，唯有成全佢﹕「不如咁啦，下次你見到你自己執咗去？」XDDDDD 激死佢未？
第二，佢其實都有唔少錯別字！
如果 IF係「全形標點符號強迫症」嚴重患者，咁我係屬於「改正錯別字強迫症」中度患者。由於故仔係合寫，男女主角講出口嘅對白有機會兩邊都出現，但各自嘅心聲只會在他／她各自嘅文章裡表述，所以我哋除咗寫自己篇文外，亦會不斷係咁 loop住咁睇對方啲文。唓！捉我括號、省略號，你夠成日打錯字啦！（默書錯字一定扣分，錯標點未必扣分，除非唔係）
所以，咁啱尋日睇返 IF 呢篇舊文，呢句話真係精警到要 Quote一Quote﹕
我（IF）另一樣最麻撚煩嘅就係嗰種完美主義性格（又唔係真係咁完美喎）
當睇到呢度，我唔係唔 Highlight呀嘛？有仇報仇啦！括號嗰句先係重中之重、精髓中的精髓！
不過，即係咁，我都明嘅，寫文嘅嘢，靈感到時行文如流水，一時間手文之誤係等閒事，特別係如果已寫到半夜三更，眼睜都睜唔大時，「香薰按摩」同「香蕉按摩」寫出嚟同望落去都差唔多，所以我唔會怪佢（我人真好），只會見到肯肯定係錯字嘅就默默地執咗去，至於嗰啲屬於大家用字習慣不同嘅地方就 one eye open one eye close囉！
我係有發覺到我哋有堆字係用唔同嘅寫法，呢啲我就唔會改喇﹕
- 我 / 老套；佢 / 老土
- 我 / 衣着；佢 / 衣著
- 我 / 咩啫；佢 / 咩唧
- 我 / 身分；佢 / 身份
- 我 / X；佢 / 屌
不過呢，我哋兩個合作有一個默契同共識，就係除咗佢執我標點、我改佢錯字之外，我哋係唔會改對方嘅內文，一粒字都唔會。我哋會喺對方嘅文章中改返自己角色嘅對白語氣，譬如我去《他》度改返 Heather啲留言對白咁。至於故事情節以及中間嘅細節描述，我哋都唔會立亂去改對方寫嘅嘢，覺得有唔順或有唔同諗法就會拎出嚟討論下，或者喺文中留言備註返（因為我哋之間有時差）。合作嘅一大基石就係「互相尊重」，其次就係「互補長短」。
（呢篇字數唔係好夠秤，見字就請加返多啲字）
（呢度試下加多啲描述佢性格，令個性更立體）
（我覺得呢度未係好通順，好似唔夠說服力，要再諗諗先）
時差問題，一定要朝から晩まで
放《極夜之城》嘅 Publication個名用咗日文「朝から晩まで」嚟命名，意即「由早到晚」，IF 稱之為「朝見口晚見面」。
我同 IF都係有學外語嘅人，根據「有型嘅嘢用外語講會特別有型」嘅原則，就用咗日文「朝から晩まで」做 Publication個名。《極夜之城》嘅男女主角 Bertrand & Heather 身處奧地利同香港，由於分隔異地有時差嘅關係，佢哋兩個只能喺時間嘅罅隙中聯絡，由朝到晚、無分日夜咁上線下線連繫。而兩位作者其實都一樣，我同 IF都唔易夾時間傾嘢，好多時係我喺香港一大清早 6點起身後、返工前，或者係放咗工、去完玩、再返屋企又未瞓前咁攝時間傾，所以除咗一齊在線 chat住傾之外，大家都會喺對方不在線時，喺啲文度留言remarks一下各自睇法，都係由早到晚、無分日夜咁傾。
如果標點符號係一種磨合，咁適應時差同夾時間就係一種配合。合作就係要「互相遷就」。
暫時未爆煲，唔擔保一定唔爆
一個從來無寫過小說嘅人（我）對住一個已經寫過幾個都幾多人捧場嘅小說嘅佢，一開頭我可以做嘅係「跟做」。「跟做」有兩個意思，一個係佢講，我跟住做；另一個係等佢寫完，我睇返再模仿下佢點做。
《他／她的 Prelude》就係咁。當佢構思咗兼極速寫起咗以朗伊爾呢個地方作為《極夜之城》嘅序幕後，再加上一個 Bertrand喪妻葬禮嘅場景，就叫我都寫一個 Heather 喺公司俾人鬧到送殯咁嘅面口嘅場景。
於是，我睇咗《他的 Prelude》之後，就模仿住個格式去寫 Heather心目中嘅朗伊爾，而與其寫俾上司插爆哭喪咁嘅樣，我覺得倒不如整一幕辦公室喪禮，配合下香港喺疫情期間，好多人都面對被公司裁員而失業嘅苦況（某程度上，我哋都想將而家社會發生緊嘅事，特別係香港嘅事，用另一種形式留下痕跡），同時可以同 Bertrand喪妻嘅葬禮嚟一個對照。
本故事純屬虛構？
上文都有講，除咗愛情故事，我哋都想將一啲真實喺社會上發生緊嘅事記低，武漢肺炎、TG放題、執笠裁員等等⋯⋯我特別想記下一啲關於香港呢個城巿嘅點滴。至於故事劇情，有別於 IF以往啲個人小說咁全部都係真人真事，《極夜之城》確係一個虛構故事，不過咁，我想引用 Wyman黃偉文喺《CONCERT YY 黃偉文作品展》上嘅一席話﹕
／／我同林夕討論過一個問題，就係究竟我哋寫（歌詞）入面啲橋段、內容、情節係咪全部都係真㗎呢？我同佢答案都係一樣，好多時我哋寫咗啲真實嘅嘢出嚟，然之後我哋發生太真實、太赤裸、有啲得人驚，於是我哋就會改返嗰啲情節，例如冰島改咗孟加拉、洗衣鋪改咗涼茶鋪⋯⋯當有一啲我哋只係想同知音人、識貨者分享嘅話，我哋會用我一啲神秘、奇怪寫法。／／
我自己都係咁，故事係虛構，但有啲人物、有啲情節都係生活中一啲真實經歷嘅糅合或變奏，有時改動多，有時改動少，一個個神秘嘅密碼，一段段故事如幻似真、耐人尋味，但呢啲都係我對愛情或對人生的一點點體會。
（至於 IF嗰邊係點？要問佢先知）
（有啲意外）IF 有度好，好有主見但未算專制，佢只俾我方向式指引，唔會俾晒細節規限我（well，否則佢一條友寫晒都得啦），我可以有個方向性去寫，但內容細節係點我可以隨意發揮。所以，我哋一開頭就係咁樣手把手見一步行一步，佢揸住個電筒照住前面話我知要點行，我就自己一步步向住嗰個方向抆住佢衫尾行。
上回《睇下邊個激死邊個先》我有提及過大家合作以嚟蘇花蘇骨（So far so good），啱一半，因為當寫到兩個主角有 cross path時，難度就會升級，要一齊諗兩個主角之間嘅互動，一齊去度一啲對白，同時又要分開諗返男女主角各自嘅心思迴轉，跟住就會開始有啲男女大不同嘅諗法，要一齊深入討論嘅故事劇情幾何式增長，再不能只俾方向傾少少就各自自由發揮。
係難㗎！所以大家支持下睇下啦！睇完 Clap多啲！我最大嘅壓力係《極夜之城》唔受歡迎係因為《她》嗰邊嘅故事寫得唔好，咁我就對 IF唔住咁喇！（Please CLAP and save Bessie's life！）
我究竟有無俾佢 X 到開巷？
呢個都係由我答「好」答應一齊合作後，一直放喺心嘅疑團，會唔會呢？幾時爆呢？以下 Cap圖可能令大家失望（但又有點驚喜？），唔講粗口 X人都算（打字都無），仲要講埋啲「方便的話」、「可唔可以」、「唔該晒」（係咪想我折福？）⋯⋯ 好啦！佢想我講「好好人」呢個 fact就唯有Cap圖俾大家睇下個真相，都真係算係咁啦！
（傳說中嘅 「X 人 X 到開巷」係咪佢自己吹出嚟嚇人㗎咋？我真係仲未有機會聽到佢講粗口喎，連單字嗰啲都無呀！好很失望！）
我哋而家仲係邊寫邊度緊個故仔，我估我哋而家寫咗有一半？真係唔知，但我哋已約法三章，無論點（即係之後就算真係有機會有爭拗激死對方都好），都一定要完成為止！
上回提要傳送門﹕
《極夜之城》係我第一次寫嘅小說，亦係IF同我第一次合寫嘅小說，如果你喜歡，請拍拍手Clap多幾下話我知，1-50下任Clap唔使錢㗎！雖然喺 Medium「拍拍手」唔會令作者增加收入，但一定會令寫文嘅人好開心同更有動力寫落去！請大大力拍多幾下！多謝你睇到最後呢句，如果你睇到最尾，除咗「拍拍手」話我知你睇完都鍾意之外，都歡迎俾我哋知道你哋嘅意見，或者男女主角嘅下一步，甚至結局會因此而不同。