畢絲扮工日記之老鼠紀事： 絕地武士與黑暗勢力的對抗
既然每一日都係奇妙嘅一天，喺竹篙灣嘅日子就自然會有好多奇妙嘅事情發生、有好多好奇妙嘅SaiSai & Friends等住我地去對抗。以下落嚟，同大家介紹下到底呢個咁奇妙嘅地方嘅同事，到底係點樣對抗黑暗勢力。
呢個故事係我同事話返俾我知：話說我地呢度嘅正門有三個Ticket booth（正門南面兩個、北面一個）；每個Booth都有兩邊，每邊有四個櫃位，全面開晒總共有24個櫃位。咁當然如果唔係好多人嘅日子（例如農曆新年咁），都唔會特別話開晒咁多邊嘅。通常嚟講，朝早就會特別多櫃位開去應付入場嘅人流，而去到中午、下午就會陸續關閉部分嘅櫃位，一來要放同事去食飯、二來人流減少仲開咁多個櫃位都無乜意思。不過，西西唔係咁諗。
有一日，話說朝早因為有慈善跑活動喺外面舉行，加上係星期日，於是預計都會有比較多人入場，所以嗰朝早開咗北面同南面各一個Booth，南面嗰個淨係開咗其中一面，即係都叫做開咗一半售票櫃位㗎喇。
大家如果要買飛當然會乖乖排隊，我地亦都會用繩分隔開售票處同埋出面嘅位置，費事大家以為唔駛排隊可以就咁行入嚟。另一方面由於售票處除咗普通日票之外，仲會處理埋啲MA續會或者係換票等手續，當中MA會籍因為唔可以轉讓，除咗要入資料外，仲要影相同埋即時印過張有相嘅會員卡俾賓客，所以要嘅時間亦都比較耐；公司又做緊多人同行最多八折優惠，搞到啲人個個一團團人咁過嚟，處理時間自然會比較耐。
過咗大半日，人流開始減少，南面售票處就開始截龍準備收檔，留返北面售票處繼續開，咁同事亦都拆開用嚟分隔售票處同埋出面嘅繩準備收嘢。雖然截咗龍，但係仲有幾group人喺度排隊。呢個時候，一堆客以為唔駛排隊走晒過嚟，我地都唯有叫佢地去返北面嗰個，又或者如果只係買飛，用電話上網買飛都得，唔駛排隊即時入場添。咁絕大部分客都好聽話嘅。
說時慢那時快，剩低最後一group客喺櫃位處理緊，其餘三個櫃位都已經閂晒。呢個時候，有一對賓客走咗埋嚟，同事就同佢講話呢邊已經收咗，要過返對面……呢兩位賓客聽到同事話呢邊收咗，即刻黑面：「即係咩意思呀？」
同事：「即係已經收咗」 賓客 A：「唔明喎，即係點呀？」 同事：「即係話呢邊會關閉，麻煩去返對面售票處……」 賓客 A：「吓？點解呀？有無搞錯呀？嗰邊條龍咁長，我都係一張半張飛啫，你咪俾我搞埋佢囉。」 同事：「真係唔好意思，但係即使其他客人嚟到話一張半張，我地都係叫返佢地去返對面，因為呢邊真係收咗。」 賓客 A：「（指住仲做緊嘅櫃位）都未收！」 同事：「佢地只係喺我地截龍之前已經入咗嚟排隊，所以佢地係最後㗎喇！」 賓客 B：「你地真係做得好差囉！喺出面有跑步你又冇通知，我揸車入嚟都係續個證啫，咁你都要為難我地！仲要喺出面泊車都已經等咗成個幾鐘，我真係覺得你地好離譜囉[1]……你叫你地啲管理人員過嚟，我要同佢講返你地啲人做得真係好差好惡劣，點解我地買一張半張都諸多為難，我覺得你地真係好過份，我要投訴！」 同事：「如果想投訴的話，前面轉左賓客服務櫃檯，不過都一樣要排隊[2]。」
年中會發癲嘅客人都唔少，聞說好多人好鍾意Block-out dates[3]都要衝入嚟，大佬你張銀卡嚟架咋，不過只要發爛渣，個別嘅銀卡MA會成功爭取喺啲星期六日入場；只能說，咁都俾佢地入，真係癲咗少少。不過，呢啲客鐘意發癲投訴係佢地嘅事，大概大家都知道如果呢啲無理投訴都胡亂受理的話個Park真係執得啦，所以對付呢啲痴線SaiSai，我地無理由咁容易跪低嘅。就好似上述例子咁，佢要投訴咪投訴囉，不過投訴都要排隊，自便唔該。
門口已經要對抗黑暗勢力，入到去仲得了？冇錯，真係好得人驚。話說每年樂園都會派下聖誕卡咁，會幫你俾埋郵費同你用平郵寄去世界各地，任何地方只要香港郵政肯寄都會寄到（前提當然係地址正確啦）[4]。咁但係你地班MA連貼紙都可以賣，你估聖誕卡仲唔同你大賣特賣咩，仲要$10張聖誕卡，真係痴線到一個極點（最慘係啲人又真係幫襯呢下先得人驚）。咁於是乎上年就決定，索性每人每日兩張唔好煩喇。同事呢就話返我知，竟然有人痴線到同佢講，話佢係幼稚園老師，想派晒俾全校同學，「麻煩200張聖誕卡吖唔該，有無唔同款㗎？」
如果真係用爆谷小薯們嘅處事習慣，你問我拎幾支飲筒，我最多俾兩張你；叫我俾多啲爆谷你，我就索性俾少啲你添呀！但係同事佢係Guest Flow[5]人，係習慣貼紙一疊疊派嘅人，咁當然唔會咁樣做啦。可惜係唔知點解個個都要廿幾三十張，十張八張都算少喇，咁如果可行嘅當然都會盡量滿足嘅。
但係過百張喎？咁梗係唔得啦下話，同事答佢「咁佢地要入嚟先有得拎㗎喇」，點知佢就發爛渣，仲投訴到最後連管理層都知道啲聖誕卡「反應熱烈」添呀。當然其他正常啲嘅MA就話返俾我地同事知，其實嗰位MA唔係真係派俾同學咁有愛心，純粹只係因為佢用緊$20蚊張嘅價錢代寫代郵寄，佢反應熱烈先至要過嚟問我地拎咁多啫。咁當然，今年據說已經取消咗每人兩張嘅限制，但無咗quota之後大家反而無拎得咁癲，或者可能因為大家見到無限任拎就覺得唔馨香？可能啦。至於今年仲有冇人$20蚊代寫代寄呢，我唔知喇；不過我話你知，如果你真係需要呢項服務的話，除咗親臨市鎮會堂之外，仲可以搵我，我唔收你錢做爛個市，等嗰班咁無恥嘅MA無得炒[6]~
不過啲MA仲有好多更加痴線嘅嘢，例如buyout[7]嘅日子：話說如果有buyout的話有時會為buyout guest開得夜啲，咁但係只有buyout guest先至可以繼續留喺度；至於日間時分，亦都有可能提早封閉部分園區嚟預留俾buyout guest嘅。為咗識別邊啲係day guest邊啲係buyout guest，我地就會要求buyout guest要佩戴credential，Guest Flow同事就會喺唔同嘅地方進行 credential check。於是乎，有啲MA就會用特別方法去獲得呢啲credential。如果話佢地只係問啲早走嘅buyout guest拎credential都還好，不過佢地仲有大量招數：
- 買唔到就執雞、執唔到雞就偷嘢、偷唔到嘢就去搶 如果只係其他人跌咗又冇人理於是就去執都好啲，有啲MA根本都唔係執嫁啦，而係同啲buyout guest買。咁買都好啲啦，最過份係就去偷嘅、甚至試過有MA去搶（或者其實算係扒手啦）。真係令人不禁覺得點解明明你一年有至少220日係可以入場嘅，係咪咁都要計較嗰半晚時間呢？你係咪真係愛我地愛到咁呀？
- 執雞都執唔到，咪搏大霧囉 佢地會同你講話佢唔見咗Credential，連特別門票都出示唔到，黐住啲buyout guest混入去；不過咁搏大霧都多數唔得㗎喇，因為入到去啲餐廳商店同埋Attraction同事都會睇你有冇Credential，無嘅話就會 [del]落閘放狗[/del] 叫你走㗎喇。所以仲有一招，就係有五個人但淨係執咗三、四張Credential，其他人話自己唔見咗，搏大霧睇下過唔過到骨；如果爭一個半個，有時都真係有可能由得佢嘅，因為真係buyout guest都會有啲咁嘅情況[8]，於是乎根本捉唔到。
- 搏唔到大霧，就梗係發爛啦 佢地實會有千百萬種理由喺度發癲，死都唔肯走堅持要入去，絕對會令你明白：又係一個想R NSA[9] 嘅 MaMa 喇。當然，NSA俾咗都無所謂，但係如果你係都要入去買嘢／玩的話，真係唔好意思，我地只能叫保安嚟處理喇。
又例如需要提早霸位／登記嘅表演（獅子王慶典、迪士尼魔法書房以及絕地聖殿武士特訓），白金卡會員可以優先入場／網上預約預留座位或名額[10]，不過你放心，絕對會有人賣呢啲優先入場／座位／名額嘅。當然仲有見到無晒就問點解係MA都無得優先（但係明明你自己遲到，或者明明你只係金卡甚至只係銀卡）。大佬呀，你買MA嘅時候唔知自己有啲咩有有啲咩冇嘅話，就擘大你對屎眼望清楚敝公司嘅網站，唔好喺度發癲啦好無？
「絕地聖殿武士特訓」係俾一班小武士參與其中，透過學習光劍招式嚟對抗各種黑暗勢力。不過，咁鍾意發癲嘅MA未必明白，最大嘅黑暗勢力，唔係銀河帝國，而係無盡嘅貪婪、不斷膨脹嘅佔有慾同心魔。如果佢地真係鍾意竹篙灣呢個地方的話，就算你唔會好似絕地武士咁組織反抗軍對抗黑暗勢力，至少你唔好搞到呢度烏煙瘴氣先得㗎。
願原力與你同在。
[1] 當日朝早因為停車場用作慈善跑會場而封閉，不過其實網站有寫、運輸署都有通告提示駕駛者。所以如果仲係要揸車入嚟的話，就唔關我地事喇。btw，其實停車場好早已經重開咗，所以係咪真係因為RT (樂園交通部 Resort Transportation) 同事安排得唔好，定係有人自己遲咗又唔想排隊呢……唔知啦吓。
[2] 正門嘅賓客服務櫃檯除咗處理一般賓客服務之外，亦都需要處理個別旅行社／其他華特迪士尼樂園員工嘅換票或入場等嘅事項，以及其他票務嘅問題等等，加上部分盲毛會係唔係都排隊問問題甚至喺嗰度排隊買飛（而亦都真係會賣俾佢 — — 無理由佢排咗咁耐又趕佢走㗎嘛），所以都係要排隊㗎喇。
[3] Block-out dates 不適用日子：銀卡、金卡會員喺部分日子係唔可以入場嘅，金卡就主要節日繁忙日子唔入得（例如聖誕、農曆新年、復活節期間及前後等等）、銀卡除咗上述日子之外，所有星期六日及公眾假期都係唔入得嘅。有關詳情請至敝公司網頁查閱。
[4] 只有樂園派發嘅指定款式聖誕卡，並放入樂園內指定郵筒，先會幫你寄埋嘅。正所謂「地址正確，不負所託」，記得寫返正確地址呀。（聽聞有好多guest好鍾意寫寄去「中國香港」「台灣省」「中國大陸」，呢啲全部都唔啱㗎，寫 香港 HONG KONG、台灣 TAIWAN、中國 CHINA 就得㗎喇，唔係因為搞港獨台獨，而係因為寫「中國香港」會寄錯咗去中國深圳上海北京先、寫「台灣省」會以為你想寄去香港嘅台灣省而因為香港無台灣省而會變死信、寫「中國大陸」就會因為無呢個國家而彈回頭。雖然真係寫錯咗最後都會寄到，但郵件處理時間一定會增加，所以唔好傻豬豬喇～）
[5] Guest Flow Team 人流管理組：隸屬 Park Operations 樂園營運部嘅部門，主要負責樂園營運上嘅人流管制。
[6] 我係認真嘅：Private Comment 搵我，話我知你想寄去邊個地址同埋想幫你寫啲咩，我幫你寄。
[7] Buyout 包場。
[8] 好多時buyout嘅時候，有時賓客太興奮、太大意之類，會唔見咗或者整爛咗個Credential，咁如果佢地可以出示返特別門票或者係其他相應嘅證明文件，都可以補返個Credential俾佢。另外亦都明白賓客所屬嘅機構可能只會俾幾張特別門券俾人，但佢地一家大細都嚟齊晒，差幾個小朋友或者老人家就要買返一日門票入場。咁理論上買Day Ticket嘅人都係Day Guest，但實際上一group人閘得一個半個又真係好不近人情嘅，咁所以睇返情況如果唔太過份可能都會由得佢嘅，負責Credential Check嘅同事最多就提吓佢入面同事有可能會執正嚟做唔俾入咁樣，而Attraction同事就可能都會由得佢咁樣。而個別MA就會利用呢個漏洞去搏大霧，扮一齊又好、扮buyout guest都好，呢啲咁嘅情況多數都吹佢唔脹，除非捉到有人轉讓Credential，理論上可以直接DQ（實際上都費事煩唔會咁做）。
[9] No String Attached，屬於「轉愁為樂」（唔magic嘅話就叫做「服務補救」）嘅其中一種，簡單啲講就係俾個客去憑券換領啲小心意，等個客唔好嬲，「無牽無掛」咁開心玩，所以就叫 No String Attached 喇。
[10] 獅子王慶典可以優先入場、迪士尼魔法書房可以網上預約留座、絕地聖殿武士特訓就可以網上預留小武士參與特訓嘅名額。每名白金卡會員最多帶三個賓客。有關詳情請至敝公司網頁查閱。
[i] 關於題外話：聽 Tomorrowland 嘅同事講，馳車天地係地獄嚟，就算唔開都恨不得即刻拆咗佢（係呀，未拆㗎，但唔開啫）；但係佢係一個極之受歡迎嘅遊樂設施嚟，雖然唔好玩但 Wait Time 長期冠軍嚟。下次有機會再介紹下反斗車王消失之謎啦。