瑟曦同中殿娘娘嘅犧牲

有一晚瞓瞓吓突然間，《權力遊戲》同《屍戰朝鮮》兩套唔多關事嘅劇突然響睡夢中合而為一。

（註︰有劇透，未睇哂就唔好睇落去，齋拍手就得）

其實已經睇完《權力遊戲》Season 8同埋《屍戰朝鮮》Season 2好一段日子，但係由於網上有太多評價，都無謂獻醜，諗住睇完就算。但有一晚瞓瞓吓突然間，兩套唔多關事嘅劇突然響睡夢中合而為一。合而為一嘅契機，並唔係兩套劇嘅fantasy情節，唔係主角（you know nothing嘅Jon Snow或世子李蒼？），亦都唔係咩犯駁位（李蒼用手打爆冰？），而係兩套劇嘅反派角色。

首先講吓兩個反派角色嘅分別《權力遊戲》嘅瑟曦，睇過呢套劇嘅應該都會比我熟悉，雖然頭七季係一個計算多多嘅奸角，但喬治馬丁勾劃出嚟嘅女皇，愛嘅除咗權力，仲有自己個仔。瑟曦攬權，但同時作為一個阿媽，當個仔受威脅時會想保護佢︰呢樣嘢你話係佢弱點都得，其實一個角色都係人，都有佢脆弱一面，而瑟曦響頭七季嘅勾劃已相當立體。但《屍戰朝鮮》嘅奸角中殿娘娘，雖然同樣都係戀棧權力，但係就一味只想得到王位，可能個仔根本唔係佢生啩？但中殿娘娘冇對親情嘅愛，甚至老豆都敢殺，響個性嘅刻劃上簡單得多。

令我一齊諗起兩套劇一樣嘅地方，就係兩位角色嘅下場，都係一樣。首先係瑟曦，響《權力遊戲》last season眼白白睇住君臨俾人烈火焚城。明明之前咁多集都咁算計，明知對手有條龍咁勁，打唔過走人係人之常情，居然乜都唔做等佢嚟攻。起初仲以為佢有乜計，點知原來係冇……而另一邊廂，中殿娘娘響李蒼殺入漢陽城嘅時候，我都以為佢有乜計，點知原來係令漢陽宮殿俾喪屍入侵，想同李蒼同歸於盡。

呢個就係瑟曦同中殿娘娘嘅相似地方︰打唔過人哋都唔走，而你唔會明白點解佢哋唔想走。表面上，佢哋係代表自己「奮戰到最後」﹑「等埋呀唔知邊個嚟」﹑「自己得唔到嘅嘢，人哋都唔可以有」呢幾種諗法；但事實上在我嚟睇，其實係因為套劇嘅集數限制，令佢哋失去咗一個better death，係編劇嘅犧牲品。我唔介意追多一個season，但因為唔夠budget就自己去送死，我只諗起下面幅圖︰

Plan得唔好，真係隨時會遺臭萬年。