畢絲扮工日記之老鼠記事：阿愁的惡夢
呢篇係關於IT9、亦都係關於前線員工每兩星期嘅鬥爭故事。
講起返工，我諗應該冇乜人想、冇乜人鐘意；對於夢幻國度嘅竹篙灣員工而言，呢一點都係永恆不變嘅。呢個最大嘅惡夢之一會縈繞每個人嘅心，包括我呢隻Part-time爆谷小薯仔。所以呢，平時無咩事你唔好提我返工，我會殺咗你。
err講返正題，竹篙灣公園係需要全年運作嘅，因此我地係需要輪更嘅；而人手編配乃係一件極為複雜嘅事，尤其竹篙灣有接近一萬名演藝人員[1]要返工，所以呢間公司需要人嘅協助，先至可以合理咁安排人手返工。於是乎，佢地就有一條團隊，叫做「人手編配組 Scheduling Team」：佢地係隸屬 人力管理 Workforce Management 嘅一條團隊，簡單講就係負責編更。
你可能會話，咁其實好多大公司都會專登開個編更部門㗎啦，咁到底竹篙灣有咩咁特別？我地話俾你聽：無。
好多年前，我地同上篇文講嗰間搞到撞車嘅痴撚線公司一樣，係用紙去解決人手編配問題：嗰個年代，除咗做死負責編更嘅Scheduling Lead之外，一出更個個都要調更，經理仲要簽名簽到手軟。而由於編更既要顧及每個同事嘅每星期工時下限及上限，又要顧及每星期嘅例假、勞工假、額外工時開支、法定補償等等，實在係一幅極困難嘅拼圖，絕對唔係容易嘅事。一個編得唔好嘅更表，會導致公司成本上升之外，亦都有可能導致員工無足夠嘅休息時間、或者無足夠嘅人手去應付營運需要，甚至導致多咗員工call sick。咁於是乎，科技嘅發展引領我地邁向一個新嘅紀元，除咗唔駛下世做樹之外，最重要係節省唔少時間同心力，等營運團隊可以回歸日常營運，唔駛簽名簽到手軟。
咁有啲咩科技可以解決呢個問題呢？市面上其實有好多現成嘅方案嘅，不過如果同時要配合打卡、人事記錄、Payroll及Audit等等要求，仲要同現有嘅系統整合，就唔係好多選擇。竹篙灣同好多大企業好似因航咁都用SAP嘅方案去處理企業資源管理嘅事宜，咁要搵個可以配合SAP嘅方案喎，當然可以幫襯SAP自己啦。咁以前都係嘅，同事可以利用一個叫做Cast Progress Optimisation (CPO) 嘅嘢嚟cred年假；但係CPO係base on SAP嘅元件嚟，設計上唔可以好好咁配合前線編更安排，所以就必需要考慮一套整合式嘅解決方案喇。
其實調更又真係唔駛下下要批准嘅，所以如果符合規則的話，點解唔可以自己上個網搞掂呢？睇更表又唔駛吓吓要去揭本厚過字典嘅Master Schedule嘅，點解唔可以自己上個網就睇到呢？編更呢樣嘢又唔使下下要咁多人手由零開始嘅，點解唔搵電腦程式幫下手呢？於是乎，同隔離黃竹坑一樣，竹篙灣用咗Kronos呢一個聽落睇落無事、用落好有事嘅系統。佢可以俾同事選擇傾向放假嘅日子，然後程式會自己計算，從而計算出一個最初步嘅更表；人手編配組嘅同事就需要「執更」，令到最終嘅更表符合所有公司政策、法定要求以及工作地點嘅人手需要，以最慳錢、最配合大家預先選擇嘅休息日、又最能夠滿足人力資源管理需要嘅方式排好晒啲更；咁落到location只需要負責嘅Scheduling Lead執少少就可以出街喇。
咁對於全職同事嚟講，就可以喺電話選擇Prefer邊日放假（Cred假）、邊日攞大假，仲有調更；而兼職同事就可以喺電話選擇可排班日子（Cred更）、調更同埋放更。需要批核嘅情況，亦都唔駛再簽名，只需要經理撳掣Approve；出糧亦都直接連接Punch in/out記錄，方便快捷。
但眾所周知嘅係 #HKNoIT，理想與現實當然會有啲差距嫁啦。首先喺竹篙灣嘅setup嚟講，Kronos運作極依賴SAP，而SAP因為超級無敵極之貴，基本上只有啲超級大企業例如因航同華氏影業咁先負擔得起。雖然華氏影業嘅SAP Server喺大美西雅圖，但唔代表香港啲IT9唔駛做嘅……呢個就係問題喇。加埋Kronos需要係咁call個database，七千個員工同一時間上去個網呀，個SAP Record唔啱呀乜乜乜，結果就係災難嘅開始。
所以，而家搞到我地啲同事每隔個星期五就喊咁口，因為個Server load十世都未load完，真係陰功；你話，如果佢外判咗去印度，或者回歸以前寫紙仔嘅年代，或者可能都無咁嬲。科技雖然係可以幫到我地手，但係同時會衍生出好多問題，呢個可以話係IT9永遠唔會完嘅課題。
好喇，講返調更同埋放更先。其實有咗Kronos之後呢，成個過程已經簡化咗好多㗎喇，以下會簡單講下：
- 兼職可排班日子、全職例假日之編定 喺更表發佈日之前約兩個週期 [2] 或之前，同事可以透過系統選擇自己咩日子返到工（Cred更，適用於兼職同事）／想咩日子放假（Cred假，適用於全職同事）。雖然有時因應人手安排，唔係有求必應，例如可以Cred咗更但最後都係無更，或者Cred咗星期一放假佢俾咗星期三你咁樣，但起碼有得揀先。由於係五天工作周，所以一星期可以最多Cred兩日假（或者唔Cred等佢揀俾你）[3]；而兼職方面就按聘用條件及部門領袖要求，一般最少每星期要Cred三日更 [4]。
- 更表發佈，調更、放更及食更 大約早兩個星期，就會發佈更表；大家就會打開 Kronos 睇自己到底要返咩更。呢個時候，大家就會開始瘋狂調更㗎喇。調更嘅規矩好簡單，除咗兼職同全職之間係唔可以調更、同埋調完更之後返工嘅時數要符合合約要求，唔可以爆鐘、short鐘或者引致額外休息日，其實都冇乜特別。唯一特別之處就係所以「牌」嘅問題：例如F&B，如果你未有Cashier牌係唔可以調返個機手（收銀機操作員）更返嚟。呢個問題係Park Ops就更加麻煩，因為每個Attraction都要有嗰個Attraction嘅牌先可以操作嘅 [5]，即係我唔識揸火車唔可以叫個揸木筏嘅去頂咁嘅概念。不過兼職就有多一個玩法，就係放更同食更：食更就係頂人地更，而放更就係搵人頂更。 最後，所有調、放、食都要係返工日子前三日嘅早上八點鐘前完成；另外，基於地主制原則，個別部門地點可能會有自己特別嘅要求或者規定。如果調更唔符合以上嘅所有規定，就要你嘅部門領袖批准：其實一樣係Kronos度撳，不過係揀返「With Exception」，之後再同你部門領袖講聲，佢再喺Kronos度撳Approve咁樣。
- 全職年假申請 全職係有年假呢樣嘢嘅，但係每日都有一個放取年假限額，有人放咗你就冇㗎喇。所以呢，Cred年假係要鬥快嘅，亦可以喺Kronos度處理。Kronos上亦可以睇到你有幾多年假餘額；而且部門有個年假數目指標，成個部門所有人嘅年假餘額越少就越好咁樣，所以佢地有時會溫馨提示你未放年假快啲放，要做靚條數呀。
- Ad-hoc 休息日、調更等安排 有時未必下下都可以用Kronos處理嘅事，例如你俾人抽中做陪審員、年假Quota已爆但仍然想請當日年假、甚至係臨時要請無薪假，或者無薪假轉有薪假呢啲呢，就可以直接向部門領袖申請，又叫「Ad-hoc」。不過之後都係入返落Kronos度咁解。
有人無工返，有工無人返。所以我地有個叫做「Extra Shift 額外工時計劃」嘅嘢，俾同事報名去其他部門或者崗位返工，去解決呢個「有人無工返，有工無人返」嘅問題。對全職嚟講，一星期返得嗰五日太得閒想返吓工，甚至被逼清年假又想返吓工咁，都會報呢個計劃。而由於有啲部門可能人手都足夠，所以部分兼職同事可能會出現無工返嘅情況，Extra Shift就可以幫佢地返多啲工喇。
咁Extra Shift計劃通常會開放一啲出現嚴重人手短缺嘅地方嘅工作，例如餐飲部、樂園服務部（清潔服務）、商品部等等；另外酒店嗰邊亦都會有唔少位，包括管家部、行李服務、迪欣湖等。除此之外，由於部分時節會繁忙一啲，可能會有人手額外需求，例如演唱會、節日活動等等，呢啲都會安排Extra Shift參與。
不過留意，短期兼職員工續唔續約係睇你返得夠唔夠工，而報Extra Shift係唔計算在內。據說由於Extra Shift計劃部分manpower cost會入返同事本身嘅部門數，最終導致請嗰個人嘅cost高咗，而續約嗰陣報得多Extra Shift嘅兼職同事就有比較大機會唔續約……呢個傳說我就唔能夠肯定喇，只係知道因為年資、工作時數會累計，而且新請返嚟嘅頭60日唔駛供MPF，所以公司就浪費咗唔少資源去train新人然後過幾個月又唔續約再請過人train過人然後無限loop。搞咁多嘢都係想慳嗰少少錢，咁在商言商都無錯嘅哈哈。
[1] 截至2019年6月，以Rostr上的數字計算，此數字包括度假區相關的行政人員、全職及兼職的演藝人員及幻想工程師、營運參與商員工，及個別有SAP人事檔案的承辦商員工，工作地點除竹篙灣外，亦包括機場商品店、兩個奇妙直通客務中心、及其他華特迪士尼的辦事處。若只計算直接由 HKITP/HKDML/DEPCP/WDI-Asia 聘用的演藝人員及幻想工程師，則截至2019年2月有超過七千五百人。
[2] 大部分部門嚟講都係兩星期為一週期，有啲就係四星期為一週期。
[3] 部分繁忙日子可能會要求全職員工六日工作。
[4] 如果每星期未能提交三日嘅可排班日子，編更嘅順序會被排低。
[5] 有牌嘅意思係經過OJT並且係KAPA (Knowledge Assessment & Practice Assessment) 合格。其後需要持續有返該遊樂設施（所謂持續係指距離上次返嗰個遊樂設施不多於一個月），而每年亦要重新 PA 續牌。而每個遊樂設施都要獨立計算，即使大家都係Round Ride操作相似都要再Train過。
