白痴電腦說明書

識得用電腦嘅人，其實係吸收咗好多用機器嘅原則。當你遇到「電腦白痴」，好多時佢哋就係完全唔明白呢啲原則。對於未掌握到原則嘅人而言，無論同一個步驟問幾多次人，照做幾多次，一樣係唔會學得識。呢啲嘢基本到點樣？最基本嘅答案會係……

花哩花碌，都唔知望邊度好！

唔單只係唔知望邊，係唔知可以撳咩掣，可以做啲咩。

好，為咗解決呢個問題，我哋試下教大家學識下面嘅規矩同原理：

① 邊啲嘢撳得？

第一樣嘢係「掣」（大家可以印啲圖出嚟俾大家圈起啲掣佢）

畫面上面會有一啲「凸出嚟嘅嘢」，呢啲係掣（button）嚟嘅，撳落去會有反應。

第二樣係「拎（link，連結）」，即係一啲有底線，顏色唔同嘅字。撳咗會跳去第二度嘅。

第三樣係凹落去嘅橫行，通常可以打字嘅。

② 畫面上應該望咩位？

主要係三類 （一）角（二）邊（三）正中間

角位，會有啲緊要嘅掣，例如有啲系統有個「X」掣代表關閉，有個「三」字噉嘅掣代表有 menu 。

邊位，都係選單嘅位置。電話、平板裝置，啲邊位可以「向中間捽」。

中間，係內容，重要嘅內容。係你應該睇嘅嘢。

③ 記住網址、登入同密碼嘅分別

網上面有好多服務，唔收錢嘅。可以免費申請。例如電郵，Facebook 等等。記住 ＊除非有專用 App，否則用呢啲服務就要去指定嘅地方＊。

好似去 Gmail 睇電郵，就要去 Gmail 呢個地方， gmail.com 。

到咗之後有時會有兩個 凹落去 嘅地方可以打嘢。通常一個係「登入」，一個係「密碼」。登入@（香港叫 at，老at at 個 at，廣東有啲人叫「小老鼠」）gmail.com 就係你嘅電郵地址。地址可以俾人，門鎖密碼唔俾得人。

（請反覆練習登入，抄寫電郵，直至準確無誤）

④ 好多老友用 WhatsApp 喎，點樣用好？

老友記冇乜邊個會學唔識。我可以教你嘅只得一點，你見唔見到撳實可以錄音？呢個掣撳得多會爆炸嘅。千祈千祈唔好錄音，好危險，會爆數據。聽講從前有個人呢，佢有日用咗錄音功能，第二日佢死咗呀。所以記住有乜嘢事，幾忙都好，一定要打字。另外我知道你會見到一個分享掣，提提你分享圖片影片，好嘥數據㗎，千祈唔好，幾得意嘅嘢都唔好分享，逐幅圖計錢㗎。蝕錢就唔好啦。

⑤ 有嘢唔知可以點做？

開瀏覽器（Windows：藍色好大個E字 ／ Android：地球儀），開 Google ，輸入你想睇嘅嘢，撳搜尋掣。跟住你會見到好多結果，如果網址係 01尾嘅，好有可能係流嘢，唔好信。

⑥ 唔識路可以點做？

如果你係集科技盲同路痴於一身，強烈建議你唔好出街。地球好危險，留喺屋企安全啲。