畢絲扮工日記之老鼠紀事：反斗車王消失之謎
既然每一日都係奇妙嘅一天，喺竹篙灣嘅日子就自然會有好多奇妙嘅事情發生、有好多好奇妙嘅細節，被人遺忘、拋棄。以下落嚟，同大家介紹下到底呢個咁奇妙嘅地方，到底有啲咩要面臨被冷落、神秘消失嘅命運。
話說如果大家睇過反斗奇兵，都應該知道玩具最怕就係被遺忘、拋棄。佢地最怕就係安仔唔要佢地；而且最開心嘅，就係遇到識得愛惜佢地嘅安仔。其實，遊樂設施同玩具一樣，都好需要大家嘅愛 — — 但係望返東京舞濱公園，拆嘢換過啲更加受歡迎嘅遊樂設施簡直家常便飯；香港嘅竹篙灣公園地方咁細小，要搵位起新嘢都唔容易，所以呢……或者因為咁，唯有要向啲無咁受歡迎、或者係高層唔鍾意嘅遊樂設施開刀？
馳車天地其實就係一個俾大家揸車車嘅遊樂設施，地下有條軌喺度，大家只需要踩油門同埋扭軚，小朋友都可以享受揸車嘅滋味。昔日香港嘅馳車天地係全球咁多個迪士尼入面唯一一個用電動車嘅馳車天地嚟，其他都係用汽油㗎！所以呢，香港嘅馳車天地特色就係好靜；另外仲有三條賽道，每條賽道都唔同㗎，所以香港嘅馳車天地同其他迪士尼嘅係有好大分別㗎！
至於幸會史迪仔，就係一個互動嘅娛樂節目，觀眾可以喺太空交通指揮中心同喺太空嘅史迪仔傾計，仲可以幫手拯救史迪仔；而香港版當然有廣東話版，搞笑又啜核！雖然史迪仔又搞笑又得意，但係內斂嘅香港人就未必咁鐘意喇。
而巴斯光年星際歷險，就係射擊遊樂設施，大家可以對住壞蛋焦焦焦鬥射高分，係一班朋友入park同樂嘅好去處嚟。不過，愛係需要抉擇同埋取捨，所以幸會史迪仔、巴斯光年星際歷險同埋馳車天地，就分別成為被捨棄嘅對象。
點解？有可能係因為樂園嘅擴建計劃入面，預留擴建嘅其中一部分土地已經用咗嚟做魔雪奇緣嘅園區，而如果其餘用地都起晒嘢，咁第時再擴建就無位㗎喇 — —大家睇睇下面幅圖就會見到，樂園嘅南面其實仲有位置可以起嘢嘅，但係一下用晒啲地起晒嘢佢的話，又唔知市場反應係點，風險咁高管理層或者唔敢一下咁進取啩？
咁既然 Iron Man 一開始就決定要起喺Tomorrowland，咁當年又話要個Marvel主題樂園，我相信最低成本嘅做法應該都係將明日世界改裝；而另一方面，既然要搵位安置Star War主題，最適合而又最低成本嘅方法，我諗都係搵本身已經係以太空做主題嘅明日世界；咁將太空山變成星戰極速穿梭、太空船變偵察艦、太空就係戰場，或者咁樣咁就最快最簡單啦~~~
於是乎，就係一個好基本嘅問題：Good Show 完美演出。首先本身瑟縮於太空山旁邊嘅太空交通指揮中心（即係幸會史迪仔），無理由會喺Star War嘅太空戰士旁邊㗎嘛 （定係史迪仔喺架太空船度食花生睇出面焦焦焦？）。所以，史迪仔需要返返去探險世界……嘅商店入面喇。
然後，當隔離有Marvel主題嘅Iron Man嘅時候，巴斯光年嘅存在的確可能會同周圍嘅環境有啲格格不入，而且Toy Story Land存在之後，巴斯光年亦都似乎冇理由同時出現喺兩個世界。另一邊嘅馳車天地嘅問題可能更加大，因為啲車車會喺之後嘅絕地聖殿上面掠過，點呀下面打緊仗上面砵砵車？！咩事呀？？？當然另一個可能死因係，馳車天地係一個非常之不受同事歡迎嘅遊樂設施，需要好多人手，又熱又辛苦，但係個個駕駛者入去碌車，成日都要101 [1]，結果成為Wait Time長期冠軍 — — 唔好俾條龍呃咗，其實唔係真係咁受歡迎㗎咋。況且你啲車日操夜操，電池損耗其實係非常之高嘅，咁電動車電池好貴㗎嘛，加上當年未有Tesla，連比亞迪都唔知喺邊，電池技術無依家咁成熟；呢間公司又不嬲都好窮，唔會捨得拎錢嚟係咁換電㗎喇。
結果，三項遊樂設施都分別不再存在；當中，太空交通指揮中心入面嘅設備被拆走，原址變成星球大戰：指揮站，由隔mon變成見真人，不過無計傾淨係meet & greet [2]。至於對面嘅巴斯敗走去反斗奇兵大本營之後，原址就正在變身成為蟻俠、黃蜂女嘅體驗，同巴斯一樣都係射擊遊樂設施，不過玩法變化都好似話幾大吓；目前已經開始做緊初步測試，預計3月開張，大家到時記得留意下喇。
至於馳車天地，上面嗰幅地圖都講咗會係2023年先會變身成Marvel遊樂設施，聽聞係以復仇者聯盟做主題，但實際會未動工嘅，目前成個馳車天地仲未拆喺度舖塵，而且山竹吹完入面啲冧樹都要清返，因為理論上佢係仲郁得㗎（實際上啲電動車仔嘅電池應該唔係好用得掛？）。亦因如此，有位喺明日世界返工嘅同事就話，恨不得即刻炸咗個馳車天地佢。
聰明嘅你實會問到，咁隔離嘅太空飛碟同埋同執笠無分別嘅彗星餐廳，到底點解唔會俾人郁呢？前者聞說係因為佢係明日世界嘅地標唔拆得，後者就……同河景餐廳一樣，一年總會開一兩日嘅（好似係）。[3]
至於而家想睇車車？得返夜晚嘅迪士尼光影匯先至見到喇。
[1] Code 101: 遊樂設施暫停運作
[2] Meet & Greet: 與迪士尼朋友見面
[3]河景餐廳開嘅日子比較多少少，部分旺季嘅繁忙日子都會開吓嘅。不過彗星餐廳一年開嘅日子應該不多於七日，所以我都唔知點解仲存在 lol
